युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 13 - Muria Far Western

समुद्रताल उन्दि जानवर पसियान्ता

¹ असके नना उन्दि जानवरतुन समुद्रताल पसियानपा हुळतान, अदेन दाहा कोहक अनि सात तलांग मतांग। अदेना कोहकपोरो दाहा राजमुकुट अनि अदेना तलांग पोरो परमेस्वरना निन्दाता पोरोयिंग कोटस मतोर।

² नना हुळतान ओद जानवर चित्ता लेहका मता, अनि अदेना काल्क अळजालता काल लेहका अनि टोडि निरालता टोडि लेहका मता। पकाय हजोर मासुल तेरास आपुना लाव अनि सिंहासन अनि पकाय अदिकार अदेन हितुर।

³ ओद जानवरता तलाहनिगाडाल उन्दि तलापोरो हानाहका पकाय हजोर घाव आता लेहका नना हुळतान, पजा जानवरता हानाहका पकाय हजोर ओद घाव बेस आतु, अनि दरतितोर सबोय लोकुरक आश्चरय किसोर ओद जानवरता परके-परके हतुरक।

⁴ ओद जानवरतुन आपुना अदिकार हिस मतोर इन्जोर लोकुरक पकाय हजोर मासुल तरासतुन आरादना कितुरक अनि “इद जानवर लेहका बोर मन्तोर? बोर इदेनासंग लळायि किया परान्तोर?” इदाम इन्ज जानवरता वने आरादना कितुरक।

⁵ गमन्डता हजो-हजोह पोल्लोंग वळकान साटि अनि परमेस्वरना निन्दा कियान साटि अदेन उन्दि टोडि हितुर, अनि बेचाळिस महिनांगवनाह बुतो कियाना अदिकार अदेन हितुर।

⁶ ओद परमेस्वरना निन्दा कियाना सुरु कितु। ओद परमेस्वरना पोरोय अनि ओना मन्दाना जागाता अनि स्वरगतिगा मनवालोरा निन्दा कितु।

⁷ पवित्र लोकुरासंग लळायि किस ओरकुन जिकिर इन्जोर अदेन अदिकार हितुर, अनि सबोय गोत्र अनि लोकुरक अनि अलग-अलग बोलि वळकवालोरा पोरो अनि सबोय जातिता पोरो अदेन अदिकार हितुर।

⁸ दुनियाता उत्पतिता बेराताल असकता बेळा पिलाता जिवनता पुस्तकतिगा पोरोय कोटोर दरतितोर सबोय लोकुरक ओद जानवरता आरादना कियानुरक।

⁹ बोनांग बाताल केन्जान्तोरिट अदेन पकाय ध्यानते केन्जुन सम्जेमाम्ट।

¹⁰ “कयदितिगा हनवाल मन्तोर ओर कयदितिगा दायनुर; तलवारते हव्कानुर ओर तलवारतेय हायनुर।” पवित्र लोकुरा पोसोरिंग सहेनकियाना अनि विस्वास इगाय जरुरि पहाजे।

दरतिताल असा दुसरो उन्दि जानवर पसियान्ता

¹¹ असके पजा दुसरो उन्दि जानवरतुन दरतितिगाडाल पसियाना नना हुळतान, अदेन बेळाना लेहका रन्ड कोहक मतांग, अनि ओद पकाय हजोर मासुल तरास लेहका वळकिन्दु।

¹² ओद समुद्रताल पसियस वाता पहलेटा जानवरता मुने वास अदेना सबोय अदिकार तोहतु। ओर दरति अनि दरतितिगा मन्वालोर सबोय लोकुरकुन हानाहका पकाय हजोर घाव बेस आस मतांग ओद पहले जानवरता आरादना किहितुर।

¹³ ओद मानेयना मुने स्वरगताल दरतितिगा किस अरिहच वने हजो-हजोह चिन्ह तोहन्दु।

¹⁴ पहलेटा जानवरता मुने तोहान साटि परवांगि पुटता ओव चिन्हता द्वारा ओद दुसरो जानवर दरतितिगा मनवालोरकुन भळकेह किन्दुर। अनि तलवारते घाव आतु ते वने असा जितो आता ओद पहलेटा जानवरता मूरति बनेहकिम्ट इन्जोर ओद दुसरो जानवर दरतितिगा मनवालोरकुन इन्दुर।

¹⁵ अनि पहलेटा जानवरता मूरतितुन जिवा स्वास हियाना अदिकार दरतिताल पसियता दुसरो जानवरतुन पुटतु। असके पहलेटा जानवरता मूरतितुन वळकिला लाव पुटि अनि जानवरता इद मूरतितुन आरादना केवोर लोकुरकुन हव्कस वाटिर इदाम आग्या हितु।

¹⁶ ओद हुडलोर-हजोर, दनवान-गरिब, स्वतन्त्र-दास इदाम सबोय लोकुरा तिन्दान कय या ओरा कपार पोरो उन्दि उन्दि शिक्का येतिला पहाजे इदाम ओद दुसरो जानवर सबोय लोकुरकुन जबरदस्ति कितु।

¹⁷ अनि ओद पहलेटा जानवरता पोरोय या पोरोयता संख्या शिक्का किस पुटतोर तासिस दुसरो बोरे असाना-हियाना किया परोर आयनुरक।

¹⁸ इगा ग्यानता जरुरि मन्ता। बुद्धि मन्तोर ओर इद जानवरता संख्या जोळे किस समजेमायिर, बाक्याकि ओद उन्दि मानेयना संख्या मन्ता, अनि ओना संख्या सारुंग नुहक साहसट मन्ता।