युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 22 - Muria Far Western

अनन्त जिवनता नदि

¹ पजा सहेरता हरिता नडुम परमेस्वर अनि बेळा पिलाता सिंहासनताल पसियस पोंगता जिवन हिन्ता एता उन्दि पोंगता नदि स्वरगदूत नाकुन तोहतुर। ओद नदि काचता लेहका साप मता।

² नदिता इद पाकाळ अनि ओद पाकाळ बारा प्रकारता कायांग हादिन्ता जिवनता मरा मता, ओद मरा उन्दि उन्दि महिना अलग अलग प्रकारतांग कायांग हादिन्दुंग। अनि ओद मराता आकिते सबोय जातितोरक लोकुरा बिमार बेस आन्दुरक।

³ बोदे सराप असा मनो आयार, परमेस्वरना अनि बेळा पिलाता सिंहासन ओद सहेरतिगा मन्दार अनि ओनोरक दास ओरा सेवा कियानुरक।

⁴ ओरक ओना चेहरा हुळानुरक, अनि ओना पोरोय ओरा कपारक पोरो कोटता मन्दार।

⁵ असा नरका आयो आयार, प्रबु परमेस्वर ओरकुन वेळिचि हियानुर इन्जोर ओरकुन टिवरिता वेळिचि या पोळदता वेळिचिता जरुरि मनो आयार, अनि ओरक सबोय काळदे राज कियानुरक।

येसुना असा मलस वायाना

⁶ पजा स्वरगदूत नाकुन इतुर, “इव पोल्लोंग विस्वासयोग्य अनि खरोय मन्तांग। सान्डेय पुरा आयाना जरुरि मन्ता अव पोल्लोंग आपुना दास लोकुरकुन तोहिर इन्जोर परमेस्वरना पोल्लो वेहवालोरा आत्मांगता परमेस्वर मन्तोर ओर प्रबु आपुनोर स्वरगदूततुन लोहतुर।”

⁷ “हुळा, नना सान्डेय वायवाल मन्तोना। इद पुस्तकता परमेस्वरना सन्देश मानेमान्तोर ओर धन्य मन्तोर।”

⁸ इव पोल्लोंग केन्जिन्दुर अनि हुळन्दुर ओर नना युहन्ना आन्दान। नना केन्जतान अनि हुळतान असके पजा नाकुन इव पोल्लोंग तोहन्दुर ओर स्वरगदूतना आरादना कियान साटि ओना काल्कपोरो नना अरतान।

⁹ मति ओर नाकुन इतुर, “हुळा, इदाम केमा, बाक्याकि नना निया अनि परमेस्वरना पोल्लो वेहवाल नियोर तमोह लोकुरा अनि इद पुस्तकता पोल्लोनुंग मानेमायवालना संगतोर दास आन्दान। केवल परमेस्वरिन आरादना किम।”

¹⁰ पजा ओर नाकुन इतुर, “बेरा हेरे मन्ता इन्जोर इद पुस्तकता परमेस्वरना सन्देशता पोल्लोनुंग शिल किस बन्द केमा।

¹¹ खराब बुतो किन्तोर ओर असा खराबे बुतो किसोर मनिर, अपवित्र मन्तोर ओर असा अपवित्र बनेमासोरे मनिर, अनि परमेस्वरना मुने येताना योग्य बुतो केवालोरक असा परमेस्वरना मुने येताना योग्य बुतो किसोर मनिर, अनि पवित्र मन्तोर ओर असा पवित्र बनेमासोर मनिर।”

¹² “हुळा, नना सान्डेय वायवाल मन्तोना अनि सबोयना आपुना बुतोता अनुसार ओरकुन हियान साटि प्रतिफळ नावा हेरे मन्ता।

¹³ नना अलफा अनि ओमेगा, पहले अनि आकरि, सुरुवात अनि अन्त आन्दान।”

¹⁴ “जिवनता मराता कायांग तिन्दाना अदिकार पुटान साटि अनि पाटकताल सहेरता लोपा हन्दाना साटि आपुनांग सन्दरांग हुकान्तोरक ओर धन्य मन्तोरक।

¹⁵ मति नयक, अनि होदाह अनि व्यभिचारिंग अनि हव्कवालोरक अनि मूरति पुजा केवालोरक अनि खोटाल पोल्लोंग कियाना इच्चा केवाल अनि खोटाल वळकवाल इदाम खराब लोकुरक सहेरता बाहरो आयनुरक।”

¹⁶ “येसु पोरोयता नना मसिलोकुरा सभांग साटि मिकुन इव पोल्लोता गवाहि हियान साटि नावोर स्वरगदूततुन निया हेरे लोहतोना। नना दावुदना मूल अनि वंशज अनि कोर कुसेडा बेराता मान्जिन्ता हुको आन्दान।”

¹⁷ आत्मा अनि दुल्हि इवुरास इन्तांग, “वाय!”; अनि केन्जवाल वने, “वाय!” इन्जोर इनिर; एर उन्डावसता मन्ता ओर वायिर, अनि इच्चा मन्ता ओर जिवनता एर फुकोटते येतिर।

उपसंहार

¹⁸ इद पुस्तकता परमेस्वरना सन्देशता पोल्लोंग केन्जान्तोरक ओर सबोय लोकुरकुन नना चेतावनि हिन्तोना: इव पोल्लोतासंग बोरे मानेय बाताले विळहानुर ते इद पुस्तकतिगा कोटता मन्ता ओव पकाय तकलिपतुन परमेस्वर ओना पोरो लोहानुर।

¹⁹ अनि इद पुस्तकता परमेस्वरना पोल्लोतिगाडाल बोदे पोल्लो टन्डानुर ते इद पुस्तकतिगा वर्णन किता मन्ता ओद जिवनता मराताल अनि पवित्र सहेरताल ओना भाग परमेस्वर टन्डस वाटनुर।

²⁰ इव पोल्लोता गवाहि हिन्तोर “इंगो, नना सान्डेय वायवाल मन्तोना” इन्जोर ओर इन्तोर। आमिन। हे प्रबु येसु, वाय!

²¹ प्रबु येसु मसिना दया निमाट सबोय पवित्र लोकुरासंग मनि। आमिन।