रोमि 1 - Muria Far Western

पोलुसनिकेडाल अभिवादन

¹ परमेस्वर आपुनोर मरि अनि इद दुनियातिगा दावुदनोर वंशतिगा जनम आतोर, अनि हातोरिगाडाल असा जिवेमातुर इन्जोर पवित्र आत्माता द्वारा परमेस्वरनोर लाववाले मरि इदाम परमेस्वर आचतोर मावोर प्रबु येसु मसिना बारेते,

² (पवित्र पुस्तकतिगा परमेस्वरना पोल्लो वेहवालोरा द्वारा परमेस्वर मुनेय वाचा हिस मता येसु मसिना बारेता सोबाता पोल्लो) वेहान साटि

³ आचकुन अलग किस केयस मतोर येसुना खास चेलाल अनि येसु मसिनोर दास पोलुस,

⁴ परमेस्वरना प्रिय अनि पवित्र आयान साटि केयस मतोरक ओर रोम सहेरतिगा मनवालोर सबोय लोकुरक साटि इद पत्र कोटान्तोना:

⁵ ओना पोरोयता कारण यहुदि आयोर लोकुरकनिगा प्रबु येसुन विस्वास किस मानेमायाना साटि येसु मसिना द्वारा ओना पोरोयता कारण माकुन दया किस येसुना खास चेलाह आस आचतुर।

⁶ अनि येसु मसिन साटि केयस मतोरक ओर लोकुरकनिगा निमाट रोमि सहेरतोर वने मन्तोरक।

⁷ मावोर बाबो परमेस्वरनिकेडाल अनि प्रबु येसु मसिनिकेडाल मिकुन दया अनि शान्ति पुटि।

येसुना खास चेला पोलुसना धन्यवादता प्रार्थना

⁸ मिया विस्वासता पोल्लो दुनियाता सबोय लोकुरकनिगा आयिला आता इन्जोर सबोयता मुने नना पोलुस येसु मसिना द्वारा निमाट सबोय लोकुरक साटि नावोर परमेस्वरना धन्यवाद कियाना इच्चा किन्तोना।

⁹ नना दरोजे मिकुन आलहिस परमेस्वरना इच्चाते बदाम आयि आकरिते मिया हेरे बसकेय वाय परका इन्जोर आपुना प्रार्थनातिगा नना दरोज परमेस्वरतुन विनन्ति किन्तोना,

¹⁰ इन्जोर परमेस्वरना मरिना बारेता सोबाता पोल्लो प्रचार कियानातिगा नना नावा सबोय मन्दे सेवा किन्तोना परमेस्वर नावा गवाहि मन्तोर।

¹¹ अनि मिया विस्वासतुन मजबुत कियान साटि नना मिकुन पवित्र आत्माता बाताले वरदान हियाना,

¹² मन्जे मिया अनि नावा नडुम एकमेका विस्वासते मियासंग नाकुन वने हिमत पुटि इन्जोर नना मिकुन मिलेमायाना साटि पकाय इच्चा किन्तोना।

¹³ हे बायि-दादालोरक, इद निमाट पुन्दिला पहाजे: नना मिया हेरे वायाना असा इच्चा किन्तोना मति इदेकवनाह अळचन मता। दुसरो प्रदेशतिगा मनवालोरक यहुदि आयोर दुसरो लोकुरकुन बदाम येसु मसिना हेरे तचुन ओरकुन विस्वासते मजबुत कितान अदामे मिया लोकुरकनिकेडाल वने येसु मसिना हेरे तचुन ओरकुन वने विस्वासते मजबुत कियाला पहाजे इन्जोर नना मिया हेरे वास बुतोकियाना इच्चा किन्तोना।

¹⁴ नना युनानि अनि युनानि बोलि पुनोर ओर लोकुरा, पकायि करियतोर अनि हुळुकसिना करियतोरक येरक सबोय लोकुरकुन येसु मसिना सोबाता पोल्लो वेहवाल सेवक मन्तोना।

¹⁵ इन्जोर नना निमाट रोम सहेरतिगा मन्वालोरकुन वने येसु मसिना बारेते सोबाता पोल्लो प्रचार कियान साटि नावा पकायि इच्चा मन्ता।

येसु मसिना बारेते सोबाता पोल्लोता लाव

¹⁶ नना येसु मसिना बारेते सोबाता पोल्लोसाटि लज्जा आयोन; बाक्याकि बोरायि अगा विस्वास इरान्तोरक ओना पिसाना साटि मुने यहुदि अनि पजा यहुदि आयोर लोकुरकुन ओद पिसाना साटि परमेस्वरना लाव मन्ता।

¹⁷ बाक्याकि परमेस्वर आपुना पोरो विस्वास किन्तोर ओर लोकुरकुन बदाम येताना योग्य बनेहकिन्तोर इन्जोर येसु मसिना बारेते सोबाता पोल्लोतिगा सुचेह कितोर। परमेस्वरना मुने येताना योग्य मुनेटाल आकरिवनाह विस्वासतिगा टिकेमाता। पवित्र पुस्तकतिगा कोटता मन्ता अदाम लेहका “परमेस्वरना मुने येताना योग्य विस्वासते जिवित मन्दानुर।”

