युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 19 - Muria Far Western

स्वरगतिगा मन्वालोरक परमेस्वरना स्तुतिता पाटांग ओन्तोरक

¹ असके पजा स्वरगतिगा हजोर भीळता पकाय जोरदा लेंग लेहका इदाम इन्दाना केन्जतान, “हालेलूया! पिसाना अनि महिमा अनि लाव मावोर परमेस्वरनाय मन्ता।

² बाक्याकि व्यभिचारते दरतितुन खराब किन्दु ओद हजोर वेश्यान परमेस्वर न्याय कितोर अनि आपुना दास लोकुरा नतुरता बदला किस अदेनापोरो बदला येतितोर इन्जोर ओना न्याय खरोय अनि बराबर मन्ता।”

³ ओरक असा दुसरोबेरा वने पकाय जोरदे इतुरक, “हालेलूया! अदेनताल पोरो हन्जोरिंग पोयसोर मन्दाना पोयाना सबोय काळदे पोयसोर मन्दार” इन्जोर इतुरक।

⁴ असके चोविस खास अदिकारि लोकुरक अनि नालुंगास प्रानिंग, “आमिन! हालेलूया!” इदाम इन्ज सिंहासनतिगा उदस मतोर ओर परमेस्वरना मुने अरस ओना आरादना कितुर।

बेळा पिलाता मरमिंग

⁵ असके, “मावोर परमेस्वरना सबोय दासक अनि ओन वरियवालोरक सबोय हुडलोर अनि हजोर लोकुरे निमाट परमेस्वरना स्तुति किम्ट” इदाम इन्दाना उन्दि लेंग सिंहासनताल केन्जतान।

⁶ पजा नना पकाय लोकुरा भीळता लेंग लेहका अनि पकाय पोंगान्ता एता लेंग लेहका शब्द अनि पकाय हजोर गुळजेमायाना लेंग लेहका जोरदा उन्दि लेंग केन्जतान, “हालेलूया! सबोय लाववाले मावोर प्रबु परमेस्वर राज किन्तोर।

⁷ इन्जोर वराट, माक गिरदा किस ओना महिमा कियाकाट, बाक्याकि बेळा पिलाता मरमिंग अवता अनि ओना दुल्हि आपुनतुन तयार किता।

⁸ अदेन शुद्ध अनि मान्जता पकाय सोबाय पान्डरि सन्दरांगते बनेकिता खास सन्दरांग कराना अदिकार हितोर।” (ओद पकाय सोबाय पान्डरि खास सन्दरांग अर्थ पवित्र लोकुरा परमेस्वरना मुने येताना योग्य बुतोंग आन्दु।)

⁹ असके पजा ओर स्वरगदूत नाकुन इतुर, “बेळा पिलाता मरमिंगना जेवनतिगा केयतोर ओरक धन्य मन्तोरक इदाम कोटा” इन्जोर इतुर। “इव परमेस्वरना खरोय पोल्लोंग आन्दुंग” इन्जोर वने इतुर।

¹⁰ अनि नना ओन आरादना कियान साटि ओना काल्क पोरो अरतान असके ओर नाकुन इतुर, “हुळा, इदाम केमा, नना निया लेहका अनि निया हेलाळ-दादाह लेहकाय येसुना बारेता गवाहि हेवाल वरोर दास मन्तोना; केवल परमेस्वरिन आरादना किम। येसुना गवाहि परमेस्वरना पोल्लो वेहवाल आत्मा आन्दु” इन्जोर इतुर।

पान्डरि कोडाते हनवाल

¹¹ असके पजा स्वरग तरियता इदाम नना हुळतान, अनि नावा मुने उन्दि पान्डरि कोडा दिसतु अनि ओद कोडापोरो वरोर उदितोर, ओन विस्वासयोग्य अनि खरोयवाले इदाम पोरोय इन्तोरक, अनि ओर खरोयते न्याय अनि लळायि किन्तोर।

¹² ओनांग कोन्डांग पकाय पयटेमाता किसता लेहका आन्दुंग, अनि ओना तलापोरो पकाय राजमुकुट मन्तांग, ओना पोरो उन्दि पोरोय कोटता मन्ता ओद पोरोय ओना तासि दुसरो बोरे पुनोर।

¹³ ओर नतुरतिगा आहचता कुरता करतोर, अनि ओना पोरोय परमेस्वरना पोल्लो इन्जोर आन्दु।

¹⁴ स्वरगतोर सयनिक साप अनि पकाय सोबाय पान्डरि सन्दरांगते बनेकिता शुद्ध अनि खास सन्दरांग करस पान्डरि कोडापोरो उदस ओना परके-परके ताकिन्दुर।

¹⁵ सबोय जातितोरक लोकुरकुन कदियस वाटिलाय ओना टोडिताल उन्दि पकाय होळता तलवार पसियन्दु। ओर कचिता राजदण्ड पयस ओरागा राज कियानुर, वरोर मानेय अंगुरता घनितिगा अंगुरतुन विसान्तोर लेहका ओर ओना विरोदि लोकुरकुन नाश किन्तोर। ओरा हजोर पापता कारण पकाय होंगते मन्तोर ओर परमेस्वरिन साटि ओर इदाम किन्तोर।

¹⁶ “राजाहनोर राजाल अनि प्रबुनोर प्रबु” इदाम पोरोय ओना कुरता पोरो अनि पोटरि पोरो कोटता मन्ता।

¹⁷ पजा नना वरोर स्वरगदूत पोळदपोरो नितितोर हुळतान। ओर आबारता नडुमताल परियन्दुंग ओव सबोय पिटेनुंग पकाय जोरदे केयस इतुर, “परमेस्वरना हजोर जेवन साटि वाट,

¹⁸ निमाट राजाहना हविंग, अनि सयनिक लोकुरा मुक्या अदिकारिहना हविंग अनि लाववाले मानेयकना हविंग अनि कोडाहना अनि कोडाहनापोरो उदवालोरा हविंग अनि स्वतन्त्र अनि दासक, हुडलोरक, हजोर इदाम सबोय लोकुरा हविंग तिन्दिलाय जमा आम्ट।”

¹⁹ पजा विस्वासयोग्य अनि खरोयवाले इदाम पोरोयतोर पान्डरि कोडापोरो उदवालोर अनि ओना सयनिकसंग लळायि कियान साटि ओद जानवर अनि दरतितोर राजालोरक अनि ओरा सयनिक लोकुरक उन्दि आस जमा आयाना नना हुळतान।

²⁰ ओद पहलेटा जानवर अनि ओद जानवरतासंग अदेना मुने चमत्कारता बुतोंग किस लोकुरकुन भळकेह किस पहलेटा जानवरता शिक्का येतिहलाय अनि अदेना मूरतितुन आरादना किहितोर मन्तोर आपुनास परमेस्वरना पोल्लो वेहवाल आन्दोम इदाम खोटाल वेहवाल ओद दुसरो जानवरिन पयतुर। अनि ओरक इवुरासिन बन्दकिस गंधकते पतिन्ता ओद किसता तळायतिगा जितोय वाटसितुर।

²¹ पिसतोर लोकुरक पान्डरि कोडापोरो उदवालना टोडिताल पसियता तलवारते हव्कतुर अनि ओरा हवि सबोय पिटेंग तिन्ज अवेहना पोटा पन्जतु।