युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 12 - Muria Far Western

आळ अनि पकाय हजोर मासुल तरास

¹ पजा स्वरगतिगा उन्दि हजोर चिन्ह दिसतु: पोळदतुन मुच मता उन्दि आळ अनि अदेना काल्क अडिय नलेन्ज अनि अदेना तलापोरो बारा हुकोंगता उन्दि मुकुट मता।

² ओद मेन्दुलते मता, अनि बारतपन आयाना नोमुरुते ओद पकाय किलतु।

³ स्वरगतिगा असा उन्दि चिन्ह दिसतु: हुळाट, सात तलांग अनि दाहा कोहक अनि तलांग पोरो सात राजमुकुट मतांग किसता रेंगाल रंगता उन्दि पकाय हजोर मासुल तरास,

⁴ अदेना तोकार आबारता हुकोता तिसरोता उन्दि भागतुन पिळिंगस दरतितिगा वाटसित। बारतपन आयाना ओद आळ बारतपन आतु, सान्डे अदेनोर नोनान तिन्दान साटि ओद मासुल तरास ओद आळदा मुने नितित।

⁵ पजा ओद आळ सबोय देशतोर लोकुरकुन कचिता डन्ड पयस मन्जे सबोय अदिकारते राज्य कियानुर वरोर पेकान जनमा हितु, ओर पेकाल परमेस्वरना हेरे अनि ओना सिंहासनतिगा सान्डे ताहतुर।

⁶ अनि आळ वारु पल्लातिगा वितित अगा ओद उन्दि हजार रन्ड नुहक साट दियांगवनाह संभाले कियालाय इन्जोर परमेस्वर तयार कितोर उन्दि जागा अदेना साटि मन्ता।

⁷ पजा स्वरगतिगा लळायि आतु; मुक्याल स्वरगदूत मीखायिल अनि ओनासंग परमेस्वरना सेवा किन्तोरक स्वरगदूतक ओद हजोर मासुल तरासतासंग लळायि कियान साटि पसियतुर। अनि ओद हजोर मासुल तरास अनि ओनोर दूतक ओनासंग लळायि कितुरक।

⁸ मति ओद हजोर मासुल तरास अनि ओनोर दूतक हारेमातुंग अनि स्वरगतिगा ओरा साटि असा जागा मनो आत।

⁹ अनि सबोय दुनियातुन भळकेह केवाल इबिलिस या सयतान इदाम पोरोयतोर ओद पकाय हजोर मासुल तरासिन अर्थ ओद जुनाल तरासिन दरतितिगा अरिहचितुर अनि ओनोर दूतकुन वने ओनासंग अरिहचितुर।

¹⁰ असके स्वरगताल उन्दि हजोर लेंग इदाम इन्दाना नना केन्जतान: “इदेक मावोर परमेस्वरना पिसाना अनि लाव अनि राज्य अनि ओना मसिना अदिकार सुरु आता, बाक्याकि मावोर हेलाळ-तमोहकुन नरका-पलिंग मावोर परमेस्वरना मुने ओरागा दोष लावे किन्दुर ओर दोष लावे केवालिन दरतितिगा अरिहचितोर।

¹¹ ओरक बेळा पिलाता बलिदानता नतुरता कारण अनि आपुना वेहता परमेस्वरना पोल्लोता कारण ओर दोष लावे केवालिन जिकतुरक। अनि ओरक हायाना साटि वने वरियोर आतुरक।

¹² इन्जोर स्वरगाह, अनि स्वरगाहतिगा मनवालोरक गिरदा किम्ट। अनि जागा अनि समुद्र मिकुन पकाय तकलिप आयार! बाक्याकि सयतान ओना साटि केवल हुडुन्साय बेरा पिसता मन्ता इन्जोर पुन्ज पकाय होंगदे मिया हेरे रयस वातोर।”

¹³ नाकुन दरतितिगा अरिहचितोर इन्जोर पकाय हजोर मासुल तरास हुळतुर असके नोनान जनमा हिस मता ओद आळदुन सतेह कियाना सुरु कितुर।

¹⁴ असके ओद आळदुन वारु पल्लातिगा परियस अवि इन्जोर हजोर गरुडतांग रन्ड मारेकिंग हितुर, पकाय हजोर मासुल तरास अदेन पयमा इन्जोर अगा परमेस्वर अदेन साळेमून्ड वरसांग पालन-पोषण कितुर।

¹⁵ अनि पकाय हजोर मसुल तरास ओद आळदुन पोंगिहवि इन्जोर अदेना परके आपुना टोडिताल नदि लेहका एर पोंगिहतुर।

¹⁶ मति दरति ओद आळदुन मदत कितु, अनि पकाय हजोर मासुल तरासता टोडिताल पोंगिहच मता ओद नदितुन दरति आपुना टोडि तरियस उन्ज वाटतु।

¹⁷ असके ओद पकाय हजोर मासुल तरास आळदा पोरो पकाय होंग आतु, अनि परमेस्वरना आग्यातुन मानेमान्दुर अनि येसुना गवाहि हियान साटि स्थिर मन्तोर अदेना पिसतोर सन्तानतासंग लळायि कियान साटि हतुर।

¹⁸ अनि ओद पकाय हजोर मासुल तरास समुद्र हेरेटा टकाता वारुतिगा हन्ज नितितुर।