फिलिप्पि 4 - Muria Far Western

¹ इन्जोर हे नावोर प्रिय अनि नना हुळान साटि पकाय विचार किन्तोना बायि-दादालोरक, निमाट नावा बुतोता गिरदा अनि मुकुट मन्तोरिट। इन्जोर नावोर प्रिय लोकुरक नना मिकुन वेहतोना अदामे प्रबुनिगा निमाट स्थिर मन्ट प्रिय लोकुरक।

विस्वासि लोकुरक साटि उपदेश

² प्रबुनिगा उन्दि मन्दे मनिर इन्जोर नना युवादिया अनि सन्तुखे पोरोयतोर लोकुरकुन समजेह किस विनन्ति किन्तोना।

³ नावोर खरोय गोतियाह, परमेस्वरना जिवनता पुस्तकतिगा पोरोय कोटता मन्ता ओर क्लेमेन्त अनि नावासंगे सेवाकेवालोर लोकुरासंगे मन्ता अव आसक सोबाता पोल्लो वेहान साटि नावासंग पकाय मेहनत कितांग इन्जोर अव आसकुन मदत कियाला पहाजे इदाम नना मिकुन विनन्ति किन्तोना।

⁴ प्रबुनिगा दरोज गिरदाते मन्ट, अनि निमाट गिरदाते मन्ट इन्जोर नना असा वने इन्तोना।

⁵ आपुनतुन हुळिला बनेकिस मन्ता मिया सोबाय स्वभाव सबोय लोकुरकनिगा प्रगट आयि। प्रबु येसु मसिना असा मल्स वायाना हेरे मन्ता इन्जोर दरोज आल्हाट।

⁶ बोदे पोल्लोंगता बारेते वने चिन्ता केमाट मति सबोय परिस्थितिते धन्यवादतासंग प्रार्थना अनि विनन्ति किस मिया जरुरितुन परमेस्वरना मुने वेहिला पहाजे।

⁷ इदेनतेय लोकुरकुन बसकेय समजेमाय परो अचोन हजोर शान्ति परमेस्वरनिकेडाल पुटस मिया मन अनि मिया विचारतुन मसि येसु मसिनिगा सुरक्षित इरानुर।

⁸ इदेक हे प्रिय बायि-दादालोरक, बोव बोव पोल्लोंग खरोय मन्तांग अनि बोव बोव पोल्लोंग आदर योग्य मन्तांग, अनि बोव बोव पोल्लोंग बराबर मन्तांग इन्जोर परमेस्वर स्विकार किन्तोर, अनि बोव बोव पोल्लोंग पवित्र मन्तांग, अनि बोव बोव पोल्लोंग मयाता मन्तांग, अनि बोद पोल्लो स्तुतिता योग्य मन्तांग, अनि अव पोल्लोताल पकाय सोबाय, अनि आदर हियाना योग्य पोल्लो मन्तांग अव पोल्लोतिगा पकाय ध्यान लावे किम्ट।

⁹ बोव पोल्लोंग निमाट नावागा हुळतिट, अनि केन्जतिट, अनि करियतोरिट, अनि स्विकार कितिट, अदेनाय पालन किसोर मन्ट, असके शान्तिता झरा मन्तोर ओर परमेस्वर मियासंग मन्दानुर।

फिलिप्पि लोकुरा दानता साटि धन्यवाद

¹⁰ इदेक इचोक दियांगना पजा मिया चिन्ता नावा बारेते असा चेतेमाता इन्जोर नना प्रबुनिगा पकाय गिरदाते मन्तोना। खरोय मुनेटाले निमाट इदाम नावा बारेते विचार मता, मति नाकुन मदत कियान साटि मिकुन सन्दि पुटो आत।

¹¹ बोदायि जरुरिता कारणते आयो नना इद इन्तोना। बाक्याकि बोदायि परिस्थितिते गिरिदाते मन्दाना नना करियतोना।

¹² नना गरिब परिस्थितिते मन्दाना वने पुन्तोना अनि पकाय संपतिता परिस्थितिते वने मन्दाना पुन्तोना। सबोय परिस्थितिते वने बदाम गिरिदाते मन्दिला परान्तोरोम अदे पोल्लोता रहस्य वने नना करियतान। इंगो! पोटा पन्ज अनि करदे मन्दाना इव सबोय नना करियतान।

¹³ नाकुन लाव हेवाल येसु मसि मन्तोर इन्जोर इदाम सबोय परिस्थितिते ओना मदतते नाक इदाम सबोय किया परान्तोना।

¹⁴ ते वने नावा इद पकाय तकलिपता परिस्थितितिगा मदत किस निमाट नावा दुःखतिगा सहभागि आतिट इन्जोर निमाट सोबाय बुतो कितोरिट।

¹⁵ हे फिलिप्पिया सहेरता मसिलोकुरा सभातोर विस्वासि लोकुरक, येसु मसिना सोबाता पोल्लो वेहाना सुरुवात दियांग बसके नना मकिदुनिया तासिस हतान असके नाकुन आर्थिक मदत हियाना बारेते मिया मसिलोकुरा सभातुन तासिस दुसरो बोदे मसिलोकुरा सभा नाकुन मदत केवोर इन्जोर निमाट वने पुन्तोरिटे।

¹⁶ इद प्रकारते नना तिस्सलुनिया सहेरतिगा मन्दान असके निमाट नावा कमितुन पुरा कियान साटि उन्दि बेरा आयो मति असा असा नावा जरुरि चिजतुन लोहच हितोरिट।

¹⁷ नना असा दानता इच्चा किन्तोना इदाम आयो मति निमा इदाम हियानाता द्वारा परमेस्वरताल आशिष मिकुन पुटहिला पहाजे इदाम नावा इच्चा मन्ता।

¹⁸ इदेक नावा जरुरता सबोय चिज नावा हेरे मन्ता अनि पकाय वने मन्ता। निमाट लोहता ओद दान परमेस्वर साटि सोबाय मन्ता उन्दि दयमुर बलिदान लेहका परमेस्वरिन गिरदा किन्ता ओना येताना योग्य बलिदान लेहका इप्पफ्रुदितुसना कयदाल स्विकार किस नना पकाय संतुष्ट आतान।

¹⁹ नावोर परमेस्वर येसु मसिना कारण मिया सबोय कमितुन परमेस्वर ओना पकाय हजोर धनसंपतिता अनुसार पुरा कियानुर।

²⁰ मावोर बाबो परमेस्वरना महिमा सबोय पिळि-पिळिते आसोर मनि। आमिन।

पोलुसना आकरि नमस्कार

²¹ येसु मसिनिगा विस्वास किन्तोरक ओरक सबोय पवित्र लोकुरकुन नमस्कार इन्तोना। अनि नावासंग मन्तोर ओर तमोलोरक मिकुन नमस्कार इन्तोरक।

²² इगा मन्तोरक सबोय पवित्र लोकुरक विशेषाल हजोर राजालना राजवाळातिगा बुतो किन्तोरक ओर लोकुरक वने मिकुन नमस्कार किन्तोरक।

²³ मावोर प्रबु येसु मसिना दया मिया सबोय लोकुरासंगे मनि।