रोमि 2 - Muria Far Western

पाप केवालोरकुन परमेस्वर न्याय किन्तोर

¹ इन्जोर हे न्याय केवाल नावोर गोतियाल, मिया बोनाय मन मिकुन बोदायि बहाना हिया परवि; बाक्याकि बोद पोल्लोसाटि निमा बोरायि दुसरोन दोषि मानेमान्तोन अदेनते निमा आपुनतुन वने दोषि ठहरे किन्तोन; बाक्याकि निमा दुसरोना बोद पोल्लोता न्याय किन्तोन ओद पोल्लो निमा वने किन्तोन।

² अनि इदाम बुतो किन्तोरक ओर लोकुरकुन परमेस्वरना उचित दन्ड पुटान्ता इन्जोर माक पुन्तोरोम।

³ मति निमा बोद बुतो साटि दुसरोन दोषि ठहरे किन्तोन अनि आपुन अदामे बुतो किन्तोन ते निमा परमेस्वरना न्यायताल पिसका इन्जोर नावोर गोतियाल बाताल निमा विचार किन्तोन बहे?

⁴ परमेस्वरना दया निया मन्दुन पस्तेमायाना करहो इन्जोर समजेमास ओना दया सहनशिलता अनि धिरजतुन निमा तुच्च समजेमान्तोन बहे?

⁵ मति परमेस्वर पकायि होंगते खरोय न्याय कियाना दिया, निया कटोरता अनि बसकेय पस्तेमायो ओद मन्दा कारणते आपुन साटि पकायि दन्ड पुटाना कारण आयार।

⁶ परमेस्वर सबोय लोकुरकुन ओरा बुतोता अनुसार न्याय कियानुर।

⁷ अनि दरोज सोबाय बुतो किसोर महिमा, आदर अनि बसकेय नाश आयो ओद जिवनतुन पळकसोरिंग मन्तोरक ओर लोकुरकुन परमेस्वर अदेना बदला अनन्त जिवन हियानुर।

⁸ मति आपुना स्वार्थिपनते खरोय रितिते ताकोर मति अदरम किन्तोरक ओर लोकुरकुन परमेस्वर होंग किस पकाय दन्ड हियानुर।

⁹ अनि गलति किन्तोर ओरक सबोय लोकुरा पोरो मुने यहुदि अनि पजा यहुदि आयोर सबोय लोकुरकनिगा दुःख अनि सन्कट वायार।

¹⁰ अनि सच्चायि किन्तोर सबोय लोकुरकुन मुने यहुदि अनि पजा यहुदि आयोर सबोय लोकुरकुन महिमा, आदर अनि शान्ति पुटार।

¹¹ बाक्याकि परमेस्वर बोनाय चेहरा हुळस न्याय केवोर।

¹² बोर मूसाना नियमतुन पुनवाय पाप कितुरक ओरक किता पापता अनुसार बिना नियमते न्याय कियानुर। अनि बोर मूसाना नियमतुन पुन्ज पाप कितुरक ओरकुन मूसाना नियमता अनुसार दन्ड पुटार।

¹³ बाक्याकि केवल मूसाना नियमता पोल्लोंग केन्जान्तोरक ओरक परमेस्वरना मुने दरमि आयोर मति बोर नियमते ताकान्तोरक ओरे परमेस्वरना मुने येताना योग्य ठहरे मायनुरक।

¹⁴ मूसाना नियम हिलेर ओर यहुदि आयोर लोकुरक नियमता आग्या आपुना स्वभावतेय मानेमास ताकान्तोरक ते ओरा हेरे मूसाना नियम हिले ते वने आपुनास मानेमान्तोर। इन्जोर ओद नियम आपुनतुन मूसाना नियम लेहकाय मन्ता।

¹⁵ ओरा मन वने इदेनाय गवाहि हिन्ता, अनि ओरा चिन्ता ओरकुन दोषि इन्ता या ओरकुन निरदोष इन्ज ओर मूसाना नियमता बुतो आपुना मन्दिगा कोटता मन्ता इन्जोर तोहान्तोरक।

