युहन्नानिन प्रबु येसु मसि तोहतांग वायवाल मन्तांग ओव पोल्लोतांग वर्णन 1 - Muria Far Western

इद पुस्तकता उद्देश्य

¹ मुने सान्डेय खरोय आयवाल मन्तांग पोल्लोंग आपुना दास लोकुरकुन तोहान साटि परमेस्वर येसु मसिन हितोर ओव तोहता पोल्लोंग।

² अनि येसु मसि आपुना स्वरगदूततुन लोहच आपुनोर दास युहन्नानिन इव पोल्लोंग तोहतुर। अनि परमेस्वरना पोल्लो अनि येसु मसिना गवाहितुन इदाम ओर हुळता सबोय पोल्लोतुन युहन्नाल वेहतुर।

³ बेरा हेरे मन्ता इन्जोर वायवाल मन्तांग अव पोल्लोतांग बारेते कोटता परमेस्वरना इव पोल्लोतुन जोरदे वाचे किस दुसरोन केन्जहान्तोर अनि इव पोल्लो केन्जान्तोरक अनि इगा कोटता पोल्लोनुंग मानेमान्तोरक ओरक पकाय नशिबवाले मन्तोरक।

मसिलोकुरा सभातुन अभिवादन

⁴ युहन्नाल आसिया प्रदेशता सात मसिलोकुरा सभातुन कोटान्तोर: इदेक मन्तोर अनि पहले मन्दुर अनि वायवाल मन्तोर ओर परमेस्वरनिकेडाल अनि ओना सिंहासनता मुने मन्तोरक ओव सात आत्मानिकेडाल,

⁵ अनि विस्वासयोग्य साक्षि अनि हातोरनिगाडाल असा जिवे मायवाल लोकुरकनिगाडाल पहले जिवे मातोर अनि दुनियाता सबोय राजाहलोरा राजाल मन्तोर ओर येसु मसिनिकेडाल मिकुन दया अनि शान्ति पुटसोर मनि। ओर माकुन मया किस आपुना बलिदान हायानाता नतुरता द्वारा माकुन पापताल लेहच,

⁶ अनि ओर आपुनोर पिता परमेस्वरिन सेवाकियान साटि माकुन ओना राज्यता राजाह अनि याजक लोकुरक वने बनेहकितुर, ओना महिमा अनि लाव सबोय काळदे मनि। आमिन।

⁷ “हुळाट, ओर आबारता ढगिंगते वायवाल मन्तोर, अनि सबोय लोकुरक ओन हुळानुरक, अनि बोरक ओन बरशिते गुहच मन्दुरक अनि ओनाय कारण दुःख किन्तोरक दुनियाता सबोय जातितोरक वने ओन हुळानुरक”, इंगो। खरोय आमिन।

⁸ इदेक मन्तोर अनि पहले मन्दुर अनि वायवाल मन्तोर ओर सबोयताल लाववाले प्रबु परमेस्वर इन्तोर, “ननाय अलफा अनि ओमेगा आन्दान।”

युहन्नाना मुने मसि दिसान्तोर

⁹ मिवोर तमो अनि येसुना पकाय तकलिपतिगा अनि राज्यतिगा अनि पोसोरिंग सहेन कियानातिगा मिया सहभागि मन्तोना नना युहन्ना, परमेस्वरना पोल्लो अनि येसुना गवाहिता कारण समुद्र नडुम मन्ता पतमुस पोरोयता टापुतिगा मतोना।

¹⁰ अनि प्रबुना दिया नना आरादना कियाना बेरा पवित्र आत्माता पुरा नियत्रणते आतान।

¹¹ असके “बाताले निमा हुळान्तोन अदेन पुस्तकतिगा कोटस इफिसुस अनि स्मुरना अनि पिरगमुन अनि तुयाथिरा अनि सरदिस अनि फिलेदिलफिया अनि लवुदिकिया इव सात मसिलोकुरा सभांगतिगा लोहचिम” इन्जोर नावा परके पिपारिता लेहका उन्दि हजोर लेंग नना केन्जतान।

¹² नावासंग वळकसोर मतोर ओन हुळान साटि नना परके मिळिच हुळतान असके टिवरि इराना सात सोनोतांग गोटांग हुळतान,

¹³ अनि ओव गोटातांग नडुम काल्कवनाह लाटि कुरता करस अनि छातितिगा सोनोता नुलदे बनेकिता सन्दराता दुपटा दोहच मतोर मानेयतोर मरि लेहका वरोर मानेयतुन हुळतान।

¹⁴ ओना तला अनि कल्क पान्डरि कापुस लेहका अनि बरफ लेहका पान्डरि मतांग अनि ओनांग कोन्डांग पतियता किसिता ज्वाला लेहका मतांग।

¹⁵ भट्टितिगा कासिहताप सोबाय पान्डरि पितळी लेहका ओनांग काल्क मतांग अनि ओना शब्द पकाय उसाता एर अरता लेहका लेंग मता।

¹⁶ ओर आपुना तिन्दान कयतिगा सात हुकोंग पयस मतोर, अनि ओना टोडिताल पकाय होळता रन्ड धारवाले तलवार पसियन्दु। ओना चेहरा पोळद पकाय लावदे मान्जान्ता अदाम लेहका मान्जतु।

¹⁷ ओन हुळतान असके नना हाताप लेहका ओनांग काल्कपोरो अरतान। ओर नावापोरो आपुना तिन्दान कय इरस इतुर, “वरियमा, पहले अनि अन्तिम अनि जितो ननाय आन्दान।

¹⁸ नना हास मतोना, मति हुळा, इदेक नना सबोय काळदे जितो मन्तोना, अनि हायानाता अनि अधोलोकता वने किल्लिंग नावाय हेरे मन्तांग।

¹⁹ इन्जोर, इदेक मन्ता अनि आयवाल मन्ता निमा दर्शनतिगा हुळति ओव सबोय पोल्लोंग निमा कोटा;

²⁰ अनि नावा तिन्दान कयतिगा हुळति अव सात हुकोंगना अनि सोनोता ओव टिवरि इराना सोनाता सात गोटातांग रहस्य इदाम मन्ता: ओव सात हुकोंग मसि विस्वासि लोकुरा सात सभाता दूतक आन्दुरक, अनि टिवरि इराना सोनाता ओव सात गोटांग मसि विस्वासि लोकुरा सात सभांग आन्दुरक।”