युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 10 - Muria Far Western

स्वरगदूत अनि गुन्डे किता हुडिला पुस्तक

¹ पजा आबारता ढगितुन मुच मतोर दुसरो वरोर लाववाले स्वरगदूत स्वरगताल रयाना नना हुळतान। ओना तलापोरो मेघधनुष्य मता। ओना चेहरा पोळद लेहका अनि ओनांग काल्क किसता खंबा लेहका मतांग।

² ओना कयतिगा गुन्डेकिता उन्दि हुडिला पुस्तक मता। ओद पुस्तक तरियता मता। ओर आपुना तिन्दान कयबासाडा काल समुद्रतिगा अनि डावान काल जागातिगा इरतुर।

³ अनि निराल गुळजे मान्ता लेहका पकाय जोरदे ओर केयस इतुर, असके केयानातासंग सात गुळजेमायाना लेंग वातु।

⁴ अव सातु गुळजेमायानाता लेंगवातु असके नना कोटवाल मतोना, मति “सातु गुळजेमायाना वेहता पोल्लो कोटमा अवेहकुन शिल किस इरा” इन्जोर स्वरगताल उन्दि लेंग नना केन्जतान।

⁵ समुद्रतिगा अनि जागातिगा नितितोर नना हुळस मतोना स्वरगदूत आपुना तिन्दान कय स्वरगतिके ताहतुर,

⁶ अनि बोर स्वरगतुन अनि स्वरगतिगा मन्ता ओद सबोयतुन, अनि दरतितुन अनि दरतितिगा मन्ता ओद सबोयतुन, अनि समुद्रतुन अनि समुद्रतिगा मन्तांग सबोय चिजकुन उत्पन्न कितोर सबोय काळदे जिवित मन्तोर परमेस्वरना पोरोयते शपथ तिन्ज इतुर, “इदेक ते असा उसिर आयो आयार।

⁷ मति सातवो स्वरगदूतना पिपारि नेकहाना लेंगता ओव दियांग परमेस्वरना पोल्लो वेहवाल आपुनोर दासलोरकुन परमेस्वर पकाय वरसांग मुने वेहता मकता पोल्लो पुरा आयार।”

⁸ नना स्वरगताल केन्जतान ओद लेंग असा नावासंग वळकिला लागतुर, “निमा हन्जुन समुद्रतिगा अनि जागातिगा नितितोर स्वरगदूतना कयदा तरियता गुन्डेकिता हुळिला पुस्तक येता” इन्जोर आग्या हितुर।

⁹ नना ओर स्वरगदूतना हेरे हन्ज इद हुडला पुस्तक नाकुन हिम इन्जोर इतान। ओर नाकुन इतुर, “इद येता अनि इदेन तिन्जवाटा, इद निया पोटातुन कयहार मति निया टोडितिगा काळाल निय लेहका मिंगता लागार” इन्जोर इतुर।

¹⁰ अदाम नना ओद हुडला पुस्तक ओर स्वरगदूतना कयदाल येतस तितान। ओद नावा टोडितिगा काळालनिय लेहका मिंगताते लागतु मति नना अदेन तितान असके पजा नावा पोटा कयतु।

¹¹ असके ओर नाकुन इदाम इतुर, “निकुन असा पकाय लोकुरकुन अनि अलग-अलग जातितोरक अनि अलग-अलग बोलि वळकवालोरक अनि राजाहना बारेते असा परमेस्वरना पोल्लो वेहिला पहाजे” इन्जोर इतुर।