युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 14 - Muria Far Western

बेळा पिला अनि उन्दि लाक चवरेचाळिस हजार लोकुरक

¹ असके पजा नना सियोन मटा पोरो बेळा पिलाल अनि ओनासंग ओरा कपारकपोरो ओना पोरोय अनि ओना बाबोना पोरोय कोटता मता उन्दि लाक चवरेचाळिस हजार लोकुरकुन नना हुळतान।

² अनि पकाय पोंगाता एता पकाय सनसनाटा लेंग लेहका अनि पकाय गुळजेमान्ता लेंग लेहका स्वरगताल उन्दि पकाय हजोर लेंग नना केन्जतान, अनि नना केन्जतान ओद लेंग वीणा नेकिहवालोरक वीणा नेकिहला आतोर लेंग लेहका मता।

³ ओरक सिंहासनता मुने अनि नालुंगास प्रानिंग अनि चोविस खास अदिकारि लोकुरा मुने उन्दि पुनाल पाटा ओन्दुर। दरतिताल अस तच मतोरक ओरक उन्दि लाक चवरेचाळिस हजार लोकुरकुन तासिस, बोरे ओद पाटातुन ओयिला परोर आन्दुरक।

⁴ येरक कुवाराह मन्तोरक इन्जोर आळदासंग मेन्दुलता संबन्द केवोरक। बगाय बेळा पिला दान्तोर ओरक ओना परके दान्तोरक मति येरकुन परमेस्वर साटि अनि बेळा पिला साटि पहले काया आयान साटि मानेयनिकेडाल अस ततोर आन्दुरक।

⁵ ओरा टोडिताल बसकेय खोटाल पोल्लो पसियो, ओरक निरदोष मतोरक।

मुवुर स्वरगदूतक

⁶ पजा असा दुसरो वरोर स्वरगदूत आबारता नडुमतिगा परयाना नना हुळतान, ओना हेरे दरतितिगा मनवालोर सबोय जातितोरक, अनि गोत्र अनि अलग-अलग बोलि वळकवालोरक अनि लोकुरकुन वेहान साटि परमेस्वरना सोबाता पोल्लोता सबोय काळ साटि मन्ता सन्देश मता।

⁷ ओर पकाय जोरदे इतुर, “परमेस्वरतुन वरयाट अनि ओना महिमा किम्ट, बाक्याकि ओना न्याय कियानाता बेरा अवता, अनि सबोय आबार अनि दरति अनि समुद्र अनि एता झरांग बनेहकितोर ओना आरादना किम्ट।”

⁸ पजा असा दुसरो वरोर स्वरगदूत इदाम इन्जोर वातुर, “नाश आता, आपुना व्यभिचारता दाळंगो सबोय देशतुन उहता ओद हजोर बाबिलोन नाश आता” इन्जोर इतुर।

⁹ असके पजा तिसरो स्वरगदूत ओरा परके वास हजोर लेंगदे इदाम इतुर, “बोरायि ओद समुद्रतिगाडाल पसियस वाता पहलेटा जानवर अनि ओना मूरतिता पुजा केविर अनि आपुना कपारक पोरो या आपुना कयपोरो ओना शिक्का येतविर,

¹⁰ ते ओर परमेस्वरना कोपता कटोराताल बाताले मिसरेह केवो परमेस्वरना पकाय अरसता दाळंगो उन्डिला पहाजे, ओर मानेयतुन पवित्र स्वरगदूतक अनि बेळा पिलाता मुने किसते अनि गंधकते पकाय तकलिप आयार।

¹¹ ओरा पकाय तकलिपता पोयाना सबोय काळदे पोयसोर मन्दार। अनि समुद्रतिगाडाल पसियस वाता जानवर अनि ओना मूरतिता आरादना किन्तोरक अनि बोर ओना पोरोयता शिक्का येतान्तोर ओरकुन नरका-पियाल ओरा पकाय तकलिपताल बाताले आराम पुटो आयार।”

¹² परमेस्वरना आग्या मानेमान्तोर पवित्र लोकुरा पोसोरिंग सहेनकियाना अनि येसुनिगा मन्ता विस्वास इगा जरुर मन्ता।

¹³ पजा नना स्वरगताल उन्दि शब्द केन्जतान, “कोटा: इदेकताल प्रबुना विस्वासते हातोरक हायवालोरक, धन्य मन्तोरक।” “इंगो! ओरकुन आपुना मेहनताल इदेक आराम पुटार बाक्याकि ओरा बुतोंग ओरासंग मन्ता” इन्जोर पवित्र आत्मा इन्तोर।

दरतिता फसलतुन कोयाना

¹⁴ पजा आबारता उन्दि पान्डरि ढगि अनि ओद ढगि पोरो मानेयतोर मरि लेहका वरोर मानेय ओना तलापोरो सोनोता मुकुट अनि कयतिगा पकाय होळता हटाळ पयस उदितोर नना हुळतान।

¹⁵ पजा असा दुसरो वरोर स्वरगदूत मन्दिरताल पसियस आबारता ढगि पोरो उदस मतोर ओन पकाय जोरदे इतुर, “कोयाना बेरा अवता इन्जोर निया हटाळते कोयस फसलतुन जमा किम बाक्याकि दरतिता फसल पन्डता।”

¹⁶ आबारता ढगि पोरो उदस मतोर ओर आपुना हटाळ दरतितिगा लोहतुर दरतितिगा फसलतुन कोयतुर।

¹⁷ पजा असा वरोर स्वरगदूत स्वरगतिगा मन्ता ओद मन्दिरताल पसियतुर, अनि ओना वने कयते पकाय होळता हटाळ मता।

¹⁸ पजा किस पोरो अदिकार मता वरोर स्वरगदूत बलिवेदितिगाडाल पसियतुर अनि पकाय होळता हटाळ मता ओन इतुर, “दरतिता अंगुरक पन्डतांग इन्जोर निया पकाय होळता हटाळते दरतिता अंगुरता कायाता झोकानुंग कोया” इन्जोर जोरदे इतुर।

¹⁹ असके ओर स्वरगदूत आपुना हटाळ दरतितिगा हरचितुर अनि दरतिता अंगुरता कायानुंग कोयस परमेस्वरना कोपता हजोर घानातिगा वाटसितुर।

²⁰ अनि सहेरता बाहरो मन्ता घानातिगा अंगुरकुन ओयकस जोमा टन्डतुर। अनि घानातिगाडाल कोडाहना लगामवनाह नतुर पसियस अनि नुर कोसवनाह पोंगस हतु।