युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 6 - Muria Far Western

सात शिल्कुन बेळा पिला देहान्तोर

¹ पजा बेळा पिलाल सात शीलक लावेकिस बन्द किता ओद पुस्तकता ओव सात शिलतिगाडाल पहले शिलतुन देहतुर असके “वाय!” इन्जोर ओव नालुंगास प्रानिंगनिगाडाल उन्दि प्रानि गुळजेमायाना लेंग लेहका इन्दाना नना केन्जतान।

² असके नना उन्दि पान्डरि कोडातुन हुळतान; अनि ओद कोडा पोरो उदवाल धनुष्य पयतोर, अनि ओन उन्दि मुकुट पुटतुर अनि ओर विजय पुटिहचोर पुटिहचोर असा विजय पोरो विजय पुटहान साटि पसियस हतुर।

³ अनि बेळा पिलाल ओव सात शिलतिगाडाल दुसरो शिल देहतुर असके दुसरो प्रानि इदाम इन्दाना नना केन्जतान, “वाय!”

⁴ असके किसिता लेहका रेंगाल रंगता दुसरो कोडा पसियतु, ओद कोडा पोरो उदवालिन वरोर दुसरोन हव्किरक अनि दरतितिगाडाल शान्तितुन नाश कियाना अदिकार हितुर अनि ओन उन्दि हजोर तलवार वने हितुर।

⁵ अनि बेळा पिला ओव सात शिलतिगाडाल तिसरो शिल देहतुर असके नना तिसरो प्रानि इदाम इन्दाना केन्जतान, “वाय!” असके उन्दि कारयाल कोडातुन नना हुळतान अनि ओद कोडा पोरो उदवाल कयदे उन्दि किलोकाटा पयस मतोर।

⁶ असके पजा, “उन्दि दियाता रोजिते उन्दि शेरमेन्ड गोहक, अनि उन्दि दियाता रोजिते मून्ड शेर जव मति निय अनि अंगुरता जोमातुन नुकसान केमा” इदाम ओव नालुंगास प्रानिंगना नडुमताल उन्दि लेंग लेहका नना केन्जतान।

⁷ अनि बेळा पिला ओव सात शिलतिगाडाल चवतो शिल देहतुर असके “वाय!” इन्जोर चवतो प्रानि इन्दाना नना केन्जतान।

⁸ असके नना कमकाल हिरवो रंग मिसरे माता मिटु पिटेता रंग लेहका उन्दि कोडातुन हुळतान! अनि ओद कोडा पोरो उदवालना पोरोय हामुर मन्ता अनि हातोर लोकुरा दुनिया ओना परके परके मन्ता। अनि तलवारते अनि दुष्काळते अनि हजोह-हजोह बिमारिते अनि दरतिता केळा जानवरकना कारण दरतिता चवतोता उन्दि भागता लोकुरकुन हव्किर इन्जोर ओरकुन अदिकार हितुर।

⁹ अनि बेळा पिला ओव सात शिलतिगाडाल पान्चवो शिल देहतुर असके परमेस्वरना पोल्लोता कारण अनि ओरा गवाहिता कारण हव्कस मतोरा आत्मांगतुन वेदिता अडिय नना हुळतान।

¹⁰ “सबोयताल हजोर पवित्र अनि खरोय प्रबु दरतिता लोकुरकुन न्याय अनि दन्ड किस माकुन हव्कानाता बारेते बदला हियान साटि निमा बचोन वनाह बेरा कियाकि बहे?” इन्जोर ओरक पकाय जोरदे इतुरक।

¹¹ ओरक सबोय लोरकुन पान्डरि सन्दरा हितुर। अनि मिया लेहका हव्कवाल मन्तोरक मिवोर संगवारि दास अनि तमोलोरा काहाना पुरा आयानावनाह निमाट असा हुडुक बेरावनाह हरहुळाट इन्जोर ओरकुन इतुर।

¹² अनि बेळा पिला ओव सात शिलतिगाडाल सहावो शिल देहतुर असके उन्दि हजोर भुकंप आतु, अनि पोळद कामरा लेहका कारयाल आतु अनि नलेन्ज पुरा नतुर लेहका आतु।

¹³ अन्जीर मरा हजोर वळियते होलेमास अन्जीर मराताल कच्चो कायांग अरान्तांग लेहका आबारतांग हुकोंग दरतितिगा अरतुंग।

¹⁴ आबार गुन्डेहकिता कागद लेहका बदलेमात, अनि सबोय मटाक, अनि सबोय टापुंग आप आपुना जागाताल पसियस हतुंग।

¹⁵ असके दरतितोर राजाह, अनि सबोयताल हजोर अदिकारि लोकुरक अनि पकाय हजोर सयनिक अदिकारि लोकुरक, अनि दनवानक अनि मुक्याह लोकुरक, अनि सबोय दासक अनि स्वतन्त्र लोकुरक पान्जा लोपा अनि मटाता कलतिगा हन्ज मकतुरक।

¹⁶ ओरक मटाक अनि कलकुन इन्दिला लागतुरक, “मावागा अराट अनि सिंहासनतिगा उदितोर ओना चेहरा हुळवि अनि बेळा पिलाता होंग मावागा वायमाकि इन्जोर माकुन मकहाट।

¹⁷ बाक्याकि ओरा पकाय होंगता हजोर दिया वाता, इदेक बोर अदेना विरोद किया परान्तोर?” इन्जोर इतुरक।