मरकुस 6 - Muria Far Western

नासरत नाटेनिगा येसुना अपमान

¹ येसु अगडाल पसियस आपुना नाटेनिगा वातुर अनि ओनोर चेलालोर वने परके वातुर।

² पवित्र दियाते ओर समाज मन्डिलितिगा उपदेश हियाला लागतुर अनि पकाय लोकुरक ओना पोल्लो केन्जुन दंगेमास इदाम इन्दा लागतुरक, “येन इव पोल्लोंग बगाडाल वातुंग, इद करहान साटि ग्यान अनि चमत्कार कियाला लाव बोर हितोर?

³ बाताल येरे मरियमनोर पेकाल अनि याकुब, योसेस, यहुदा अनि शमोनोर तमो मरा मिस्रिनोर आयोर बहे? बाताल येनांग हेलांग वने मावा नडुम मनोंग?” इन्जोर वेहच ओर लोकुरक येसुन स्विकार केवोरक।

⁴ येसु ओरकुन इतुर, “परमेस्वरना पोल्लो वेहवाल आपुना देश, आपुना परिवार, अनि आपुना लोन हरच बगाय अपमान आयो।”

⁵ हुचुक बिमार लोकुरकुन कय इरस ओरकुन सुदरे कितोर तासि ओर अगा बाताले हिमतता बुतो किया परोर आतुर।

⁶ अनि ओरा अविस्वासतिगा ओन आश्चरय आत अनि ओर नालुंगास बासाडांग नाटेनिगा उपदेश हिसोर वलियतुर।

येसु बारा खास चेलालोरकुन लोहान्तोर

⁷ ओर येसुना बारा खास चेलालोरकुन आपुना हेरे केयतुर अनि ओरकुन इवुर-इवुर किस लोहतुर अनि ओरकुन दुष्टात्मापोरो अदिकार हितुर।

⁸ “अनि हरिते ताकान्पा बळगा पयकाट अनि रोटिंग, जोरिया, अनि जोरियातिगा पयसांग इदाम बाराय पयमाट।

⁹ मति जोळांग कराट अनि रन्ड रन्ड बन्डिंग करमाट” इन्जोर येसु ओरकुन आग्या हितुर।

¹⁰ अनि ओर ओरकुन इतुर, “बगाय आयि निमाट बोनाय लोतिगा दाकिट ते ओद सहेर तासियानवनाह ओद लोतिगाय रोमस मन्ट।

¹¹ बगाडोर लोकुरक मिकुन स्विकार केवोर अनि मियांग केन्जोर ते अगडाल पसियानपा ओरकुन गवाहि आयि इन्जोर आपुना काल्कना डुन्डोतुन साप किम्ट।”

¹² असके ओरक हन्ज आपुना पाप कियाना बन्द किस परमेस्वरना हेरे वायिला पहाजे इन्जोर प्रचार कितुरक।

¹³ अनि पकाय दुष्टात्मातुन पसिहितुरक अनि पकाय बिमार लोकुरकुन निय लावेकिस सुदरे कितुरक।

बपतिस्मा हेवाल युहन्नानिन हव्कान्तोर

¹⁴ इदाम येसुना बारेता पोल्लो पकाय फयलेमातु, अनि हेरोदेस राजाल वने येसुना बारेते केन्जतुर, अनि ओर इतुर, “बपतिस्मा हेवाल युहन्ना हातोरिगाडाल जिवेमातोर इन्जोर ओन इद लावता बुतोंग प्रगट आन्ता।”

¹⁵ अनि दुसरो हुचुक लोकुरक इतुरक, “येर एलियाल आन्दुर” मति दुसरो हुचुक लोकुरक इतुरक, “ओर पहलेटा परमेस्वरना पोल्लो वेहवाल हजोर लोकुरा लेहका परमेस्वरना पोल्लो वेहवाल दुसरो वरोर मन्तोर!”

¹⁶ अनि हेरोदेस इद केन्जचुन इतुर, “ओर नना तला कदियस मतोना ओर युहन्नाल आन्दुर, ओर असा जिवेमातोर!”

