युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 20 - Muria Far Western

हजार वरसाता राज

¹ असके पजा वरोर स्वरगदूततुन स्वरगताल रयाना हुळतान, ओना कयतिगा अडिय बचोन खोल मन्ता इन्जोर माक पुनोम अचोन हजोर पतियता किसिता गडदाता टाटराता खिलि अनि उन्दि हजोर साकरी ओना कयदे मता।

² ओर ओद पकाय हजोर मासुल तरास अर्थ जुनाल तरासतुन-ओर इबिलिस अनि सयतान मन्तोर-पयस हजार वरसांग साटि दोहचितुर।

³ अनि ओद हजार वरसा पुरा आयानवनाह अलग-अलग जातितोर लोकुरकुन असा भळकेह केमाकिर इन्जोर अदेन अडिय बचोन खोल मन्ता इन्जोर माक पुनोम अचोन हजोर गडदातिगा वाटस अदेना पाटक बन्द किसितुर, अनि अदेन पोरो शिल हितुर। इदेना पजा अदेन हुडुक बेरा साटि असा लेहचिविर इन्जोर जरुरि मन्ता।

⁴ पजा नना सिंहासन्क हुळतान, अनि ओव सिंहासन्कतिगा उदितुरक लोकुरकुन न्याय कियाना अदिकार हिस मतोर। अनि येसुना गवाहिता अनि परमेस्वरना पोल्लोता कारण तला असक मतोरक अनि ओद जानवरता अनि अदेना मूरतिता आरादना केवोर अनि अदेना शिक्का आपुना कपारक पोरो अनि कयकनिगा येतोर आसि ओरा आत्मातुन वने नना हुळतान। ओरक जितो आस हजार वरसावनाह मसिनासंग राज कितुरक।

⁵ हातोरिगाडाल बाकि लोकुरक इव हजार वरसा पुरा आयोंग अचोनवनाह असा जितो आयोरक।

⁶ इद हातोर लोकुरा पहलेटा असा जिवेमास तेदाना आन्दु। इद पहलेटा असा जिवेमास तेदानातिगा सहभागि मन्तोरक ओरक धन्य अनि पवित्र मन्तोरक। ओरा पोरो दुसरो हायानाता बाताले अदिकार हिले, मति ओरक परमेस्वर साटि अनि मसिहा साटि याजक लोकुरक आयनुरक अनि मसिनासंग हजार वरसांगवनाह राज कियानुरक।

परमेस्वर सयतानतुन अनन्तकाळता दन्ड हिन्तोर

⁷ हजार वरसा पुरा आयनुंग असके सयतानतुन कयदिताल तासियानुर।

⁸ अनि ओर दरतिता नालुंगास बासा मन्ता सबोय जातितोर लोकुरकुन अर्थ गोग अनि मागोग जातितुन भळकेह किस लळायि कियाला जमा कियान साटि पसियनुर। ओरा संख्या समुद्र हेरेटा टकाता वारु लेहका इचोन पकाय मन्ता।

⁹ सयतानोर सयनिक सबोय दरतितिगा फयलेमास पवित्र लोकुरा मन्दाना जागा अनि प्रिय सहेरता सबोयबासा घेरा आयनुरक; मति स्वरगताल किस रयस ओरकुन नाश कियार।

¹⁰ ओरा भळकेह केवाल सयतानतुन, ओद जानवर अनि आपुनास परमेस्वरना पोल्लो वेहवाल आन्दोम इदाम खोटाल इन्वाल वने मन्तोरक ओद किस अनि गंधकता तळायतिगा वाटसितुर, अगा अनि ओरक नरका-पलिंग सबोय काळदे पकाय पिळाते तळपेमासोर मन्दानुरक।

दुनियाता सबोय लोकुरा आकरि न्याय

¹¹ असके पजा नना उन्दि हजोर पान्डरि सिंहासन अनि अदेन पोरो वरोर उदितोर हुळतान, ओना मुनेटाल दरति अनि आबार बदले मात, अनि अवेहकुन असा बसकेय हुळोन।

¹² पजा नना हुडलोर-हजोर इदाम सबोय हातोरकुन सिंहासनता मुने नितितोर हुळतान। अनि पुस्तक तरियहतुर, अनि जिवनता पुस्तक पोरोयता असा दुसरो उन्दि पुस्तक वने तरियहतुर, अनि ओव पुस्तकतिगा कोटता मता अदामे ओरा बुतोता अनुसार हातोरा न्याय कितुर।

¹³ असके समुद्र आपुनिगाडाल हातोर मानेयकुन बाहरो तासितु, हायाना अनि हातोर लोकुरा मन्दाना जागा इव आपुनिगाडाल हातोरकुन बाहरो तासितुंग, अनि ओरानिगाडाल सबोयकुन आपुना आपुना बुतोता अनुसार ओरा न्याय किहितुर।

¹⁴ हामुर अनि हातोर लोकुरा मन्दाना जागातुन किसता तळायतिगा वाटसितुर। इद किसता तळाय दुसरो हामुर आन्दु।

¹⁵ अनि जिवनता पुस्तकतिगा बोना पोरोय कोटो ओन किसता ओद तळायतिगा वाटसितुर।