युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 21 - Muria Far Western

पुनाल आबार अनि पुनाल दरति

¹ पजा नना उन्दि पुनाल आबार अनि पुनाल दरतितुन हुळतान, बाक्याकि पहलेटा आबार अनि पहलेटा दरति बदलेमातु, अनि बोदे समुद्र वने असा हिले आस मता।

² पजा पुनाल येरुसलेम मन्जे पवित्र सहेर आपुना मुजोन साटि सोबाय सजेमान्ता दुल्हि लेहका स्वरगताल परमेस्वरना हेरेटाल रयानपा नना हुळतान।

³ पजा नना सिंहासनताल इदाम पकाय जोरदे लेंगते इन्दानपा केन्जतान, “हुळा, मानेयना नडुम परमेस्वरना मन्डा। परमेस्वर ओरासंग मन्दानुर, अनि ओरक परमेस्वरनोर लोकुरक आयनुरक, अनि परमेस्वर ओरा परमेस्वर आस ओरासंग आपुनास मन्दानुर।

⁴ परमेस्वर ओरा कोन्डातांग कनेळक सबोय उमस वाटनुर, अनि इदेना पजा असा हामुर मनो आयार, अनि असा बोदे दुःख, किलाना अनि बोदे नोमुर मनो आयार बाक्याकि अव पहलेटा सबोय पोल्लोंग आतुंग।”

⁵ सिंहासनतिगा उदस मतोर ओर इतुर, “हुळा, नना सबोयतुन पुनाल किसिन्तोना।” पजा ओर इतुर, “कोटा, बाक्याकि इव पोल्लो विस्वासता योग्य अनि खरोय मन्तांग।”

⁶ असा ओर नाकुन इतुर, “इव सबोय पोल्लोंग पुरा आतांग। नना अलफा अनि ओमेगा, सुरवात अनि अन्त ननाय आन्दान। बोन एर उन्डा वसता मन्तोर ओन नना अनन्त जिवनता एता झरातिगाडाल फुकोटते एर हियाका।

⁷ विजय पुटहानुर ओरे इव सबोय चिजता वारिस आयनुर, अनि नना ओनोर परमेस्वर आयका अनि ओर नावोर मरि आयनुर।

⁸ मति वरियवालोर, अनि अविस्वासि लोकुरक, कपटि, अनि हव्कवालोरक, अनि व्यभिचारि लोकुरक, अनि होदाल बुतो केवालोर अनि मूरति पुजा केवालोर अनि सबोय खोटाल वळकवालोरा भाग किस अनि गंधकते पतियसोर मन्ता ओद तळायतिगा पुटार, इद दुसरो हामुर आन्दु।”

पुनाल येरुसलेम

⁹ पजा आकरिता सात पकाय तकलिपते निन्दितांग सात कटोरा मतांग ओर सात स्वरगदूतकनिगाडाल वरोर स्वरगदूत नावा हेरे वास नाकुन इतुर, “हिके वाय, नना निकुन बेळा पिलाता मुत्ते आयार ओद दुल्हिन तोहका” इन्जोर इतुर।

¹⁰ असके ओर नाकुन पवित्र आत्माता पुरा नियत्रणते उन्दि हजोर अनि ऊचो मटा पोरो ओतुर, अनि पवित्र सहेर येरुसलेम स्वरगताल परमेस्वरना हेरेटाले परमेस्वरना महिमातासंग रयानपा तोहतुर।

¹¹ अनि अदेना वेळिचि बगाय पुटो आता पकाय किमति बिल्लोर पोरोयता रत्न कल लेहका मता, अनि हिरवो अनि रेंगाल रंगतासंग मन्ता यशब पोरोयता पकाय किमति कल लेहका साप मता।

¹² अदेना दिवाल पकाय हजोर अनि ऊचो मता, अनि बारा पाटकिंग अनि पाटकिंगतिगा बारा स्वरगदूतक मतोरक अनि ओव पाटकिंग पोरो इस्रायेलोरा बारा गोत्रता पोरोयिंग कोटता मता।

¹³ पूरव दिशातिके मून्ड पाटकिंग, उत्तर दिशातिके मून्ड पाटकिंग, दक्षिण दिशातिके मून्ड पाटकिंग, अनि पश्चिम दिशातिके मून्ड पाटकिंग मतांग।

