युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 18 - Muria Far Western

बाबिलोनता नाश

¹ इदेना पजा नना हजोर अदिकार मन्ता वरोर स्वरगदूततुन स्वरगताल रयाना हुळतान अनि ओना महिमाते दरति मान्जतु।

² ओर पकाय जोरदे इतुर, “ ‘नाश आतु! हजोर बाबिलोन सहेर नाश आतु!’ ओद दुष्टात्माता लोन, अनि सबोय अशुद्ध आत्माता सोबाय मन्दाना जागा, अनि सबोय अशुद्ध अनि खराब पिटेनांग सोबाय मन्दाना जागा आस मता।

³ बाक्याकि सबोय जातितोर लोकुरक अदेनासंग व्यभिचार कितुरक इन्जोर परमेस्वर पकाय होंगते मन्तोर; अनि दरतितोर राजालोर अदेनासंग व्यभिचार कितोरक, अनि अदेन पकाय सुख-विलासते मन्दान साटि दरतितोर व्यापारि लोकुरकताल पकाय किमतिता चिजक असोर मन्दु अदाम ओरक अदेना कारण पकाय दनवान आतोरक।”

⁴ पजा असा दुसरो उन्दि शब्द स्वरगताल इन्दाना नना केन्जतान, “हे नावोर लोकुरक, अदेना पापतिगा सहभाग आयमाकिर अनि अदेना पकाय तकलिपतिगा बोदे तकलिप मियागा वायमाकि इन्जोर निमाट अदेनताल लक हन्ट।

⁵ बाक्याकि आबारतुन बोयताप ढगि लेहका अदेना पाप पकाय मन्ता, अनि अदेना खराब बुतोंगतुन परमेस्वर इदेक दन्ड कियान साटि तयार मतोर।

⁶ ओद मियासंग बदाम वेवहार हितुर अदामे अदेनासंग वने वेवहार हिम्ट, अनि अदेना बुतोता अनुसार अदेन डब्बल बदला हिम्ट, ओद बोद रितिते मिकुन पकाय तकलिप हितु अदे रितिते अदेना डब्ल अदेन पकाय तकलिप किम्ट।

⁷ ‘नना रानि आतोना रान्डि आयो, अनि दुःखते बसकेय अरोन आयका’ इदाम ओद आपुना मन्दिगा डरा इन्ता। ओद बचोन आपुनास डरा किस बचोन सुख भोगेमातु अचोन अदेन पकाय तकलिप अनि दुःख हिम्ट।

⁸ इद कारणते हायाना, दुःख अनि दुष्काळ इदाम अदेना पकाय तकलिप उन्दि दिया अदेना पोरो वास आयनुंग। अदेना न्याय केवाल प्रबु परमेस्वर लाववाले मन्तोर इन्जोर अदेन परमेस्वर पकाय दन्ड हियानुर।” अदेन किसतिगा इरस पकाय सबोय पयटेकियानुर।

सबोय लोकुरक बाबिलोनता बारेते किलान्तोरक

⁹ अदेनसंग व्यभिचार किस सुख भोगे मातुरक दरतितोर राजालोरक अदेन पकाय तकलिपता कारण लक नितस अदेन हजोर दन्ड किस किसतिगा पयटेकियाना पोयाना हुळानुरक असके अदेन साटि किलानुरक अनि चाति कोहक्स इदाम इन्दानुरक:

¹⁰ “अरेरे! हजोर सहेर बाबिलोन, पकाय लाववाले सहेर, गन्टामेटेय निया दन्ड निकुन पुटता बहे।”

¹¹ दरतितोर व्यापारी लोकुरक अदेन साटि किलानुरक अनि दुःख कियानुरक बाक्याकि इदेक बोरे अदेना मोमाना चिजक असोर आयनुरक।

¹² अदेना मोमाना चिजक इव मन्तांग-सोनो, चान्दि, पकाय किमतवाले रत्न, पकाय किमतवाले मोति अनि पकाय सोबाय पान्डरि सन्दरांगते बनेकिता मलमल पोरोयता सन्दरांग अनि पकाय किमतवाले लेन्डि रंगता सन्दरांग, पकाय किमतवाले रेशमि पोरोयता सन्दरांग अनि पकाय रेंगाल रंगतांग सन्दरांग, अनि सबोय प्रकारता दयमुरवाले मराक, अनि हाथिना किसांगते बनेहकिता सबोय प्रकारता चिजक अनि पकाय किमति मराक अनि पितरी अनि कचि अनि संगमरमर पोरोयता पकाय सोबाय कल्कने बनेहकिता सबोय प्रकारता चिजक,