¹⁶ नना वेहता सोबाता पोल्लो लेहका परमेस्वर निवळे कितोर ओर येसु मसिना द्वारा उन्दि दिया मानेयना मकतांग विचारता न्याय कियानुर असके इव पोल्लोंग आयनुंग।

यहुदिलोकुरक अनि मूसाना नियम

¹⁷ मति निमा आपुनतुन यहुदि इन्तोन। अनि मूसाना नियमतिगा निमा विस्वास किन्तोन। अनि आपुना परमेस्वरना बारेते अभिमानि किन्तोन।

¹⁸ अनि निकुन नियमताल करिहतोर इन्जोर निमा बाताल कियाला पहाजे ओद परमेस्वरना इच्चातुन सोबाय पुन्तोन अनि मुक्य पोल्लोनुंग मानेमान्तोन ते,

¹⁹ नियमतिगा ग्यान अनि खरोय मन्ता। ओद ग्यान अनि खरोय निकुन नियमताल पुटता इन्जोर निमा परमेस्वरतुन पुनोर ओर लोकुरकुन ताकिहवाल मन्तोन। अनि बोर आन्दारते लेसकतोर ओरा साटि निमा वेळिचि मन्तोन ते,

²⁰ निमा अळानि लोकुरकुन करिहवाल मन्तोन, बालकुन उपदेशक मन्तोन इन्जोर निमा आपुन मानेमान्तोन ते

²¹ हे दुसरो लोकुरकुन करहिवाल मानेय, निमा आपुनतुन बाक्या करहिवि? अनि निमा कलमा इन्तोन मति निमाय कलान्तोन बहे?

²² निमा व्यभिचार केमा इन्तोन मति आपुने व्यभिचार किन्तोन बहे? निमा बोव मूरतिनांग विरोद किन्तोन मति निमा ओद मूरतिना मन्दिरता संपतितुन बाक्या कलान्तोन?

²³ निमा ओद नियमता बारेते अभिमानि किन्तोन मति ओद नियमतुन मानेमायवि ते परमेस्वरना अपमान बाक्या किन्तोन?

²⁴ “मिया कारणते दुसरो जातितोर लोकुरकनिगा परमेस्वरना पोरोयता अपमान आन्ता” इन्जोर पवित्र पुस्तकतिगा कोटता मन्ता।

²⁵ निमा मूसाना नियमता पालन किन्तोन असकेय कतनाता फायदा मन्ता, मति निमा नियमतुन मानेमायवि ते निमा कतना केवोर लोकुराय लेहका मन्तोन।

²⁶ अनि बोनाय कतना आयो ओर नियमता अनुसार ताकान्तोर ते ओर बाताल कतना आतोर लोकुरा बराबर गिन्ति आयो बहे?

²⁷ बोर मानेय मेन्दुलते कतना आयो मति ओर नियमतुन पालन किन्तोर ते निमा यहुदि मानेय निया हेरे मूसाना नियम अनि कतना मन्ता, मति ओद नियमतुन मानेमायवि ते कतना आयोर ओर नियमतुन सोबायि पालन केवाल मानेय निकुन दोषि ठहरे किन्तोर।

²⁸ बोर यहुदि जातितिगा जनम आसुन यहुदि नियमता अनुसार मेन्दुलतिगा कतना कियानुर ते ओर खरोय यहुदि आयोर।

²⁹ अनि परमेस्वरना नियम सबोय मन्दे बोर मानेमान्तोर ओरे खरोय यहुदि मन्तोर; मूसाना नियमता कोटता कतना खरोय आयो मति पवित्र आत्माता द्वारा मन्दा पापता कतना खरोय कतना आन्दु। ओर मानेयना स्तुति आयो मति परमेस्वरनिकेडाल स्तुति आन्ता।