¹⁴ सहेरता भितिहकुन बारा पायवा मतांग, अनि अवेनपोरो बेळा पिलाता बारा खास चेला लोकुरा पोरोय कोटता मता।

¹⁵ नावासंग वळकिन्दुर ओर स्वरगदूतना हेरे सहेर अनि अदेना भाटककिनुंग अनि अदेना दिवालतुन काहान साटि उन्दि सोनोते बनेहकिता पट्टि मता।

¹⁶ ओद सहेर चवकोन मता ओद बचोन लाटि मता अचोने रुन्द मता, ओद पटिते काहतुर ते लगभग रन्ड हजार अनि रन्ड नुहक किलोमिटर मता, अदेना लाटि, अडाम अनि ऊचो सारकोय मता।

¹⁷ ओर अदेना गुटककुन काहतु; मानेयना काहना अर्थ स्वरगदूतना कयदे काहतुर ते उन्दि नुर चवरेचाळिस कयक मता।

¹⁸ अदेना गुटकिंग पकाय किमतवाले यशब पोरोयता रत्न कलते बनेमास मता, मान्जिन्ता काच लेहका मता शुद्ध सोनोते ओद सहेर बनेमास मता।

¹⁹ ओद सहेरता पायवाह सबोय प्रकारता पकाय किमति रत्न कलते सजेहकिस मतोर, पहले पायवा यशब पोरोयता हिरवो अनि निलमणि पोरोयता पकाय किमतवाले निळो रत्न कलते अनि दुसरो निळो रंगता पकाय किमतिवाले रत्न कलदे अनि तिसरो सबोय रंग मिसळेमाता लालडि पोरोयता पकाय किमतिवाले रत्न कलदे अनि चवतो मरकत पोरोयता पकाय किमति रत्न कलदे,

²⁰ अनि पान्चवो गोमेदक पोरोयता पकाय किमति रत्न कलदे अनि साहावो माणिक्य पोरोयता पकाय किमति रत्न कलदे अनि सातवो पितमणि पोरोयता पकाय किमति रत्न कलदे अनि आटवो पेरोज पोरोयता पकाय किमति रत्न कलदे अनि नवो पुखराज पोरोयता पकाय किमति रत्न कलदे अनि दाहावो लहसनिये पोरोयता पकाय किमति रत्न कलदे, अकरावो धूम्रकान्त पोरोयता पकाय किमति रत्न कलदे अनि बारावो याकूत पोरोयता पकाय किमति दयमुर रत्न कलदे मतांग।

²¹ बारा पाटकिंग पकाय किमति बारा मोतितांग मतांग, उन्दि उन्दि टाटरा पकाय किमतिता उन्दि उन्दि मोतिते बनेमास मता। सहेरता हरिंग साप काच लेहका शुद्ध सोनोता मतांग।

²² ओद सहेरतिगा परमेस्वरना मन्दिर नना हुळोन, बाक्याकि सबोय लाववाले प्रबु परमेस्वर अनि बेळा पिला अदेना मन्दिर आन्दुर।

²³ ओद सहेरतिगा पोळद अनि नलेंजता वेळिचिता जरुरि हिले, बाक्याकि परमेस्वरना मान्जानाते अगा वेळिचि आयिला आता अनि बेळा पिला अदेना टिवरि आन्दुर।

²⁴ दुनियातोर सबोय जातितोर लोकुरक ओना वेळिचितिगा ताकानुरक, अनि दरतितोर राजाह आपुना-आपुना धन संपति अगा ततानुरक।

²⁵ अदेना पाटकिंग पियाल बसकेय बन्द आयो आयनुंग, अनि अगा नरका आयो आयार।

²⁶ अनि सबोय जातितोर लोकुरक पकाय हजोर धनसंपति अनि आदर अगा ततानुरक।

²⁷ मति केवल बेळा पिलाता जिवनता पुस्तकतिगा पोरोय कोटता मन्ता ओर लोकुरक अगा दायनुरक। मति बोदे अपवित्र चिजक, लज्जाता बुतो अनि खराब बुतो केवालोरक बोरे अगा हनोर आयनुरक।