¹⁷ हेरोदेस आपुनोर तमो फिलिप्पुसना मुत्ते हेरोदियासिन आपुना मुत्ते किस इरस मतोर इन्जोर “आपुनोर तमोना मुत्तेन आपुना मुत्ते लेहका इराना निकुन साटि बेस हिले” इन्जोर युहन्नान हेरेदेसतुन इंज मतोर।

¹⁸ इन्जोर हेरोदेस सयनिक लोकुरकुन लोहच युहन्नान पयस जेहलदिगा लोहच मतोर।

¹⁹ इन्जोर साटि हेरोदियास ओनासंग वेयरि इरिन्दु अनि ओन होवक्स वाटिर इन्जोर इदाम इच्चा किन्द मति अदाम किया परो आतु।

²⁰ बाक्याकि बपतिस्मा हेवाल युहन्नान परमेस्वरना मुने येताना योग्य अनि पवित्र मानेय समजेमास ओन हेरोदेस वरियन्दुर अनि ओन पिसिहचोर मतोर। अनि ओन वेहता पोल्लोंग केन्ज हेरोदोस पकाय वरियन्दुर मति ओना पोल्लोंग गिरदाते केन्जदुर।

²¹ हेरोदेस आपुना जनमदिया आपुनोर प्रधान, सेनापति अनि गलीलितोर हजोर लोकुरक साटि जेवन इरतुर असके बपतिस्मा हेवाल युहन्नान हव्काना साटि हेरोदियासिन उन्दि सोबाय बेरा वात।

²² हेरोदेसना पेडि लोपा वास अनि एन्दस हेरोदेसिन अनि ओनासंग उदवालोरकुन गिरदा कित असके राजाल पेडिन इतुर, “निया बाताल इच्चा मन्ता ओद तलका, नना निकुन हियाका।

²³ निमा बाताले तलकिकि ते आपुना अरदो राज्यवनाह तलकिकि ते वने नना ओद निकुन हियाका” इन्जोर शपथ किस वेहतुर,

²⁴ ओद बाहरो हन्ज आपुना अवहारिन, “नना बाताल तलकिका” इन्जोर पुच्चेमातु; ओदेना अवहारि, “बपतिस्मा हेवाल युहन्ना तला तलका” इदाम इतु।

²⁵ ओद सान्डे लोपा राजा हेरे हन्जुन, “निमा इदेक बपतिस्मा हेवाल युहन्ना तला उन्दि दळियातिगा नाकुन हिम इन्जोर नावा इच्चा मन्ता” इदाम ओन विनन्ति कित।

²⁶ असके राजाल पकाय दुःख आतुर, मति आपुना शपथता अनि संग उदवालोरा कारण ओर आयो इन परोर आतुर।

²⁷ आकरिते तला कदियस तरीर इन्जोर राजाल सान्डे वरोर सिपायितुन आग्या हिस लोहतुर।

²⁸ ओर जेहलदिगा हन्ज ओना तला कदियतुर अनि उन्दि दळियातिगा इरस ततुर अनि पेडिन हितुर, अनि पेडि ओद तला आपुना अवहारिन हितु।

²⁹ इद केन्जतपा युहन्नानोर चेलालोरक वातुर अनि ओना मुरदातुन ओसुन बिजगुडितिगा इरतुरक।

येसु सयुंग हजार लोकुरकुन तिहान्तोर

³⁰ येसुना खास चेला लोकुरक येसुन हेरे जमा आस बाताल-बाताल ओर कितुर अनि करिहिस मतोर ओद सबोय येसुन वेहतुरक।

³¹ पकाय लोकुरक हन्जोर, वासोर मतोरक अनि ओरकुन तिन्दिला बेरा वने पुटो इन्जोर येसु ओरकुन इतुर, “निमाट दुसरो बोदायि सुनसान जागात हन्जुन हुचुन्सा आराम किम्ट।”

³² इन्जोर ओरक डोंगातिगा उदस सुनसान जागादिगा अलगो हतुरक।

³³ ओरक हन्दानपा पकाय लोकुरक हुळस पुतुरक अनि सबोय सहेरताल लोकुरक ताकसोर वितितुरक अनि ओरा मुने अगा अवतुरक।

³⁴ येसु डोंगाताल रयतुर असके पकाय भीळ हुळतुर। बोरे मेहवाल हिलेर बेळांग लेहका ओरक मतोरक इन्जोर ओरकुन दया कितुर। अनि ओर ओरकुन पकाय पोल्लोंग करिहला लागतुर।

³⁵ बेरा मुळन्दित असके ओनोर चेलालोर ओना हेरे वास इतुरक, “इद सुनसान जागा मन्ता अनि बेरा पकाय मुळन्दित।

³⁶ असके नालुंगास बासाडांग नाहक हन्जुन आपुना साटि जेवन अस तिन्दिलाय ओरकुन वेहा” इन्जोर वेहतुर।

³⁷ ओर उत्तर हितुर, “निमाटे ओरकुन तिन्दिला हिम्ट”, अनि ओरक येसुन इतुर, “ओरकुन तिहिला साटि मावा उन्दि सालता रोजि पुरा जमाकियाला पहाजे इन्जोर निमाट पुनविट बहे?”

