युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 17 - Muria Far Western

जानवरता पोरो उदिता हजोर वेश्या आळ

^1-2 असके परमेस्वरना कोपते निदस मतांग सात कटोरांग मन्तांग सात स्वरगदूतकनिगाडाल वरोर नावा हेरे वास नाकुन इदाम इतुर, “हिके वाय, दरतितोर राजालोरक व्यभिचार किस अदेना व्यभिचारता दाळंगोते दरतितिगा मनवालोरकुन ओचिहता पकाय एता पोरो उदिता ओद हजोर वेश्याता दन्ड नना निकुन तोहका” इन्जोर इतुर।

³ असके ओर स्वरगदूत नाकुन पवित्र आत्माता पुरा नियत्रणते किस वारु पल्लातिगा ओतुर, असके सात तलांग अनि दाहा कोहक मतांग परमेस्वरना निन्दा कियाना पोरोयते निन्दस मता पकाय रेंगाल रंगता उन्दि जानवर पोरो उदिता उन्दि आळदुन नना हुळतान।

⁴ इद आळ लेन्डि कायाता रंग अनि पकाय रेंगाल रंगता सन्दरा पोन्डस मता, अनि सोनो अनि पकाय किमति हिरांग अनि मोतिंगने सजेमास मता। अनि अदेना व्यभिचारता अशुद्धि अनि खाराब बुतोंगते निन्दस मता सोनोता उन्दि कटोरा अदेना कयतिगा पयस मता।

⁵ अनि अदेना कपार पोरो, हजोर बाबिलोन, वेश्यांगता अनि दरतितांग खराब बुतोंगता अवहारि इदाम पोरोय कोटता मता।

⁶ पवित्र लोकुरा नतुर अनि येसुना गवाहलोरा नतुर उन्ज ओद आळ होच मता इदाम नना हुळतान अनि अदेन हुळस नना पकाय आश्चरय आतान।

⁷ असके ओर स्वरगदूत नाकुन इतुर, “निमा बाक्या आश्चरय आतोन? इद आळदा अनि ओद आळतुन कान्जिन्ता ओव सात तलांग अनि दाहा कोहक मन्तांग ओद जानवरता वने मकता पोल्लो नना निकुन वेहान्तोना।

⁸ निमा हुळतोन ओद जानवर ओद पहले मता मति इदेक हिले अनि अडिय बचोन खोल मन्ता इन्जोर माक पुनोम अचोन हजोर पतियता किसिता गडदाताल वायवाल काळते पसियस अनन्त काळता नाश साटि वायवाल मन्ता; अनि ओद जानवर पहले मता मति इदेक हिले ते वने ओद वायवाल मन्ता ओद जानवरतुन दरतिता सृष्टिता सुरुताले जिवनता पुस्तकतिगा पोरोय कोटोर आतुरक दरतितोर लोकुरक ओद जानवरतुन हुळस चकेमायनुरक।

⁹ इगा ग्यानता बुतो मन्ता, अव सात तलांग ओद आळ उदिता सात मटाक आन्दुंग।

¹⁰ अनि ओव तलांग सात राजाह वने आन्दुरक, सयुरक हातुरक, अनि वरोर इदेक पिसतोर, अनि वरोर इदेकवनाह वायोरे, अनि ओर वायनुर ते हुडुक बेरावनाह मन्दाना वने ओना जरुरि मन्ता।

¹¹ पहले मता अनि इदेक हिले ओद जानवर आटवो राजाल अनि ओर सात राजाहनिगाडाल वरोरे मन्तोर; अनि ओर नाशतिगा दान्तोर।

¹² निमा हुळतोन ओव दाहा कोहक दहा राजाह आन्दुरक; ओरक इदेकवनाह राज कियाना अदिकार पुटो मति ओद जानवरतासंग हुडुक बेरा साटि ओरकुन राजहान लेहका अदिकार पुटहानुर।

¹³ येरक सबलोर उन्दि मन आयनुरक अनि ओरक आपुना आपुना लाव अनि अदिकार ओद जानवरतुन हियानुर।

¹⁴ ओरक बेळा पिलातासंग लळायि कियानुरक, मति ओर प्रबुलोरा प्रबु अनि राजालोरा राजाल आन्दुर इन्जोर बेळा पिला आपुनासंग मन्तोरक ओर केयतोर मन्तोरक अनि आचतोर मन्तोरक अनि इमानदारि लोकुरासंग ओरिगा विजय आयनुर।”

¹⁵ ओर स्वरगदूत नाकुन असा इतुर, “निमा हुळति अनि वेश्या उदिता ओद एर, लोकुरक अनि भीळक अनि अलग-अलग जातितोरक अनि अलग-अलग बोलि वळकवालोरक आन्दुरक।

¹⁶ निमा हुळति ओद दाहा कोहक अनि जानवर ओद वेश्यातासंग दुश्मनि किस अदेनिकेडाल सबोय उन्दस अदेन भान्डिय तासियानुर, अनि अदेना हविंग तिन्दानुर अनि अदेन किसतिगा पोतहानुर।

¹⁷ बाक्याकि परमेस्वरना पोल्लो पुरा आयानावनाह आपुना इच्चा पुरा कियाना अनि उन्दि मन आस आपुना आपुना राज जानवरतुन हिसिविर इन्जोर परमेस्वर ओरा मन्दिगा बुतो कितुर।

¹⁸ निमा हुळतोन ओद आळ, दरतितोर राजाहना पोरो राज किन्ता हजोर सहेरेय आन्दु।”