मरकुस 8 - Muria Far Western

येसु नालुंग हजार लोकुरकुन तिहान्तोर

¹ अव दियांगते असा पकाय भीळ जमा आत असके ओरा हेरे तिन्दान साटि बाराय हिले आस मता ते येसु आपुनोर चेलालोरकुन हेरे केयस ओरकुन इतुर,

² “येरक इदेक मून्ड दियाताल नावासंग मन्तोरक अनि ओरा हेरे तिन्दान साटि बाराय हिले इन्जोर नाकुन ओरा पोरो दया वान्ता।

³ नना ओरकुन बिना तिन्वाय लोन लोहका ते ओरक नडुम हरदे अवकेमायनुरक बाक्याकि येरागाडाल बोरे बोरे पकाय लकडाल वातोरक।”

⁴ ओनोर चेलालोरक ओन उत्तर हितुरक, “येरकुन इगा वारु पल्लातिगा जेवन किस तृप्त कियान साटि अचोक जेवन बोरे बगाडाल तता परान्तोर?”

⁵ येसु ओरकुन पुच्चेमातुर, “मिया हेरे बचोक रोटिंग मन्तांग?” ओरक इतुर, “सात।”

⁶ असके येसु ओरकुन जागादिगा उदिला आग्या हितुर। अनि अव सात रोटिंग येतितुर अनि धन्यवाद किस रोटिंग तुकळांग किस आपुनोर चेलालोरकुन हिसोर हितुर अनि ओर लोकुरकुन वाडे किसितुरक।

⁷ ओरा हेरे हुचुक हुडलांग मीन्क वने मन्दुंग, ओर परमेस्वरतुन धन्यवाद किस अव वने लोकुरकुन तिन्दाना आग्या हितुर।

⁸ अव तिन्ज संतुष्ट आतुर अनि चेलालोरक पिसतांग तुकळांगना सात बुटिंग निहस ताहतुरक।

⁹ ओरक नालुंग हजारना हेरे लोकुरक मतोरक। ओर सबोयलोरक जेवन तितुरक असके येसु ओरकुन आपुना लोन हन्दिला हितुर।

¹⁰ अनि ओर सान्डे आपुना चेलालोरासंग डोंगातिगा उदस दलमनुथा प्रदेशतिगा हतुर।

परीसिलोकुरक स्वरगताल चमत्कार तलकान्तोरक

¹¹ पजा परीसि लोकुरक वास ओना परिक्षा कियान साटि स्वरगतिगाडाल बोदेतरि चमत्कार तल्कस ओनासंग बहस किया लागतुरक।

¹² ओर दम येतस इतुर, “इद काळतोर लोकुरक बाक्या चमत्कार पळकान्तोर? इद पिळिता लोकुरकुन बोदायि चमत्कार हिया लागो आयार इन्जोर नना मिकुन खरोय इन्तोना।”

¹³ अनि येसु ओरकुन तासिस असा डोंगातिगा अन्जतुर अनि नहारता होदपाकाळ हतुर।

परीसि अनि हेरोदेसना खमिर

¹⁴ चेलालोर रोटिंग येताना मरिंगस मतोरक अनि डोंगातिगा ओरा हेरे उन्दिय रोटि मता।

¹⁵ येसु ओरकुन इशारा कितुर, “हुळाट परीसि अनि हेरोदेसना खमिरताल हुशार मन्ट।”

¹⁶ ओर आपसते विचार किस इदाम इतुरक, “मावा हेरे रोटिंग हिलेंग इन्जोर ओर इदाम इन्तोर।”

¹⁷ इद पुन्ज येसु ओरकुन इतुर, “मावा हेरे रोटिनुंग हिलेंग इन्जोर निमाट बाक्या आपसते विचार कियाला आतोरिट? बाताल इदेकवनाह पुनविट अनि समजेमायविट? बाताल मिया मन कटोर आता बहे?

¹⁸ बाताल कोन्डांग मन्ज वने हूळ परविट बहे? अनि कविंग मन्ज वने केन्ज परविट बहे? अनि बाताल मिकुन आटवन हिले बहे?

¹⁹ ओदबेरा नना सयुंग हजार लोकुरक साटि सयुंग हारितांग तुकळांग किस मन्दान ते निमाट तुकळातांग बचोक बुटिंग निहस ताहतिट?” ओरक ओन इतुरक, “बारहा बुटिंग।”

²⁰ “अनि ओदबेरा नालुंग हजार लोकुरक साटि सात रोटिंग तुकळांग कितान असके निमाट तुकळातांग बचोक बुटिंग निहस ताहच मतिट?” ओरक ओन इतुरक, “सात बुटिंग।”

²¹ येसु ओरकुन इतुर, “बाताल इदेकवनाह निमाट समजेमायविट बहे?”

