युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 2 - Muria Far Western

इफिसुस सहेरता मसिलोकुरा सभा साटि सन्देश

¹ “इफिसुस सहेरता मसिलोकुरा सभाता दूततुन इद कोटा: सात हुकोंग आपुना तिन्दान कयतिगा पयस टिवरि इराना सोनाता ओव सात गोटातांग नडुम वलियान्तोर इदाम इन्तोर:

² नना निया बुतोंग, अनि निया मेहनत, अनि निया पोसोरिंगे सहेन कियाना पुन्तोना; अनि निमा खराब लोकुरकुन सहेन किया परवि, अनि येसु मसिना खास चेलालोरक आयोर ते वने आपुनतुन येसु मसिना खास चेलालोरक इदाम खोटाल इन्वालोर लोकुरकुन परिक्षा किस ओरक खोटाल इदाम समजेमातोरिट।

³ अनि पकाय तकलिप सहेन किस मन्दाना हिमत नियागा मन्ता, अनि नावा पोरोय साटि पकाय तकलिप सहेन किसोर मतोरिट ते वने अवकेमायविट इन्जोर नना पुन्तोना।

⁴ मति निया मसि विस्वासता सुरुवाते मिया मन्दिगा नावासंग अनि मसि विस्वासि लोकुरासंग मता निया पहलेटा लेहका मया तासिसितोन इन्जोर नाकुन निया विरुद इन्दाना मन्ता।

⁵ इन्जोर निमा बचोन ऊच पोरोडाल अडिय अरतोन इन्जोर अलहा, अनि पस्तेमाम अनि निया मसि विस्वासता सुरुवाते परमेस्वरना मुने किता अदे बुतोंग असा किम। निमा पस्तेमायवि आयकि ते नना निया हेरे वास टिवरि इरा निया गोटातुन अदेना जागाताल गुचिहचिका।

⁶ ते वने निमा निकलाव्य दलतोरा बुतोता होंग किन्तोन इदाम उन्दि सोबाय पोल्लो नियागा मन्ता, ओरा बुतोतुन नना वने विरोद किन्तोना।

⁷ पवित्र आत्मा मसिलोकुरा सभातुन बाताल इन्ता अदेन पकाय ध्यानते केन्जुन सम्जेमाम्ट, बोर जिकानुर ओन स्वरगतिगा परमेस्वरना बगिचातिगा मन्ता अनन्त जिवा हेवाल मरातिगाडाल काया तिन्दिला हियाका।”

स्मुरना सहेरता मसिलोकुरा सभा साटि सन्देश

⁸ “स्मुरना सहेरता मसिलोकुरा सभाता दूततुन इद कोटा: पहले अनि अन्तिम मन्तोर, अनि हास मतोर मति इदेक असा जिवेमास तेदितोर इन्तोर:

⁹ नना निया पकाय तकलिप अनि गरिबितुन पुन्तोना। मति निमा धनि मन्तोन। अनि आपुनतुन यहुदि इन्तोरक मति ओरक यहुदि हिलेर, मति सयताना उपदेशतुन मानेमान्तोर ओरा निन्दातुन वने पुन्तोना।

¹⁰ निकुन सहेन कियाना मन्ता ओद पकाय तकलिपता बारेते निमा वरियमा। बाक्याकि हुळाट, मिया परिक्षा आयि इन्जोर सयतान मियागाडाल हुचुलोर लोकुरकुन जेहलतिगा वाटवाल मन्तोर; अनि मिकुन दहा दियांगवनाह पकाय तकलिप मन्दार। ओरक मिकुन हव्काना परिस्थिति वायकि ते वने विस्वासते मन्ट, ते नना मिकुन अनन्त जिवनता मुकुट हियाका।

¹¹ पवित्र आत्मा सबोय मसिलोकुरा सबोय सभातुन बाताल इन्ता अदेन पकाय ध्यानते केन्जुन सम्जेमाम्ट। विजय आयनुर ओन दुसरो हायानाताल बोदे तकलिप आयो आयार।”

पिरगमुन सहेरता मसिलोकुरा सभा साटि सन्देश

¹² “पिरगमुन सहेरता मसिलोकुरा सभाता दूततुन इद कोटा: पकाय होळता रन्ड धारवाले तलवार मन्तोर इदाम इन्तोर:

¹³ निमा बगा मन्तोन अगा सयताना सिंहासन मन्ता इन्जोर नना पुन्तोना; ते वने निमा नावा पोरोयतिगा स्थिर मन्तोन, अनि सयतान राज किन्तोर मिया मन्दाना ओद जागातिगा मिया नडुम नावोर विस्वासयोग्य साक्षि अन्तिपासतुन हव्कतुरक ओद बेरा वने नावागा मन्ता निया विस्वास तासोन।

