मरकुस 5 - Muria Far Western

येसु दुष्टात्मा पयतोर मानेयिन सुदरे किन्तोर

¹ पजा येसु नहारता होदपाकाळ गिरासेनियोना देशते अवतुर।

² ओर डोंगाताल रयतुर असके सान्डेय दुष्टात्मा पयतोर वरोर मानेय बिज गुडिताल पसियस ओन मिलेमातुर।

³ ओर बिजगुडितिगा मन्दुर अनि बोरे ओन साकरिते वने दोहिला परोर।

⁴ बाक्याकि ओन पकाय बेरा बेळांग अनि साकरिते दोहच मतोर मति ओर साकरितुन दगिहतुर अनि बेळांगना तुकळांग-तुकळांग किस मतोर अनि बोरे ओन आपुना काबुते किया परोर आस मतोर।

⁵ ओर पकाय पियाल-पोळद गुडितिगा अनि मटा पोरो वलियस दरोज किलसोर आपुने मेन्दुलतुन कलदे जक्मि किन्दुर।

⁶ ओर लकडाल येसुन हुळस विचोर हन्जुन ओन नमस्कार कितुर।

⁷ असके येसु, “हे दुष्टात्मा येर मानेयताल पसियस बाहरो वाय” इदाम दुष्टात्मातुन आग्या हितुर।

⁸ असके ओर पकाय जोरदे इतुर, “हे येसु हजोर परमेस्वरनोर मरि नाकुन नियासंग बाताल बुतो? नाकुन तरास हेमा इदाम नना परमेस्वरना पोरोयते निकुन विनन्ति किन्तोना!”

⁹ अनि येसु ओन पुच्चेमातुर, “निया बाताल पोरोय मन्ता?” ओन येसुन इतुर, “नावा पोरोय सेयना, बाक्याकि माक पकाय लोकुरक मन्तोम” इदाम वेहतुर।

¹⁰ अनि माक इद देशताल बाहरो लोहमा इन्जोर ओर येसुन पकाय विनन्ति कितुर।

¹¹ अगा मटा पोरो उन्दि पदिना गोहडि मेयिला आस मता।

¹² “माक पदिना लोपा हन्दिला पहाजे इन्जोर माक अव पदीना गोहडितिगा लोहचिम इन्जोर ओरक येसुन विनन्ति किस इतुर।”

¹³ आकरिते ओर ओरकुन आग्या हितुर अनि दुष्टात्मा पसियस पदिंगना लोपा उदितुंग, अनि पदिना ओद गोहडि रन्ड हजार मतांग। अव घाटतिगाडाल सान्डेय नहारतिगा हन्ज अरतुंग अनि मुळियस हातुंग।

¹⁴ पदिंग मेहवाल वितसोर सेहेर अनि नाट-नाटेने हन्जुन समाचार वेहतुर अनि बाताल आत अदेन लोकुरक हुळिला वातुरक।

¹⁵ अनि येसुना हेरे वास ओर ओन बगा दुष्टात्मा पयतोर मानेय मतोर अगा ओर सोबाय सन्दरांग लावेकिस अनि कमेक उदस हुळस वरियतुरक।

¹⁶ हुळवालोरक दुष्टात्मा पयतोर मानेयना जिवनतिगा आता पोल्लोंग अनि पदिना बारेता आता सबोय पोल्लोंग ओरकुन वेहतुर।

¹⁷ असके ओरक निमा मावा सिवाताल हन इन्जोर येसुन विनन्ति किन्तोर।

¹⁸ ओर डोंगातिगा अन्जतुर असके दुष्टात्मा मता ओर मानेय नाक मियासंग वायिला हिम इन्जोर विनन्ति किया लागतुर।

¹⁹ मति येसु ओना विनन्तितुन स्विकार केवोर अनि ओन इतुर, “नियागा मया किस प्रबु निया साटि बचोन हजोर बुतो कितोर इन्जोर आपुना लोन हन्ज आपुनोर लोकुरकुन गवाहि वेहा।”

²⁰ अनि येसु नाकुन साटि बदाम हजोर बुतो कितोर इन्जोर ओर हन्ज दिकापुलिस नाटेनिगा वेहिला लागतुर अनि सबोय लोकुरक आश्चरय किन्दुरक।

आयिरोसना हाता पेडि अनि उन्दि बिमार आळ

²¹ येसु असा डोंगाते होदपाकाळ हतुर अनि ओर नहारता टका हेरे मतोर असके उन्दि पकाय भीळ ओनाहेरे जमा आतुरक।

