युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 5 - Muria Far Western

शील किता पुस्तक अनि बेळा पिला

¹ असके पजा नना सिंहासनतिगा उदस मतोर ओना तिन्दान कयतिगा लोपा अनि बाहरो कोटता मता, अनि सात शीलक लावेकिस बन्द किता उन्दि गुन्डे किस मता पुस्तक हुळतान।

² पजा “इद पुस्तकता शीलकुन देहच तरियाना योग्य बोर मन्तोर?” इन्जोर पकाय हजोर लेंगदे वेहचोर मतोर वरोर लाववाले स्वरगदूततुन नना हुळतान।

³ मति ओद पुस्तकतुन तरियाना या ओद पुस्तकतुन वाचेकियाना स्वरगतिगा या दरतितिगा या दरतिता अडिय वने बोरे आय परोर आतुर।

⁴ असके ओद पुस्तकतुन तरियाना या ओद पुस्तकतुन वाचेकियाना योग्य बोरे पुटोर आतुर इन्जोर नना पकाय दुःख किस किलतान।

⁵ असके ओरक चोविस खास अदिकारि लोकुरकनिगाडाल वरोर नाकुन इतुर, “किलमा, हुळा, यहुदाना गोत्रतोर ओर निराल अनि दावुदनोर वंश मन्तोर ओद विजयि आतोर। इन्जोर ओर पुस्तकता सात शीलक देहच तरियिलाय परान्तोर।”

⁶ असके नना ओद सिंहासन अनि नालुंग प्रानिंग अनि चोविस खास अदिकारि लोकुरा नडुम बोरे असकता लेहका वरोर बेळा पिलातुन नितितोर हुळतान। ओन सात कोहक अनि सात कोन्डांग मन्तांग। ओव सात कोन्डांग परमेस्वरना सात आत्मांग आन्दुंग। अवेहकुन परमेस्वर सबोय दरतितिगा लोहच मतोर।

⁷ ओर वास सिंहासनतिगा उदस मतोर ओना तिन्दान कयदाल गुन्डे किस मता ओद पुस्तक येतितुर।

⁸ ओर ओद पुस्तक येतितुर असके अव नालुंगास प्रानिंग अनि चोविस खास अदिकारि लोकुरक बेळा पिलाता काल्क अरतुरक। वरोन वरोन आपुना कयतिगा वीणा अनि पवित्र लोकुरा प्रार्थना आन्दुंग धुपते निन्दितांग सोनोता वाटिंग कयतिगा पयस मतोरक।

⁹ ओरक इदाम उन्दि पुनाल पाटा ओयिला लागतुरक: “इद गुन्डे किस मता ओद पुस्तकतुन येतान साटि अनि इदेना शिल देहान साटि निमा योग्य मन्तोन, बाक्याकि निकुन कदियतोर अनि निया नतुरते सबोय गोत्रताल अनि बोलिताल अनि लोकुरकनिकेडाल अनि सबोय जातितोर लोकुरकनिकेडाल परमेस्वर साटि लोकुरकुन निमा असतोन।

¹⁰ अनि मावोर परमेस्वरिन सेवाकियान साटि ओरकुन उन्दि राज्य अनि याजक लोकुरक आस निमा बनेहकिति अनि ओरक दरतितिगा राज कियानुरक” इन्जोर ओरक उन्दि पाटा ओयिलातोरक।

¹¹ असके पजा नना लाख लाख अनि करोड करोड स्वरगदूतना लेंग केन्जतान। ओरक सिंहासन अनि अव प्रानिंग अनि ओरक चोविस खास अदिकारि लोकुरा नालुंगास बासा मतोरक।

¹² अनि ओरक पकाय हजोर लेंगदे ओतुरक, “कदियताल बेळा पिलाय लाव अनि धन अनि ग्यान अनि लाव अनि आदर अनि महिमा अनि धन्यवाद येताना योग्य मन्तोर।”

¹³ असके पजा स्वरगतिगा अनि दरतितिगा अनि दरतिता अडिय अनि समुद्रता मन्ता (अनि ब्रंमान्डतिगा मन्ता) सबोय सृष्टि इदाम पाटांग ओयाना केन्जतान, “सिंहासनतिगा उदितोर अनि बेळा पिलाता धन्यवाद अनि आदर अनि महिमा अनि राज्य सबोय काळदे मनि।”

¹⁴ अनि नालुंगास प्रानिंग: “आमिन” इतुंग, अनि चोविस खास अदिकारि लोकुरक काल्क अरसुन आरादना कितुरक।