परमेस्वरनिगा विस्वास केवोर ओर लोकुरकुन परमेस्वर होंग किस पकायि दन्ड हिन्तोर

¹⁸ परमेस्वरना विरोद किता खराब बुतो ते खरोयतुन मकहान्तोर लोकुरा खराब बुतोंग अनि सबोय गलतिता पोरो स्वरगताल परमेस्वर पकाय होंग किन्तोर।

¹⁹ परमेस्वर आपुना बारेते ओरकुन सोबाय प्रगट कितोर इन्जोर परमेस्वरना बारेते ओरक सबोय रितिते पुन्तोरक।

²⁰ बाक्याकि दुनियाता रचना आता असकेडाल परमेस्वरना गुपित गुण अनि परमेस्वरना अनन्त लाव अनि परमेस्वरत्व मन्जे परमेस्वरना स्वभाव साप साप दिसान्ता। परमेस्वर रचना कितोर ओद सबोय चिजताल ओरक पुरा रितिते ओव पोल्लो पुन्दिला परान्तोरक इन्जोर परमेस्वर हिलेर इदाम विस्वास केवालोरकुन बाताले इन्दिला परोर।

²¹ ओरक परमेस्वर मन्तोर इदाम पुन्तोर मति ओरक परमेस्वरतुन आदर अनि धन्यवाद हेवोरक। मति ओरक आपुना विचारते परमेस्वरना बारेते बेकार पोल्लोंग किन्तोरक इन्जोर ओरा निरबुद्धि मन आन्दारते निन्दिता।

²² ओर आपुनतुन बुद्धिमान तोहच मुर्ख बनेमातोरक;

²³ अनि बसकेय नाश आयोर ओर परमेस्वरना महिमातुन नाश आयवाल मानेय, पिटेंग, जानवर, अनि पोटाते ताकवांग अलग अलग जानवरता रुप लेहका बनेकिता मूरतितिगा ओर लोकुरक बदले कितोरक।

²⁴ इन्जोर परमेस्वर ओरकुन आप आपुना मन्दा खराब इच्चाते हन्दिला हितुर। अनि ओर लोकुरक आप आपुना इच्चाते बुतो कितुर अनि ओरा बेकार विचारता कारण वरोर दुसरोना मेन्दुलतिगा अनादर कितुरक।

²⁵ ओरक परमेस्वरना खरोयतुन खोटालतासंग बदलेकितुरक, अनि ओरक सृष्टिकेवालतुन तासिस सृष्टितुन आरादना कियाला लागतुरक। मति सबोयता सृष्टिकेवाल परमेस्वरे सबोय काळते धन्य मन्तोर, आमेन।

²⁶ इन्जोर परमेस्वर ओरकुन खराब वासनाता कयदे सोपेह कितुर; ओरांग आसक मानेयनासंग हुन्जाना तासित अनि ओव दुसरो आळदासंग खराब वासनाते हुन्जिला लाकतुंग।

²⁷ इदामे मानेयक वने आळदासंग हुन्जाना तासिस ओर आपसते खराब वासनाता पकाय इच्चा कियाला लागतुरक अनि मानेय मानेयनासंग व्यभिचार कियाला लाकतुर। परमेस्वर ओरकुन इदाम अदारमिक व्यवहार साटि ओरा पापता अनुसार दन्ड हितुर।

²⁸ बसके ओर परमेस्वरना बारेते विचार कियाना वने विरोद कितुर असकेडाल परमेस्वर ओरकुन ओरा मन्दा बेकार विचार ओरा पोरो अदिकार कियाला हितुर। इन्जोर ओर बसकेय केमाकिर अदाम पकायि खराब बुतो ओर लोकुरक कितुरक।

²⁹ ओर लोकुरक सबोय प्रकारतांग अदरम, पाप, लालुच अनि वयरताते आतुरक। ओरक हेवा, हव्काना, वाहचाना, जल कपट, अनि दुजा भावते आतोरक ओरक दुसरोना बारेते दरोज सोबाय विचार केवोर मति ओर लोकुरक दुसरोना चाहळिंग वेहिन्तोरक,

³⁰ अनि ओरक निन्दा केवालोरक अनि परमेस्वरतुन नफरत केवालोरक, दुसरोना अपमान केवालोरक, गमन्डि, अभिमानि, खराब खराब पोल्लोंग बनेकेवालोरक अनि अवाल बाबोना आग्या मानेमायोरक मन्तोरक।

³¹ अनि निरबुद्धि, विस्वासघाति, माया केवोरक, अनि दया केवोरक आतोरक।

³² इदाम पोल्लोंग केवालोरक हायानाता योग्य मन्तोरक इदाम परमेस्वरना दरमिकपुर्ण नियमतुन ओरक पुन्तोरक ते वने ओरक केवल ओद बुतोतुन किन्तोरक, अचोने आयो मति अदाम बुतो केवालोरकुन मदत वने किन्तोरक।