युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 8 - Muria Far Western

सातवो शिल अनि सोनोता धुपारना

¹ अनि बेळा पिला ओव सात शिलतिगाडाल सातवो शिल देहतुर असके स्वरगतिगा लगभग अरदो गन्टावनाह पकाय शान्त आतु।

² असके परमेस्वरना मुने सात स्वरगदूतक नितस मन्तोर नना हुळतान, अनि ओरकुन सात पिपारिंग हितुर।

³ पजा असा वरोर स्वरगदूत सोनोता धुपारना पयस वासुन वेदिता हेरे नितितुर। अनि सिंहासनता मुने मता सोनोता बलिवेदि पोरो सबोय पवित्र लोकुरा प्रार्थनातासंग चळेह केविर इन्जोर ओन पकाय धुप हितुर।

⁴ ओद धुपता पोयाना पवित्र लोकुरा प्रार्थनातासंग स्वरगदूतना कयदाल परमेस्वरना मुने अवतु।

⁵ असके स्वरगदूत धुपारना पयस बलिवेदिता किस निहतुर अनि दरतितिगा वाटसितुर, अनि सान्डे गुळजेमायाना अनि लेंग अनि विजक अनि भुकंप आयिला लागतुंग।

सात स्वरगदूत सात पिपारिंग नेकहान्तोरक

⁶ असके सात पिपारिंग मतांग ओरक सात स्वरगदूतक अवेहकुन नेकहान साटि तयार आतुरक।

⁷ पहले स्वरगदूत पिपारि नेकिहतुर, असके नतुर मिसरे मातांग पकाय हजोर अदुह अनि किस उत्पन्न आतु, अनि अवेन दरतितिगा वाटसितुर, अनि दरतिता तिसरोता उन्दि भाग पयटेमात, अनि मराकना तिसरोता उन्दि भाग पयटेमात, अनि सबोय हिरवो रोन्डा वने पयटेमात।

⁸ दुसरो स्वरगदूत पिपारि नेकिहतुर असके उन्दि पोतियता हजोर मटा लेहका बाताले उन्दि चिज समुद्रतिगा वाटसितुर, अनि समुद्रता तिसरोता उन्दि भाग नतुर आतु।

⁹ अनि समुद्रता सबोय जानवरनिगाडाल तिसरोता उन्दि भाग हातुंग अनि जहाजताल तिसरोता उन्दि भाग नाश आतुंग।

¹⁰ तिसरो स्वरगदूत पिपारि नेकिहतुर असके मशाल लेहका पोतियन्दा उन्दि हजोर हुको स्वरगताल अरतु अनि नदिंगता तिसरोता उन्दि भागतिगा अनि एता झरातिगा वास अरतु।

¹¹ ओद हुकोता पोरोय कुळामराता लेहका पकाय कयता मराता हिर इदाम मता, अनि तिसरोता उन्दि भाग एर कुळामराता हिर लेहका कयता आतु, अनि ओद एर कयस मता इन्जोर पकाय लोकुरक अदेन उतुर अनि हातुरक।

¹² चवतो स्वरगदूत पिपारि नेकिहतुर असके पोळदता तिसरोता उन्दि भाग, अनि नलेंजता तिसरोता उन्दि भाग, अनि हुकोंगता तिसरोता उन्दि भाग नाश आतु इव सबोयता तिसरोता उन्दि भाग आन्दार आतु अनि नरका-पियालता तिसरोता उन्दि भाग आन्दार आतु।

¹³ असके पजा उन्दि गरुड पिटे आबारता नडुम परयाना नना हुळतान, अनि ओद गरुड, “असा पिपारि उहकाना मन्ता मुवुर स्वरगदूतकना पिपारिता लेंगदा कारण, दरतितिगा मनवालोरकनिगा पकाय तकलिप, पकाय तकलिप, पकाय तकलिप” इदाम जोरदे इन्दाना नना केन्जतान।