युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 4 - Muria Far Western

स्वरगतिगा मन्ता पोल्लोता बारेते युहन्नाल दर्शन हुळान्तोर

¹ इव पोल्लोता पजा नना दुसरो उन्दि दर्शन हुळतान। स्वरगतिगा उन्दि कवाळ तरियता मन्ता इदाम हुळतान; अनि पिपारिता लेंगदा लेहका नावासंग वळकतोर ओर पहलेटा लेंग नाकुन: “इगा पोरो वाय, अनि मुने वायिला आता ओव पोल्लोंग नना निकुन तोहका” इन्जोर आग्या हितुर।

² सान्डेय नना पवित्र आत्माता पुरा नियत्रणते आतान अनि स्वरगतिगा उन्दि सिंहासन हुळतान अनि ओद सिंहासनतिगा बोरे उदितोर हुळान्तोना।

³ ओद सिंहासनतिगा उदितोर ओर पकाय किमतिता यशब अनि माणिक्य पोरोयता कलदा चिजलेहका दिसन्दुर, अनि ओद सिंहासनता नालुंगास बासा पकाय किमतिता मरकत पोरोयता कलदा मान्जाना लेहका उन्दि इन्द्रधनुष्य मता।

⁴ ओद सिंहासनता नालुंगास बासा चोविस सिंहासन्क मतांग, अनि सिंहासन्कतिगा चोविस खास अदिकारि लोकुरक पान्डरि सन्दरा करस उदितोर, अनि ओरा तलापोरो सोनोता मुकुटक मता।

⁵ ओद सिंहासनताल विज अनि गुळजेमायाना पसियन्दु, अनि परमेस्वरना सात आत्मांग आन्दुंग किसता सात टिवरिंग सिंहासनता मुने पयटेमायिला आतांग।

⁶ अनि ओद सिंहासनता मुने बिलोरता लेहका काचता समुद्र मता। सिंहासनता नडुम अनि सिंहासनता नालुंगास बासा नालुंग प्रानिंग मतांग, अवेहना मुने परके कोन्डांगे कोन्डांग मतांग।

⁷ पहले प्रानि निराल लेहका मता, अनि दुसरो प्रानि टालाल पया लेहका मता, तिसरो प्रानिता चेहरा मानेयना चेहरा लेहका मता, अनि चवता प्रानि परियान्ता ओद गरुड पिटे लेहका मता।

⁸ नालुंगास प्रानिंगना सारुंग-सारुंग मारेकिंग मतांग, अनि ओव मारेकिंगनांग नालुंगास बासा अनि मारेकिंगनांग अडिय वने कोन्डांगे-कोन्डांग मतांग, अनि “इदेक मन्तोर अनि पहले मन्दुर अनि वायवाल मन्तोर ओर सबोयताल लाववाले प्रबु परमेस्वर पवित्र, पवित्र, पवित्र” इन्जोर ओव नरका-पलिंग आराम केवाय इदाम इन्जोर मन्तांग।

⁹ सबोय काळदे जितो मन्तोर सिंहासनतिगा उदितोर ओना बसके-बसके ओव प्रानिंग महिमा आदर अनि धन्यवाद कियानुंग,

¹⁰ असके चोविस खास अदिकारि लोकुरक सिंहासनतिगा उदवालना मुने अरसुन सबोय काळदे जितो मन्तोर ओन आरादना कियानुरक,

¹¹ “हे मावोर प्रबु, निमाय सबोय चिजक उत्पन्न किति अनि ओव सबोय नियाय इच्चाते तयार कितोन अनि उपजेह कितोन इन्जोर महिमा, आदर अनि लाव येताना निमाय योग्य मन्तोन इन्जोर वेहचुन ओरक आपुना-आपुना मुकुटक सिंहासनता मुने सोपे कितुरक।”