युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 11 - Muria Far Western

इवुर गवहालोरक

¹ असके पजा नावा कयदिगा नापेकियाना उन्दि बळगा हितुर, ओद बळगा वदुरता मता। अनि स्वरगताल केन्जता लेंग नाकुन इदाम इतुर, “तेदा परमेस्वरना मन्दिर अनि बलिवेदितुन काहा अनि अगा आरादना केवालोरकुन गिन्दि किम।

² मति मन्दिरता बाहरोटा डुवारतुन काहवाय तासिसिम, बाक्याकि ओद यहुदि आयोर लोकुरकुन हितोर, बाक्याकि ओरक पवित्र सहेर येरुसलेमतुन बेचाळिस महिनांगवनाह ओवकानुरक।

³ ओव दियांग नना नावोर इवुर गवाहलोरकुन अदिकार हियाका, अनि लोकुरा पापता कारण माक पकाय दुःखते मन्तोरोम इदाम तोहान साटि बेळाना कल्कते बनेकिता सन्दरा करस उन्दि हजार रन्ड नुहक साट दियांगवनाह परमेस्वरना पोल्लो वेहानुर” इन्जोर इतुर।

⁴ ओरक दरतिता प्रबुना मुने नितितोरक रन्ड जयतुन मराक अनि टिवरिंग इराना रन्ड गोटांग आन्दुरक।

⁵ बोरे ओरकुन पकाय तकलिप हियाना इच्चा कियानुर ते ओरा टोडिताल किस पसियस ओरा दुश्मनकुन नाश किन्ता, अनि बोरे ओरकुन पकाय तकलिप हियाना इच्चा कियानुर ते जरुर इदे रितिते हायिला पहाजे।

⁶ परमेस्वरना पोल्लो वेहाना ओरा दियांगते पिर अरमाकि इन्जोर आबारतुन बन्द कियानाता अदिकार ओरकुन मन्ता, एता नतुर कियानाता अदिकार ओरकुन मन्ता अनि ओरा इच्चा आयार असके दरितितिगा सबोय प्रकारता तकलिप हियानाता अदिकार वने ओरकुन मन्ता।

⁷ ओरक आपुना गवाहि पुरा कियानुर असके अडिय बचोन खोल मन्ता इन्जोर माक पुनोम अचोन हजोर पतियता किसिता गडदाताल पसियार ओद जानवर ओरासंग लळायि किस ओरकुन जिकानुर अनि ओरकुन हव्कस वाटनुर।

⁸ अनि आलंगारिक रुपते सदोम अनि मिस्र इन्तोरक ओव हजोर सहेरता हरितिगा ओरा मुरदांग अरस मन्दानुंग। अनि ओद सहेरतिगा मन्ता ओरा प्रबुन कुरुस पोरो अन्जिहच हव्कस मतोरक।

⁹ सबोय लोकुरक, गोत्र, अनि अलग-अलग बोलि वळकवालोरक, अलग-अलग जातितोर लोकुरक ओरा मुरदातुन साळेमून्ड दियांग हुळानुरक, अनि ओरा शवतुन बिजगुडितिगा इरिला हेवोर आयनुर।

¹⁰ दरतितिगा मनवालोर लोकुरक ओरा हायानाते पकाय गिरदा कियानुरक। अनि उत्सव किस वरोर दुसरोना हेरे भेट लोहनुर, बाक्याकि परमेस्वरना पोल्लो वेहवालोरक येरक इवुरास दरतितिगा मनवालोरकुन अचोन तकलिप हिस मतोरक।

¹¹ मति साळेमून्ड दियाना पजा परमेस्वरनिकेडाल जिवनता स्वास ओरागा होळियतु अनि ओरक आपुना काल्कना लावते नितितुरक अनि ओरकुन हुळवालोरक पकाय वरे आतु।

¹² असके पजा “इगा पोरो वाट!” इन्जोर जोरदे इन्दाना उन्दि लेंग स्वरगताल केन्जतुरक, इद केन्जचुन ओरा दुश्मनकुन ओरकुन हुळसोर मतोरक असके ओरक आबारता ढगि पोरोते स्वरगतिगा हतुर।

¹³ ओदे बेरा उन्दि हजोर भुकंप आतु, अनि सहेरता दहावोता उन्दि भाग अरतु, अनि ओद भुकंपते सात हजार मानेयक हातुरक, अनि पिसतुर ओरक वरियसुन स्वरगता परमेस्वरना महिमा कितुरक।

¹⁴ दुसरो पकाय तकलिप मारतु; हुळाट, तिसरो पकाय तकलिप सान्डेय वायवाल मन्ता।

सातवो पिपारि

¹⁵ सातवो स्वरगदूत आपुना पिपारि नेकिहतुर असके दुनियाता राज्य मावोर प्रबुना अनि ओना मसिना आता, अनि ओर सबोय काळदे राज कियानुर इन्जोर स्वरगतिगा उन्दि हजो-हजोह लेंग आतुंग।

¹⁶ असके परमेस्वरना मुने सिंहासनतिगा उदस मतोर चोविस खास अदिकारि लोकुरक हन्जुन कोडवारेकिस परमेस्वरतुन नमस्कार कितुर अनि ओरक परमेस्वरना आरादना किसोर इतुरक,

¹⁷ “हे सबोयताल लाववाले प्रबु परमेस्वर, इदेक मन्तोर अनि मुने मतोर निमा मन्तोन, निमा आपुना हजोर लावदे राज कियाना सुरु कितोन इन्जोर माक निया धन्यवाद किन्तोरोम।

¹⁸ अलग-अलग जातितोर लोकुरक होंग कितुरक, मति इदेक निया होंगता बेरा वातु। अनि हातोरा न्याय कियाना अनि परमेस्वरना पोल्लो वेहवाल नियोर दासक, अनि परमेस्वरना मुने येताना योग्य बुतो केवालोरकुन, अनि निया पोरोयता वरे इरवाल हुडलोर अनि हजोर लोकुरकुन प्रतिफळ हियाना अनि दरतितुन नाश केवालोरकुन नाश कियाना साटि वने मन्ता बेरा वाता।”

¹⁹ असके स्वरगतिगा परमेस्वरना मन्दिर तरियतुर, अनि ओना करारता सन्दुक मन्दिरतिगा दिसतु, अनि विजक अनि शब्द अनि गुळजेमायाना अनि भुकंप अनि हजोह अदुह अरतुंग।