¹⁴ मति नाकुन निया विरुद हुचुक पोल्लोंग इन्दाना मन्ता; बाक्याकि इस्रायेल लोकुरकुन मूरतिहकुन चळेहकिता चिजक तिनिर अनि व्यभिचार केविर इदाम ओरा खरोय विस्वास तासिविर इन्जोर बालाकतुन करहिच हितोर ओर बिलामना करहानातुन मानेमान्तोरक हुचुलोरक लोकुरक निया हेरे मन्तोरक।

¹⁵ अदामे निकलाव्य लोकुरा करहानातुन मानेमान्तोरक हुचुलोरक निया हेरे मन्तोरक।

¹⁶ इन्जोर पस्तेमाम; आयोते नना निया हेरे सान्डेय वास नावा टोडिता तलवारते ओरासंग लळायि कियाका।

¹⁷ पवित्र आत्मा सबोय मसिलोकुरा सभातुन बाताल इन्ता अदेन पकाय ध्यानते केन्जुन सम्जेमाम्ट। विजय आयनुर ओन नना स्वरगतिगा मकता मन्नातिगाडाल हियाका, अनि ओन उन्दि पान्डरि कल वने सम्मान हियाका, अनि ओद कलतिगा उन्दि पुनाल पोरोय कोटता मन्दार, अदेन पुटिहवालना शिवाय दुसरो बोरे ओद पोरोय पुनोर आयनुर।”

तुयाथिरा सहेरता मसिलोकुरा सभा साटि सन्देश

¹⁸ “तुयाथिरा सहेरता मसिलोकुरा सभाता दूततुन इद कोटा: पतियता किसिता ज्वाला लेहका कोन्डांग अनि पान्डरि पितळी लेहका काल्क मन्तांग परमेस्वरनोर मरि वेहिन्तोर:

¹⁹ नना निया बुतोंग, निया मया अनि विस्वास अनि सेवा अनि पोसोरिंग सहेन कियाना अनि निया आकरि किता बुतो पहले किसोर मतोन अदेनताल वने पकाय हजोर आतोन इदाम पुन्तोना।

²⁰ मति आपुनास परमेस्वरना पोल्लो वेहवाल आन्दान इदाम खोटाल वळकस व्यभिचार कियाना अनि मूरतिहना मुने चळेहकिता चिजक तिन्दान साटि वने नावोर दासकुन करहिस भळकेह किन्ता इसाबेल पोरोयता आळदुन निमा परवांगि हितोन इदाम निया विरुद उन्दि दोष इन्दाना मन्ता।

²¹ नना अदेन आपुना व्यभिचार तासि पस्तेमायान साटि सन्दि हितान, मति पस्तेमायाना साटि अदेना इच्चा हिले।

²² हुळा, नना अदेन पकाय बिमारिता पकाय तकलिपते हुन्जिस इरान्तोना, अनि अदेनासंग मन्ता व्यभिचारता बारेते पस्तेमायोर आयनुरक ते नना अदेनासंग व्यभिचार कितोर सबोय लोकुरकुन वने पकाय तकलिपते वाटका।

²³ नना अदेना बालकुन वने हव्कस वाटका, असके नना मन्दा सोचविचारतुन पुनवाल आन्दान इन्जोर सबोय मसिलोकुरा सभांग पुन्दानुंग अनि नना मियागाडाल सबोयजनकुन आप-आपुना बुतोंगता अनुसार प्रतिफळ हियाका।

²⁴ मति तुयाथिरा सहेरतिगा इसबेलना उपदेशतुन मानेमायोरक अनि ‘सयतान तोहता पकाय हजोर मकता पोल्लो’ इदाम हुचुलोर लोकुरक इन्तोर इसबेलना करहानातुन करिहविट मियागा बाकि लोकुरा पोरो असा दुसरो वजा वाटोन आयका इन्जोर नना मिकुन वेहान्तोना।

²⁵ मति मियागा मन्ता खरोय विस्वास नावा असा मलस वायानवनाह हिमते पयस मनिर इन्जोर नना आग्या हिन्तोना।

²⁶ बोर जिकानुर अनि नना आग्या किता बुतोतुन आकरिवनाह पालन किसोर मन्तोर ओरकुन नावोर बाबाल नाकुन अदिकार हितोर लेहका नना वने ओन दुनियाता सबोय देशता लोकुरकनिगा अदिकार हियाका।

²⁷ अनि ओर कचिता राजदण्ड पयस दुनिया सबोय देशता लोकुरकनिगा राज कियानुर अनि ओरक कुंभारना तोळियता भान्डांग चुरा आन्तांग अदामे ओर ओरकुन चुरा कियानुरक।

²⁸ अनि नना ओन झुंजुरका बेराता हुको हियाका।

²⁹ आत्मा मसिलोकुरा सबोय सभातुन बाताल इन्ता अदेन पकाय ध्यानते केन्जुन सम्जेमाम्ट।”