युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 3 - Muria Far Western

सरदिस सहेरता मसिलोकुरा सभा साटि सन्देश

¹ “सरदिस सहेरता मसिलोकुरा सभाता दूततुन इद कोटा: परमेस्वरना सात आत्मांग अनि सात हुकोंग मन्तोर ओर इदाम इन्तोर: नना निया बुतोंगतुन पुन्तोना, निकुन जितो इन्तोरक मति निमा हास मन्तोन।

² हुशार आम, अनि हायवाल मन्ता मिया पिसतांग पोल्लोंगतुन मजबुत किम, बाक्याकि निया बोदे बुतोंगतुन नावा परमेस्वरना मुने नना पुरा आयाना हुळोन।

³ इन्जोर ओरक निकुन केन्जिहता खरोय करिहाना अनि बदाम निमाट ओव पोल्लो येतितोन इन्जोर अलहा। ओद खरोय करहानातुन पालन किम अनि आपुना पापताल पस्तेमाम। अनि निमा हुशार मनवि आयकि ते नना कलेर लेहका वायका अनि बोद बेरा नना निया हेरे वायकान इन्जोर निमा पुनवि आयकि।

⁴ मति आप-आपुना सन्दरांग अशुद्ध केवोर हुचुलोर लोकुरक सरदिस सहेरता मसिलोकुरा सभातिगा मन्तोरक, ओरक पान्डरि सन्दरा करस नावासंग वलियानुरक, बाक्याकि ओरक इदेना योग्य मन्तोरक।

⁵ बोर जिकानुर ओर पान्डरि सन्दरा करहानुर, अनि नना ओना पोरोय जिवनता पुस्तकतिगाडाल बसकेय काटे केवोन आयका मति ओना पोरोय नावोर बाबो अनि ओना दूतकनांग मुने मानेमायका।

⁶ पवित्र आत्मा सबोय मसिलोकुरा सभातुन बाताल इन्ता अदेन पकाय ध्यानते केन्जुन सम्जेमाम्ट।”

फिलेदिलफिया सहेरता मसिलोकुरा सभा साटि सन्देश

⁷ “फिलेदिलफिया सहेरता मसिलोकुरा सभाता दूततुन इद कोटा: पवित्र अनि खरोय मन्तोर अनि दावुदना किल्लिंग आपुना कयदे मन्तोर अनि ओर तरियता कवाळतुन दुसरो बोरे बन्द किया परोर इदाम तरियान्तोर अनि ओर बन्द किता कवाळतुन दुसरो बोरे तरियला परोर इदाम बन्द किन्तोर ओर इव पोल्लोंग इन्तोर:

⁸ नना निया बुतोनुंग पुन्तोना, हुळा, नना निया मुने उन्दि कवाळ तरियस इरतोना, अदेन बोरे बन्द कियाला परोर, निया लावते हुचुन्सा मन्ता ते वने निमा नावा पोल्लोता पालन कितोन अनि नावा पोरोयता इन्कार केवि आति।

⁹ हुळा, यहुदिलोकुरक हिलेरक मति यहुदिलोकुरक आन्दुरक इदाम खोटाल वळकान्तोरक हुचुलोर लोकुरकुन नना सयतानना उपदेशता पालन केवालोरा दलताल ततका; ओरक वास निया काल्कपोरो अरानुरक अनि नना नियासंग मया किन्तोना इन्जोर ओरक पुन्दाना सन्दि नना बनेहकियाका।

¹⁰ परिक्षाता बेरा पोसोरिंग सहेनकिस मन्दिला पहाजे इन्जोर नावा पोल्लोतुन निमा पालन कितोन इन्जोर दरतितिगा मन्वालोरा परिक्षा कियान साटि दरतितिगा मन्तोर सबोय लोकुरा पोरो वायवाल मन्ता ओद परिक्षाता बेराते नना वने निकुन पिसहिच इरका।

¹¹ नना सान्डेय वायवाल मन्तोना, निया मुकुटतुन दुसरो बोरे उन्च ओयमाकिर इन्जोर नियागा मन्ता ओद खरोय विस्वासतुन हिमते पयस मन।

¹² बोर जिकानुर ओन नना नावा परमेस्वरना मन्दिरतिगा उन्दि खंबा बनेहकियाका, अनि अगडाल ओर असा बसकेय बाहरो पसियोर आयनुर, अनि नना नावा परमेस्वरना पोरोय अनि नावा परमेस्वरना हेरेटाल मन्जे स्वरगताल रयवाल मन्ता पुनाल येरुसलेम मन्ता नावोर परमेस्वरना सहेरता पोरोय अनि नावा पुनाल पोरोय ओना पोरो कोटका।

¹³ पवित्र आत्मा सबोय मसिलोकुरा सभातुन बाताल इन्ता अदेन पकाय ध्यानते केन्जुन सम्जेमाम्ट।”

लवुदिकिया सहेरता मसिलोकुरा सभा साटि सन्देश

¹⁴ “लवुदिकिया सहेरता मसिलोकुरा सभाता दूततुन इद कोटा: विस्वास योग्यवाले अनि खरोय गवाहदार मन्तोर अनि परमेस्वरना सृष्टिता राज केवाल मन्तोर आमिन पोरोयतोर इदाम इन्तोर।

¹⁵ नना निया बुतोंगतुन पुन्तोना; निमा दळिंगता हिलवि अनि कास्तोर हिलवि, निमा दळिंगता या कास्तोर मन्ज मनेन ते बेस आयार।

¹⁶ निमा दळिंगता हिलवि या कास्तोर हिलवि, निमा कोमट मन्तोन इन्जोर नना निकुन नावा टोडिताल पोरसवाल मन्तोना।

¹⁷ नना धनि मन्तोना अनि दनवान आतोना अनि नाकुन बोदे चिजता कमि हिले इन्जोर निमा इन्तोन मति निमा कम नशिब अनि तुच्च अनि गरिब अनि आन्दराल अनि भान्डाल मन्तोन इन्जोर पुनवि।

¹⁸ इन्जोर निमा दनवान आयान साटि किसते शुद्ध किता सोनो अनि निया भान्डालता लज्जा दिसमाकि इन्जोर पान्डरि सन्दरा अनि निकुन सोबाय दिसिला पहाजे इन्जोर कोन्डानिगा होकिला अन्जन नावाकेडाल असा इदाम नना निकुन सल्ला हिन्तोना।

¹⁹ नना मया किन्तोना ओरकुन नना रांगान्तोना अनि दन्ड हिन्तोना इन्जोर हलकायिते मन अनि पस्तेमाम।

²⁰ हुळा, नना कवाळ मुने नितस कवाळतुन कोहकिला आतोना, बोरे नावा लेंग केन्जचुन कवाळ तरयानुर ते नना ओना हेरे लोपा वास ओनासंग अनि ओर नावासंग जेवन कियानुर।

²¹ नना वने विजय आस आपुना बाबोनासंग ओना सिंहासनतिगा उदिता लेहका बोर जिकानुर ओन नना नावासंग नावा सिंहासनतिगा उदाना साटि अदिकार हियाका।

²² पवित्र आत्मा सबोय मसिलोकुरा सभातुन बाताल इन्ता अदेन पकाय ध्यानते केन्जुन सम्जेमाम्ट।”