युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 9 - Muria Far Western

पान्चवो पिपारि

¹ अनि पान्चवो स्वरगदूत ओना पिपारि नेकिहतुर असके आबारताल उन्दि हुको दरितितिगा अराना नना हुळतान, अनि अडिय बचोन खोल मन्ता इन्जोर माक पुनोम अचोन हजोर पतियता किसिता गडदाता किल्लिंग ओद हुकोन हितुर।

² ओद हुको अडिय बचोन खोल मन्ता इन्जोर माक पुनोम अचोन हजोर पतियता किसिता गडदाता पाटक तरियतु। सान्डे पकाय हजोर किसिता कुन्डताल हजोर भट्टि पोयानता लेहका ओद गडदाताल पोयाना पोरो पसियतु, अनि किसिता ओद हजोर कुन्डता पोयोते पोळद अनि आबार आन्दार आतुंग।

³ ओद पोयानातिगाडाल टिडियाह दरतितिगा पसियतुंग, अनि अवेहकुन दरतिता मिचोंग लेहका लाव हिहतुर।

⁴ अनि कपारक पोरो परमेस्वरना शिक्का हिले मानेयकुन तासि दरतिता रोन्डातुन या बोदे हिरवो जाळितुन या बोदे मरातुन तकलिप हेमाट इन्जोर ओव टिडियाहकुन आग्या हितुर।

⁵ लोकुरकुन हव्काना आयो मति ओरकुन सयुंग महिनांगवनाह केवल पकाय तकलिप हियान साटि अवेहकुन अदिकार हितुर। अनि अवेहना तकलिपता नोमुर मिचो कोडिन्ता ते मानेयकुन आन्ता नोमुर लेहका मता।

⁶ ओव दियांग मानेय हायानातुन पळकानुरक मति हायोरक आयनुरक, अनि ओरक हायानाता पकाय इच्चा कियानुरक, मति ओरक बसकेय हायोरक आनुरक।

⁷ अव टिडियाह लळायि साटि तयार कितांग कोडांग लेहका मतांग, अनि अवेहना तलापोरो सोनोता मुकुट लेहका बाताले मता, अनि अवेहना चेहराक मानेयना चेहराक लेहका मता।

⁸ आळदा कल्क लेहका अवेहकुन कल्क मतांग अनि पल्क निराहकना पल्क लेहका मतांग।

⁹ कचिता चिलकांग ओरा चातितागांग चिपळेंग मतांग, अनि अवेहना मारेकिंगनांग लेंग लळायितिगा वितानतांग पकाय कोडाह अनि कोडाहना रथता लेंग लेहका मता।

¹⁰ अवेहना तोकारक मिचोता तोकारक लेहका मता अनि तोकारतिगा काटा मता, अनि मानेयकुन सयुंग महिनांगवनाह पकाय तकलिप हियानाता लाव अवेहना तोकारतिगा मता।

¹¹ अडिय बचोन गहराय मन्ता इन्जोर माक पुनोम अचोन हजोर पतियता किसिता गडदातोर दूत ओरा राजाल मतोर, ओना पोरोय इब्रानि बोलिते अबदोन, अनि यूनानी बोलिते अप्पुल्ल-योन इदाम वने मन्ता।

¹² पहलेटा पकाय तकलिप मारतु, इदेक असा रन्ड पकाय तकलिप वायवाल मन्तांग।

¹³ सहावो स्वरगदूत पिपारि नेकिहतुर असके परमेस्वरना मुने मन्ता सोनोता बलिवेदिता नालुंग कोन्टांगतिगाडाल उन्दि लेंग पिपारि पयतोर ओर सहावो स्वरगदूततुन:

¹⁴ “युफरातेस पोरोयता हजोर नदिता हेरे दोहच मतोर नालुरक स्वरगदूतकुन लेहा” इन्जोर इन्दानपा नना केन्जतान।

¹⁵ अनि ओर नालुंग स्वरगदूतकुन लेहचितुर। ओरक दुनियाता तिसरोता उन्दि भाग लोकुरकुन हव्कान साटि तयार किता बेरा, दियांग, महिनांग, अनि वरसा साटि तयारि किस इरतोर मन्तोक।

¹⁶ ओरा कोडाहवाले सयनिक लोकुरा संख्या करोड करोड मता इन्जोर नना ओरा काहाना केन्जतान।

¹⁷ नना दर्शनते कोडांग अनि कोडांग पोरो उदितोरक लोकुरकुन हुळतान। ओरकुन किसता रंग अनि निळो रंगता धूम्रकान्त पोरोयता पकाय किमतिवाले कलदा अनि गन्धक रंगता चिलकत छातितिगा मता, अनि ओव कोडांगना तला निराहकना तलांग लेहका मतांग, अनि अवेहना टोडिताल किस अनि पोयाना अनि गन्धक पसियन्दु।

¹⁸ अवेहना टोडिंगताल पसियन्द इव मुन्डास पिळाते अर्थ किस अनि पोयाना अनि गन्धकता कारण दरतिता तिसरोता उन्दि भाग मानेयकुन हव्कस वाटतुरक।

¹⁹ अव कोडांगना लाव अवेहना टोडिंग अनि अवेहना तोकारकतिगा मता; अवेहना तोकारक तरास लेहका मन्तांग अनि अदेन तलांग वने मन्ता अनि इदेनतेय ओव मानेयकुन घाव हिन्तांग।

²⁰ इव तकलिपते हायोर आस मतोरक ते वने पिसतोर मानेयक दुष्टात्मांगता आरादना कियाना तासोर आतुरक अनि अदामे हुळिला अनि केन्जिला अनि ताकिला परोंग सोनो अनि चान्दि अनि पितळी अनि कल अनि मराते आपुना कयदाल बने किता मूरतिता आरादना वने तासि पस्तेमायोर आतुरक।

²¹ अनि ओरा हव्काना, अनि अळहाना अनि व्यभिचार अनि कलेर बुतो तासि पस्तेमायाना वने केवोरक।