फिलेमोन 1 - Muria Far Western

येसु मसिना खास चेलाल पोलुसनिकेडा अभिवादन

¹ येसु मसिना सोबाता पोल्लो वेहानाता कारण कयदि मन्तोर पोलुसनिकेडाल अनि मावोर तमो तिमोतियूसनिकेडाल मावोर प्रिय अनि संगे बुतो केवालोर फिलेमोन पोरोयतोर निकुन,

² अनि हेलाळ अफिया अनि मावोर संगवाले सोबाय सेवा केवाल अरखिपुस अनि मिया लोता मसिलोकुरा सभातुन माक इद पत्र कोटान्तोरोम:

³ मावोर बाबो परमेस्वर अनि प्रबु येसु मसिनिकेडाल दया अनि शान्ति मिकुन पुटसोर मनि।

फिलेमोना मया अनि विस्वास

⁴ प्रबु येसुनिगा मिया विस्वास अनि सबोय पवित्र लोकुरासंग मन्ता मिया ओद मयाता बारेते

⁵ नना केन्जुन मावागा मन्ता सबोय भलाता ग्यानते मिया विस्वासता संगत मसिना साटि पुरा आयार इन्जोर

⁶ नावा प्रार्थनाते निकुन आलहिस दरोज नावा परमेस्वरिन धन्यवाद किन्तोना।

⁷ बाक्याकि हे तमो फिलेमोन, पवित्र लोकुरकना मन हिमत किति इन्जोर निया मयाते नाकुन पकाय गिरदा अनि शान्ति पुटता।

उनेसिमुसिन आपुना तमोना लेहका येताना बारेते पोलुस वळकिन्तोर

⁸ इन्जोर निमा बाताल बुतो कियाला पहाजे इदाम आग्या हियाना पकाय हिमत मसिनिगा नाकुन मन्ता,

⁹ ते वने पोलुस पोरोयतोर नना मुदयाल अनि येसु मसिना सोबाता पोल्लो प्रचार कियानाता कारण इदेक जेहलतिगा मन्तोना नना मयाता कारण विनन्ति किन्तोना।

¹⁰ नना कयदि मन्दानपा येसु मसिना विस्वासतिगा ततान नावोर मरि लेहका मन्तोर ओर ओनेसिमुस साटि निकुन विनन्ति किन्तोना।

¹¹ ओर ते पहले निया साटि बोदे बुतोतोर हिलेर आस मन्दुर मति इदेक निया अनि नावा पकाय फायदातोर मन्तोर।

¹² नावा पकाय मायातोर मन्तोर ओर ओनेसिमुसिन नना निया हेरे वापस लोहतान।

¹³ येसु मसिना सोबाता पोल्लोता कारण जेहलतिगा मन्तोना नावा सेवाकियाला ओर ओनेसिमुस निया बदला नावा हेरे मन्दानुर इदाम नाकुन इच्चा मता।

¹⁴ मति निया इच्चा हिले ते नना बाताले कियाना साटि विचार केवोन; बाताले सोबाता बुतो नावा साटि कियाकि ते ओद जबरदस्तिते आयो मति आपुना गिरदाते कियाला पहाजे इदाम नना इच्चा किन्तोना।

¹⁵ बाक्याकि ओर ओनेसिमुस हुचुक दियांग नियागडाल अलग मतोर ओद दरोज निया हेरे मनिर इन्जोर साटि मता।

¹⁶ ओर इदेक मिया केवल दास आयो मति दासताल वने हजोर मन्तोर। मानेयना रितिते अनि ओर प्रबुना पोरो विस्वास किन्तोर इन्जोर नाकुन अदेनताल निकुन वने प्रिय तमो आस ओर माकुन पुटतोर।

¹⁷ इन्जोर निमा नाकुन आपुना संगवाले समजेमान्तोना ते ओर उनेसिमुसिन नावा लेहका स्विकार किम।

¹⁸ अनि ओर नियागा बाताले दोखा कितोर ते अनि निया चिजतुन बाताले नुकसान किन्तोर ते अदेना किमत नावागा इरा।

¹⁹ नना पोलुस आपुना कयदे इद पत्र कोटान्तोना: नना ओव सबोय चिज निकुन वापस हियाका अनि निमा आपुनतुन नाकुन हियान साटि करजदार मन्तोन इन्जोर नना इन्दाना जरुरि हिले।

²⁰ इंगो, हे तमो अनि मावोर प्रबु मसिना विस्वास केवाल नियाकेडाल नाकुन उन्दि मदत किम, नावासंग मसिना सेवा केवालोर आस नावा जिवातुन गिरदा हेवि।

²¹ निमा नावा आग्या पालन कियानाता बारेते नाकुन विस्वास मन्ता; अनि नना बाताल इनका अदेनते वने निमा पकाय कियाकि इन्जोर समजेमास नना कोटान्तोना।

²² निमा नाकुन मन्दाना साटि जागा तयार कियाला पहाजे इदाम पोल्लो वने नना निकुन कोटान्तोना बाक्याकि निया प्रार्थनाता द्वारा परमेस्वर नाकुन निया हेरे लोहानुर इन्जोर नावा आशा मन्ता।

आकरि अभिवादन

²³ येसु मसिना सोबाता पोल्लोता प्रचार कियानाता द्वारा नावा संग कयदि मन्तोर ओर इप्पाफ्रोस,

²⁴ अनि नावासंगे बुतोकेवालोरक मरकुस, अरिस्तरखुस, देमास अनि लूकाल निकुन नमस्कार किन्तोर।

²⁵ मावोर प्रबु येसु मसिना दया मिया आत्मातासंग आसोर मनि। आमिन।