युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 7 - Muria Far Western

उन्दि लाख चवरेचाळिस हजार इस्रायेलतोर लोकुरक

¹ इदेना पजा जागातिगा अनि समुद्रतिगा अनि बोदे मरातुन वळिय पळमाकि इन्जोर नालुंग स्वरगदूतक दरतिता नालुंगास वळियतुन पयस रोमिहचुन दरतिता नालुंगास कोन्टातिगा नितितोरक हुळतान।

² असा वरोर दुसरो स्वरगदूततुन जितो परमेस्वरना शिक्कातासंग पूरव दिशातिकेडाल पोरो वायानपा नना हुळतान। ओर जागा अनि समुद्रतुन नाश कियानाता अदिकार हिस मतोर ओरक नालुरक स्वरगदूतकुन,

³ “मावोर परमेस्वरनोर सेवक लोकुरा, कपार पोरो माक शिक्का किस मारानावनाह जागातुन, समुद्रतुन अनि मराहकुन नाश केमाट” इन्जोर जोरदे इतुर।

⁴ शिक्का येतितोरा संख्या नना केन्जतान: इस्रायेल लोकुरा सबोय गोत्रताल शिक्का येतितोर उन्दि लाख चवरेचाळिस हजार लोकुरक मतोरक।

⁵ यहुदाना गोत्रताल बारा हजार लोकुरापोरो शिक्का हितुर, रुबेनना गोत्रताल बारा हजार लोकुरापोरो शिक्का हितुर, गादना गोत्रताल बारा हजार लोकुरापोरो शिक्का हितुर।

⁶ आसेरना गोत्रताल बारा हजार लोकुरापोरो शिक्का हितुर, नपतालिना गोत्रताल बारा हजार लोकुरापोरो शिक्का हितुर, मनश्शिहना गोत्रताल बारा हजार लोकुरापोरो शिक्का हितुर,

⁷ शिमोनना गोत्रताल बारा हजार लोकुरापोरो शिक्का हितुर, लेविना गोत्रताल बारा हजार लोकुरापोरो शिक्का हितुर, इस्साखारना गोत्रताल बारा हजार लोकुरापोरो शिक्का हितुर,

⁸ सेबूलुनना गोत्रताल बारा हजार लोकुरापोरो शिक्का हितुर, यूसुफना गोत्रताल बारा हजार लोकुरापोरो शिक्का हितुर, अनि बिन्यामिना गोत्रताल बारा हजार लोकुरापोरो शिक्का हितुर।

स्वरगतिगा दरतिता सबोय देशतोर लोकुरा पकाय भीळ

⁹ असके पजा सबोय जातिंग अनि गोत्र अनि अलग-अलग बोलि वळकवालोर लोकुरकताल, बोरे काहिला परोर इचोन उन्दि पकाय हजोर भीळ पान्डरि सन्दरा करस अनि आपुना कयतिगा खजुरता कोहक पयस सिंहासनता मुने अनि बेळा पिलाता मुने नितितोरक नना हुळतान।

¹⁰ “पिसाना सिंहासनतिगा उदितोर मावोर परमेस्वरना अनि बेळा पिलाताल पुटान्ता” इन्जोर ओरक पकाय जोरदे वेहचोर मतोरक।

¹¹ अनि सबोय स्वरगदूतक ओद सिंहासन अनि चोविस खास अदिकारि लोकुरक अनि नालुंग प्रानिंगना नालुंगास बासा निचुन सिंहासनता मुने मिन्डांग टेकेकिस अडिय अरसुन परमेस्वरतुन आरादना किस इतुरक,

¹² “आमिन! मावोर परमेस्वरना स्तुति अनि महिमा अनि ग्यान अनि धन्यवाद अनि आदर अनि सामर्थ्य अनि लाव सबोय काळते बनेमास मनि। आमिन।”

¹³ असके खास अदिकारि लोकुरकनिकेडाल वरोर नाकुन, “येरक पान्डरि सन्दरांग करतोरक बोरक आन्दुरक? अनि ओरक बगाडाल वातोरक?” इन्जोर पुच्चेमातुर।

¹⁴ नना ओन इतान, “हे सयबाल, निमा पुन्तोन।” ओर नाकुन इतुर, “येरक पकाय तकलिपताल पसियस वातोरक, अनि बेळा पिलाता नतुरतिगा आपुना-आपुना सन्दरा नोरस पान्डरि कितोरक।

¹⁵ इन्जोर ओरक परमेस्वरना सिंहासनता मुने मन्तोरक, अनि ओना मन्दिरतिगा नरका-पलिंग ओना सेवा किन्तोरक, अनि सिंहासनतिगा उदितोर परमेस्वर ओरासंगे मन्जुन ओरकुन संभाले केवाल आयनुर।

¹⁶ पजा ओरकुन बसकेय करवसो आयार अनि एर उन्डावसो आयार, अनि ओरा पोरो अदि अनि बोदे उष्ण अरो आयार।

¹⁷ बाक्याकि सिंहासनता नडुम मन्तोर बेळा पिला ओरकुन केपानुर, अनि जिवन हेवाल एता झरा हेरे ओरकुन ओयनुर, अनि परमेस्वर ओरा कोन्डाता सबोय कनेळक उमस वाटनुर।”