¹³ अनि दालचिनि पोरोयता पकाय किमतिवाले दवा साटि मन्ता दयमुर तेल, सबोय प्रकारता मसालांग, धुप, दयमुर निय, लोबान, अंगुर जोमा, निय, मयदा, पिन्डि, टालाल-बुळगाह, बोकळाह-हरेंग, कोडांग, रथ अनि दास, अनि मानेयना जिवा इदाम चिजक मतांग। इदेक अदेना इदाम चिजक बोरे अदेना मोमोर आतुरक।

¹⁴ “हे बाबिलोन निया जिवा इच्चा किता सबोय सोबाय चिजक निकुन तासिस हतांग, निया सबोय सुख अनि धनसंपतिता हजोरपण वने नेन्ड हिले आसि अनि इदेक असा बसकेय निकुन पुटोंग आयनुंग आतुंग।”

¹⁵ इव चिजकना व्यापार किस अदेना द्वारा दनवान आस मतोरक व्यापारि लोकुरक अदेना पकाय तकलिपता कारण वरेते लक नितानुरक अनि किलसोर पकाय जोरदे इन्दानुरक:

¹⁶ “अरेरे! हजोर सहेर, पकाय सोबाय पान्डरि सन्दरांगते बनेकिता मलमल पोरोयता सन्दरांग अनि लेन्डि रंगता पकाय किमतवाले सन्दरांग, पकाय किमतिवाले रेशमि पोरोयता सन्दरांग अनि पकाय रेंगाल रंगतांग सन्दरांग पोन्डस मता, अनि सोनो अनि पकाय किमतिता रत्न अनि मोतिते सजेमास मता हजोर सहेर, हुळाट इचोन हजोर धन गन्टामेटेय नाश आतु बहे” इदाम दुःखते किलानुरक।

¹⁷ पजा जहाजतोर सबोय मुक्याल लोकुरक अनि जहाजते हन्दाना-वायाना किन्तोरक अनि मल्लांग अनि समुद्रता भरोसाते जिवे मान्तोरक ओरक सबोय लोकुरक लक नितितुरक।

¹⁸ अनि अदेना पोताना पोयाना हुळस दुःख किस जोरदे इन्दानुरक, “ओद हजोर सहेरता लेहका दुसरो बोदे सहेर हिले”।

¹⁹ अनि ओरक आपुना-आपुना तलापोरो डुन्डो वाटस, “अरेरे! समुद्रतोर सबोय जहाजवालेंग आपुना धन्दाता द्वारा दनवान आस बनेमतोरक इद हजोर सहेर गन्टामेटेय अदेना नाश आतु,” इन्जोर किलसोर अनि दुःख किस जोरदे इन्दानुरक।

²⁰ “हे स्वरग गिरिदा किम्ट! अनि पवित्र लोकुरे अनि येसु मसिना खास चेलालोरे अनि परमेस्वरना पोल्लो वेहवालोर लोकुरे गिरिदा किम्ट! परमेस्वर अदेन मिया साटि बदला येचुन अदेन न्याय कितुर बहे।”

²¹ पजा वरोर लाववाले स्वरगदूत हजोर जताता लेहका अचोन बेहरा उन्दि कल ताहच इदाम इन्ज समुद्रतिगा हरचितुर, “इदाम हजोर सहेर बाबिलोनतुन हजोर लावते हरचिहयानुर, अनि ओदेन बसकेय दिसो आयार।”

²² वीणा नेकिहवालोरक अनि पाटांग ओयवालोरक अनि बासरि नेकिहवालोरक अनि पिपारि उहकवालोरकना लेंग असा बसकेय नियागा केन्ज वायो आयार अनि बोदे चिजतोर कारागिर वने अनि कला असा बसकेय नियागा पुटोर आयनुर, अनि चक्किता नेकानाता शब्द असा बसकेय नियागा केन्ज वायो आयार।

²³ अनि टिवरिता वेळिचि असा बसकेय नियागा मान्जो आयार, अनि दुलहाल अनि दुल्हिना शब्द असा बसकेय नियागा केन्ज वायो आयार, नियोर व्यापारी लोकुरक दरतितोर मुक्याल मतोरक अनि निया अळहानाते सबोय जाति भळकेमास मतांग।

²⁴ परमेस्वर बाबिलोनिन दन्ड हितुर बाक्याकि परमेस्वरना पोल्लो वेहवालोरकुन अनि दुसरो सबोय पवित्र लोकुरकुन ओद हव्कतु, इंगो! दरतितिगा हव्कतोर सबोय लोकुरा नतुर बाबिलोनतिगा हुळतुर।