युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 16 - Muria Far Westernपरमेस्वरना कोपता सात कटोरांग 1 असके पजा “हन्ट, परमेस्वरना कोपता सात कटोरानुंग दरतितिगा मुळिहचिम्ट” इन्जोर उन्दि हजोर लेंग मन्दिरतिगाडाल सात स्वरगदूतकुन इन्दाना नना केन्जतान। 2 अनि पहले स्वरगदूत हन्जुन परमेस्वरना कोपते निदस मतांग आपुना कटोरा दरतितिगा मुळीहचितुर। असके समुद्रताल पसियस वाता पहलेटा जानवरता शिक्का बोना पोरो मता अनि बोर ओना मूरतिता आरादना किन्दुरक ओरा पोरो पकाय तकलिप अनि पकाय नोमुरता किर पसियतु। 3 दुसरो स्वरगदूत परमेस्वरना कोपते निदस मतांग आपुना कटोरा समुद्रतिगा मुळीहचीतुर, अनि ओद समुद्र हातोर मानेयना नतुर लेहका बनेमातु, अनि समुद्रतिगा मतांग ओव सबोय जिवांग हातुंग। 4 तिसरो स्वरगदूत परमेस्वरना कोपते निदस मतांग आपुना कटोरा नदिंग अनि एता झरांग पोरो मुळिहचितुर, अनि ओव नतुर बनेमातुंग। 5 असके एता पोरो अदिकार मन्ता स्वरगदूत इदाम इन्दाना नना केन्जतान, “इदेक मन्तोर अनि पहले मन्दुर अनि पवित्र मन्तोन, निमा इदाम खरोय न्याय कितोन इन्जोर खरोय मन्तोन। 6 बाक्याकि ओरक पवित्र लोकुरक अनि परमेस्वरना पोल्लो वेहवालोरा नतुर पोंगिहिच मतोरक इन्जोर निमा ओरकुन नतुर उहति, ओरक अदेन योग्य मन्तोरक।” 7 पजा नना बलिवेदिताल इद शब्द केन्जतान, “इंगो, हे सबोय लाववाले प्रबु परमेस्वर, निया न्याय बराबर अनि खरोय मन्ता।” 8 चवतो स्वरगदूत परमेस्वरना कोपते निदस मतांग आपुना कटोरा पोळदपोरो मुळीहचितुर, असके मानेयकुन अदिते पयटेकियाना अदिकार अदेन हितुर। 9 मानेयक पकाय अदिते कासतुर, असके इदाम तकलिपता पोरो अदिकार मन्ता परमेस्वरना पोरोयता निन्दा कितुरक सिवायि ओरक परमेस्वरना महिमा कियाना या आपुना पापताल पस्तेमायोर आतुरक। 10 पान्चवो स्वरगदूत परमेस्वरना कोपते निदस मतांग आपुना कटोरा ओद जानवरता सिंहासनपोरो मुळीहचितुर, असके ओना राज्यतिगा पकाय आन्दार आतु। 11 लोकुरक पकाय नोमुरता कारण आपुना-आपुना वन्जेर कसकिला लागतुरक। अनि आपुना नोमुर अनि किरकना कारण स्वरगतोर परमेस्वरना निन्दा कितुरक ते वने आपुना आपुना खराब बुतोता बारेते पस्तेमायाना इच्चा केवोरक आतुरक। 12 साहावो स्वरगदूत परमेस्वरना कोपते निदस मतांग आपुना कटोरा युफरातेस पोरोयता हजोर नदितिगा मुळिहचीतुर, अनि पूरव दिशातोर राजाह साटि हरि तयार आयि इन्जोर अदेना एर वतित। 13 पजा ओद पकाय हजोर मासुल तरासता टोडिताल, अनि पहलेटा जानवरता टोडिताल, अनि आपुनास परमेस्वरना पोल्लो वेहवाल आन्दोम इदाम खोटाल वळकवाल दुसरो जानवरता टोडिताल मून्ड दुष्टात्मांगनुंग पन्नेता रुपते पसियाना नना हुळतान। 14 इव सबोय दुनियाता राजाहना सबोयताल लाववाले परमेस्वरना हजोर दियाता लळायि साटि जमा केविर इन्जोर अत्भुत चमत्कारता चिन्ह तोहचुन ओरक ओरा हेरे पसियस दान्तांग दुष्टात्मांग आन्दुंग। 15 “हुळा, नना कलेर लेहका वान्तोना, आपुना लज्जा लोकुरक हुळमाकिर इदाम भान्डाल वलियमाकिर इन्जोर आपुना सन्दराता चवकसि किस तयारिते केपसोर मन्तोर ओर धन्य मन्तोर।” 16 अनि अव दुष्टात्मांग सबोय राजाल अनि ओरा सयनिक लोकुरकुन इब्रानि बोलिते हर-मगिदोन इन्तोरक ओद जागातिगा जमा कितु। 17 सातवो स्वरगदूत परमेस्वरना कोपते निदस मतांग आपुना कटोरा वळियपोरो मुळिहचितुर असके “इद पुरा आतु” इन्जोर मन्दिरता सिंहासनताल पकाय जोरदे उन्दि लेंग वातु। 18 असके विजक मान्जतुंग अनि पकाय जोरदा लेंग अनि गुळजेमायाना अनि दरतितिगा मानेयना उत्पति आता असकेडाल इदेकवनाह आयवाय मता इदाम उन्दि हजोर भुकंप आतु। 19 हजोर सहेर मन्जे बाबिलोन मून्ड भाग आतुंग, अनि सबोय जातितोर सहेरक अरतुंग अनि परमेस्वरना पकाय होंगदा जोमा मन्ता कटोरा बाबिलोनतुन उहिर इन्जोर हजोर बाबिलोनतुन परमेस्वर खास आल्हितुर। 20 अनि समुद्र नडुम मन्ता सबोय टापुंग दिसो आतुंग अनि मटाक वने जागाता पल्ला लेहका आतुंग। 21 आबारताल लगभग पन्चेचाळिस-पन्चेचाळिस किलोतांग पकाय हजोर अदुहता पिर मानेयकना पोरो अरतुंग, हजोर अदुहता पिरता तकलिप पकाय भयानक मता इन्जोर लोकुरक परमेस्वरना निन्दा कितुरक। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.