²² असके यहुदि समाज मन्डलिता सरदारनिगाडाल आयिरोस पोरोयतोर वरोर वातुर अनि ओन हुळस ओना काल्कनिगा अरतुर।

²³ अनि “नावा हुडला पेडि हायिला आता, ओद बेस आस जिवित मनि इन्जोर निमा वास ओदेना पोरो कय इरा” इदाम इन्ज ओन पकाय विनन्ति कितुर।

²⁴ अनि पजा येसु ओना संग हतुर अनि पकाय भीळ ओना परके आत इन्जोर लोकुरकला पकाय भीळ ओना हेरे आत।

²⁵ अनि ओद भीळतिगा उन्दि बायि मता। ओदेन बारा वरसाताल आपुना मेन्दुलतिगाडाल नतुर हन्दाना बिमारि मता।

²⁶ ओद पकाय डाक्डरनिकेडाल इलाज साटि पकाय तकलिप सहेनकिस आपुना पुरा धन खरचा कित मति बाराय फायदा आयो असा वने बिमार आस मता।

²⁷ ओद येसुना पोल्लोंग केन्जुन, नना येसुना सन्दरानुंग इटका ते बेस आयका इन्जोर ओद विचार किस,

²⁸ भीळता परकेडाल वात अनि ओना सन्दरानुंग कय इटत।

²⁹ अनि सान्डेय ओदेना नतुर हन्दाना बन्द आत। अनि नना ओद बिमारिताल बेस आतान इन्जोर ओद आपुना मेन्दुलते पुत।

³⁰ नावागाडाल लाव पसियत इन्जोर येसु सान्डेय पुतुर अनि भीळताल परके मिळिच, “नावा सन्दरानुंग बोर कय इटतुर?” इन्जोर पुच्चेमातुर।

³¹ ओनोर चेलालोर ओन इतुर, “भीळ नियागा अरिन्ता इन्जोर निमा हुळान्तोन मति नाकुन बोर इटतुर इन्जोर निमा बाक्या पुच्चेमान्तोन?”

³² बोद ओन इटस मता ओदेन हुळान साटि सबोय बासा हुळतुर।

³³ अनि नना बेस आतान इन्जोर ओद आळ पुन्जुन वरियसोर अनि कसिंगसोर वात अनि ओना काल्कनिगा मुटस ओन सबोय हाल-चाल वेहत।

³⁴ ओर ओदेन इतुर, “पेडि, निया विस्वासते निकुन सुदरे किता, शान्तिते हन अनि इद बिमारिताल पिसेमास मन।”

³⁵ ओर इदाम इन्जोरे मतोर ते समाज मन्डिलितोर मुक्य अदिकारिना लोतिगाडाल लोकुरक वास, “निया पेडि ते हात, इदेक गुरुन बाक्या दुःख हिन्तोन?” इन्जोर इतुरक।

³⁶ येसु ओद पोल्लोतुन केन्जवाप समाज मन्डलितोर अदिकारिन इतुर, “वरियमा, केवल विस्वास किम।”

³⁷ अनि पतरस, याकुब अनि याकुबनोर तमो युहन्नान तासि बोने आपुनासंग वायिला येसु हेवोर।

³⁸ समाज मन्डिलितोर अदिकारिना लोन अवतुरक असके लोकुरक पकाय दुःख आसोर जोरदे किलाना येसु हुळतुर।

³⁹ असके ओर लोपा हन्ज ओरकुन इतुर, “निमाट बाक्या पकाय केयान्तोरिट अनि किलान्तोरिट? पेडि हायो मति हुन्जिला आता।” अनि ओरक ओना मजाक कियाला लागतुरक।

⁴⁰ मति ओरक सबोय लोकुरक पसियस पेडिनोर याल-बाबो अनि आपुनोर संगवालोरासंग लोपा पेडि अरस मता अगा हतुर।

⁴¹ अनि पेडिना कय पयस ओदेन इतुर, “तलिता कुमि” (इदेना अर्थ इदाम मन्ता: “हे पेडि नना निकुन इन्तोना, तेदा!”)

⁴² अनि पेडि सान्डे तेदस वलियला लागतु। ओद बारा वरसाना मता, असके सबोय लोकुरक पकाय चकेमातुरक।

⁴³ पजा इद पोलो बोरे पुन्माकिर इन्जोर ओर ओरकुन होंग आस आग्या हितुर अनि अदेन बाताले तिन्दिला हिम्ट इन्जोर वने इतुर।