बेतसयदातिगा वरोर आन्दरान येसु सुदरे किन्तोर

²² ओरक बेतसयदा नाटेनिगा वातुर असके लोकुरक वरोर आन्दराल मानेयतुन ओना हेरे ततुरक अनि ओन कय इटिर इन्जोर ओन विनन्ति कितुरक।

²³ येसु ओर आन्दराल मानेयना कय पयस नाटेना बाहरो ओसुन ओना कोन्डातिगा उसकुल लावेकिस ओना पोरो कय इरस, “बाताल निमा बाताले हुळान्तोना?” इन्जोर पुच्चेमातुर।

²⁴ ओर कोन्डांग ताहच इतुर, “नना मानेयतुन हुळान्तोना ओरक नाकुन ताकसोर मराक लेहका दिसान्तोना।”

²⁵ असके येसु दुसरो बेरा ओना कोन्डांग पोरो कय इरतुर, ओर बेस आतुर अनि आन्दराल मन लावेकिस हुळतुर अनि सबोय सोबाय हुळिला लागतुर।

²⁶ अनि “निमा इद नाटेनिके हनमा” इदाम इन्ज येसु ओन आपुना लोन लोहतुर।

येसु मसिहाल आन्दुर इन्जोर पतरस वेहिन्तोर

²⁷ येसु अनि ओनोर चेलालोरक फिलिप्पिना कयसरिया नाटेनिगा हतुरक, हरितिगा ओर आपुनोर चेलालोरकुन, “लोकुरक नाकुन बाताल इन्तोर?” इन्जोर पुच्चेमातुर।

²⁸ ओरक उत्तर हितुर, “युहन्ना बपतिस्मा हेवाल, अनि दुसरो हुचुलोरक इन्तोर एलियाह अनि दुसुरो हुचुलोरक परमेस्वरना पोल्लो वेहवालोरक निगडाल वरोर आन्दुर इदाम इन्तोर।”

²⁹ येसु ओरकुन पुच्चेमातुर, “मति निमाट नाकुन बाताल इन्तोरिट?” पतरस ओन उत्तर हितुर, “निमा मसि आन्दि।”

³⁰ असके नावा बारेते इदाम बोनासंग इन्माट इन्जोर येसु ओरकुन चेतावनि कितुर।

येसु आपुना हायानाता बारेते वेहान्तोर

³¹ असके येसु आपुना चेलालोरकुन इदाम करिहिला लाकतुर: “नना मानेयतोर मरि पकाय पकाय तकलिप सहेन किस अनि यहुदि मुक्यालोरक अनि मुक्याल याजक लोकुरक अनि मूसाना नियमतुन करिहवालोरक ओन तुच्च समजेमास होवक्स वाटिर अनि ओर मून्ड दियाना पजा असा जिवे मायिला पहाजे” इन्जोर येसु ओरकुन करिहला लागतुर।

³² ओर इद पोलो ओरकुन साप साप इतुर असके पतरस ओन अलगो ओस होंग किया लागतुर।

³³ मति ओर मलियस आपुनोर चेलाहनिके हुळतुर अनि पतरसतुन होंग किस इतुर, “हे सयतान नावा मुनेटाल लक आम, बाक्याकि निमा परमेस्वरना पोल्लोतिगा आयो मति मानेयना पोल्लोतिगा मन लावे किन्तोन।”

येसुना परके हन्दानाता अर्थ

³⁴ ओर भीळतुन अनि आपुना चेलालोरकुन आपुना हेरे केयस ओरकुन इतुर, “बोनाय नावा परके वायाना इच्चा मन्ता ओर आपुना इच्चा अनि योजनातुन तासि आपुना कुरुस ताहच आपुना पकाय तकलिप सहेमास नावा परके वायिर।

³⁵ बाक्याकि बोरायि आपुना जिवन पिसिहिला इच्चा कियानुरक ते ओरकुन परमेस्वरनासंग मन्ता अनन्ता काळता जिवा नष्ट आयार, मति बोरायि नावा साटि या सोबाता पोल्लोसाटि आपुना जिवा हियानुर ते ओरक परमेस्वरनासंग अनन्तकाळता जिवा पुटार।

³⁶ मानेय दुनियाता सबोय चिजतुन पुटहानुर मति ओर अनन्त जिवन नष्ट कियानुर ते ओन बाताल फायदा मन्दार?

³⁷ अनन्त जिवन पुटहान साटि मानेय बोद चिज बदला हिया परान्तोर?

³⁸ इद व्यभिचार अनि पापि केवालोरा पिळिता नडुम बोरायि नावा अनि नावा पोल्लोनुंग येतिला लज्जेमायनुरक ते नना मानेयतोर मरि वने ओना बारेते पवित्र स्वरगदूतकनासंग आपुना बाबोना महिमातासंग वायका असके लज्जा कियाकान।”