³⁸ ओर ओरकुन इतुर, “हन्ज हुळाट मिया हेरे बचोक रोटिंग मन्तांग?” ओरक मालुम किस इतुरक, “सयुंग रोटिंग अनि रन्ड मीन्क वने।”

³⁹ असके सबोय लोकुरकुन हिरवो रोन्डापोरो पंगतते उदहाट इन्जोर येसु ओरकुन आग्या हितुर।

⁴⁰ ओरक नुर-नुरक अनि पन्नास-पन्नास किस पंगतते उदितुरक।

⁴¹ ओर अव सयुंग हारिंग अनि रन्ड मीन्कुन पयस अनि स्वरगतिके हुळस धन्यवाद किस हारितांग तुकळांग किस-किस ओरकुन वाडे केविर इन्जोर आपुना चेलालोरकुन हितुर अनि अव रन्ड मीन्कुन वने सबलोरकुन तुसितुर।

⁴² सबलोरक तिन्ज तृप्त आतुरक।

⁴³ अनि ओरक बाकि आता तुकळातांग रोटिंग अनि मीन्क बारा बुटिंग निहस ताहतुरक।

⁴⁴ बोर रोटिंग तितुरक ओरक सयुंग हजार मानेयक मतोरक।

येसु एर पोरो ताकान्तोर

⁴⁵ येसु लोकुरकुन आपुना लोन हन्दिला हितुर अदेय बेरा ओर आपुनोर चेलालोरकुन सान्डे डोंगातिगा उदस ओना मुने ओरक नहारता होदपाकाळ बेतसयदा नाटेनिगा हनिर इन्जोर दन्दरे कितुर।

⁴⁶ ओरकुन सार किस ओर मटा पोरो प्रार्थना कियान साटि हतुर।

⁴⁷ बेरा मुलत असके डोंगा समुद्रता नडुम मता अनि ओर वरोरे दरतितिगा मतोर।

⁴⁸ वळिय ओरा विरुद मता इन्जोर ओरक डोंगा ताकिहसोर ताकिहसोर पकाय तकलिप आतुरक इन्जोर ओर हुळतुर, कोर कुसाना पहारात ओर नहारतिगा ताकसोर ओरा हेरे हन्जुन ओरा मुने हन्दाना लेहका कितुर।

⁴⁹ मति ओन समुद्रतिगा ताकाना हुळस भूत आन्द इन्जोर ओरक समजेमास वरियस पकाय जोरदे केयतुरक।

⁵⁰ बाक्याकि सबोय लोकुरक ओन हुळस वरियस मतोरक मति ओर सान्डे ओरासंग वळकतुर, “हिमत किम्ट नना आन्दान वरियमाट” इन्जोर इतुर।

⁵¹ असके ओर ओरा हेरे डोंगातिगा वातुर, अनि वळिय रोमतु अनि ओरक पकाय आश्चरय किया लागतुरक।

⁵² ओरा मन कटोर आस मता इन्जोर अव सेयुंग हजार लोकुरकुन तिहतुर ओद अत्भुत चमत्कारता बारेते ओरक समजेमायोर आसि।

गन्नेसरत नाटेनिगा बिमार लोकुरकुन सुदरे किन्तोर

⁵³ ओरक गलील नहारता होद पाकाळ हन्जुन गन्नेसरत नाटेनिगा अवतुरक।

⁵⁴ ओर डोंगातिगाडाल रयतुर असके लोकुरक सान्डे ओन पुतुरक।

⁵⁵ लोकुरक हेरेटा सबोय प्रदेशतिगाडाल विचोर येसु बगा मन्तोर इन्जोर समाचार पुटत अगा बिमार मानेयकुन कटुल पोरो ताहच ततिला लाकतुरक।

⁵⁶ अनि बगाय आयि येसु नाटेनिगा या सहेरतिगा या प्रदेशतिगा हन्दुर अगा ओरक बिमार मानेयिन हाटुमतिगा तच इरतुरक। अनि ओन सन्दरानुंग इटिला हेविर इन्जोर विनन्ति किन्दुरक अनि बचोलोरक ओन इटतुरक ओरक सबलोरक बेस आतुरक।