युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 15 - Muria Far Western

विजयि लोकुरा पाटांग

¹ असके पजा हजोर अनि अत्भुत दुसरो उन्दि चिन्ह नना स्वरगतिगा हुळतान, अर्थ आकरिता सात पकाय तकलिप कयदिगा मतोरक ओर सात स्वरगदूतक अगा मतोरक। ओव पकाय तकलिपतासंग परमेस्वरना पकाय हजोर होंग कोपता वने अन्त आयार।

² असके किस मिलेमाता काच लेहका उन्दि समुद्र नना हुळतान, अनि पहलेटा जानवर पोरो अनि ओना मूरति पोरो अनि ओना पोरोयता संख्या पोरो विजय आस मतोरक परमेस्वरना पिपारितुन पयस काचता समुद्रता हेरे नितितोरक नना हुळतान।

³ ओरक परमेस्वरनोर दास मूसाना पाटा अनि बेळा पिलाता पाटा ओस-ओस इदाम ओतुरक, “हे सबोय लाववाले प्रबु परमेस्वर, निया बुतोंग हजोर अनि अत्भुत मन्ता, हे सबोय जातितोर राजा, निया हरि परमेस्वरना मुने येताना योग्य अनि खरोय मन्ता।

⁴ हे प्रबु, निकुन बोर वरियोर अनि निया पोरोयता महिमा केवोर आयनुर? बाक्याकि केवल निमाय पवित्र मन्तोन। सबोय निया न्यायता बुतो तोहतांग इन्जोर सबोय जातितोर लोकुरक वास निया मुने आरादना कियानुरक।”

⁵ इदेना पजा स्वरगता मन्दिर अर्थ पवित्र तम्बुतुन तरियतुर इदाम नना हुळतान।

⁶ अनि सात पकाय तकलिप कयदिगा मतोरक ओर सात स्वरगदूतक मान्जतांग पकाय सोबाय पान्डरि सन्दरांगते बनेकिता मलमल पोरोयता शुद्ध सन्दरांग करस छातितिगा सोनोता नुलदे बनेकिता सन्दराता दुपटा दोहच मन्दिरताल पसियतुरक।

⁷ असके नालुंग प्रानिंगनिगाडाल उन्दि जानवर सबोय काळ साटि जितो मन्तोर परमेस्वरना कोपते निदस मतांग सात सोनोता कटोरांग सात स्वरगदूतकुन हितुर।

⁸ अनि परमेस्वरना महिमा अनि ओना लावता कारण मन्दिर पोयानाते निन्दित, अनि ओरक सात स्वरगदूतकना सात पकाय तकलिप मारनावनाह बोरे मन्दिरतिगा हन्दिला परोर आतुरक।