मरकुस 3 - Muria Far Western

वतिता कयदोर मानेयतुन येसु सुदरे किन्तोर

¹ येसु असा मन्दिरतिगा हतुर, अगा वरोर मानेय मतोर ओर मानेयना कय वतिता मता।

² अनि येसु पवित्र दिया ओन सुदरे किन्तोर या केवोर इदाम परीसि लोकुरक येसुनिगा दोष लावे कियान साटि सन्दि हुळन्दुरक।

³ असके येसु वतिता कयदोर मानेयतुन इतुर, “तेदा अनि नडुम निता।”

⁴ अनि येसु ओरकुन इतुर, “बाताल पवित्र दिया सुदरे कियाना या गलति कियाना, जिवातुन पिसहाना या नाश कियाना बोद बेस मन्ता?” ओदबेरा परीसि लोकुरक येसुना मुने कमेक मतोरक।

⁵ येसु लोकुरा हिरमुटा हुळसुन दुःखि आस होंगदे ओरकुन नालंगोसबासा हुळतुर अनि वतिता कयवाले मानेयतुन, “निया कयक मुने ताहा” इन्जोर इतुर; ओर आपुना कयक मुने ताहतुर अनि ओना कय बेस आत!

⁶ असके ओर लोकुरक बाहरो पसियतुरक अनि ओन बदाम होवकिकाट इन्जोर हेरोदि राजाना मदत केवालोरासंग वळकिला लागतुरक।

येसुना परके पकाय भीळ

⁷ येसु आपुनोर चेलालोरासंग समुद्रतीके हतुर, अनि गलील प्रदेशतोर लोकुरा पकाय भीळ ओना परके वातुरक।

⁸ अनि यहुदिया, येरुसलेम, इदुमिया अनि यरदना हबाटा सूर अनि सिदोनता हेरेटाल लोकुरा पकाय भीळ ओना आश्चरयता बुतोता बारेते केन्जुन ओना हेरे वातुरक।

⁹ असके भीळ नाकुन बोदे तकलिप आयमाकि इन्जोर येसु आपुनोर चेलालोरकुन, भीळता कारण उन्दि हुडिला डोंगा नावा साटि तयार किम इन्जोर इतुर।

¹⁰ बाक्याकि ओर पकाय लोकुरकुन सुदरे किस मतोर इन्जोर बचोक लोकुरक बिमार मतोर ओर लोकुरक येसुन इटान साटि ओना परके लागस मतोरक।

¹¹ दुष्टात्मा पयतोर लोकुरक ओन हुळन्दुरक असके ओना मुने मुटिन्दुरक अनि “निमा परमेस्वरनोर मरि आन्दि” इन्जोर जोरदे इन्दुरक।

¹² अनि “नना बोर आन्दान इन्जोर निमाट लोकुरकुन वेहमाट” इन्जोर ओर ओरकुन चेतेकिस इन्दुर।

येसु बारा चेलालोरकुन आचान्तोर

¹³ पजा येसु मटा पोरो हतुर अनि बोर लोकुरकुन केयाना इच्चा किन्दुर ओरकुन आपुना हेरे केयतुर अनि ओरक येसुना हेरे वातुर।

¹⁴ असके ओरक ओनासंग मनिर अनि ओरकुन प्रचार कियाला लोहिर

¹⁵ अनि दुष्टात्मातुन पसियाना अदिकार इरिर इन्जोर येसु ओरा निगाडाल बारा लोकुरकुन आचतुर अनि ओरकुन येसुना खास चेला लोकुरक इन्जोर केयतुर।

¹⁶ अनि बारा चेलालोर येरक आन्दुरक, शिमोन येना पोरोय येसु पतरस इरतुर।

¹⁷ अनि जबदिनोर मरि याकुब अनि याकुबनोर तमो युहन्ना, अनि ओना पोरोय बुवनरगिस इदाम येसु इरतुर, इदेना अर्थ गर्जनतोर मरि इन्जोर मता।

¹⁸ अनि अन्दरियास, अनि फिलिपुस, अनि बरतुलोमायि, अनि मत्ति, अनि थोमा, अनि हलपिनोर मरि याकुब, अनि तद्दायि, अनि शिमोन कनानि।

¹⁹ अनि बोर येसुन पयिस हितुर ओर यहुदा इस्करियोति।

दुष्टात्माता सरदारताल वने येसु पकाय लाववाले मन्तोर

²⁰ येसु लोन वातुर असके ओरक रोटिंग वने तिन्दा परोर आतुरक इदाम भीळ आत।

²¹ अनि येसुना परिवार इद केन्जतुर अनि ओना मन उन्दि जागा हिले इदाम इन्जुन ओरक ओन पयान साटि पसियतुरक।

²² अनि येरुसलेमतिगाडाल वातोर मूसाना नियमतुन करिहवालोरक वने “ओनिगा बालजबुल मन्ता” इन्जोर इतुरक। अनि दुष्टात्माता सरदारना मदतते ओर दुष्टात्मातुन पुळान्तोर इन्जोर इतुरक।

²³ इन्जोर येसु ओरकुन हेरे केयसुन उदाहरनते वळकिला लागतुर, “सयतान बदाम सयतानतुन टन्ड परान्ता?

²⁴ बोदायि राज्यते आप आपुनाय वाहचाना आन्ता ते ओद राज्य नाश आन्ता।

²⁵ अनि बोदायि लोतिगा आप आपुनाय वाहचाना आन्ता ते ओद लोन वने नाश आन्ता।

²⁶ इन्जोर सयतान आपुनाय विरुद होंग कियानुर ते सयताना राज्य बदाम बनेमास मन्दार; ओना नाश आयार।

²⁷ पहेलवानतुन दोहोर आयनुर ते कलेर मानेय बोरायि पहेलवानना लोतिगा होळियस ओना संपति कलिला परोर, पहेलवानतुन दोहानुर ते ओना लोता संपति कलिला परान्तोर।

²⁸ अनि मानेयतोर मरिना विरुद पाप कितोर ओर लोकुरकुन मापि किया लागार इन्जोर नना मिकुन खरोय इन्तोना।

²⁹ मति बोरायि पवित्र आत्माता विरोदते निन्दा केविर ते ओन परमेस्वर बसकेय मापि किया परोर अनि ओर अनन्त काळता दन्ड साटि अपरादि ठहरे मायनुर।”

³⁰ अनि “ओनागा बोदे दुष्टात्मा मन्ता इन्जोर हुचुक लोकुरक इन्दुर” इन्जोर येसु इद पोल्लो इतुर।

येसुना अवहारि अनि तमोलोरक

³¹ येसुना अवहारि अनि तमोलोरक वासुन बाहरो नितस येसुन केयिला लोहतुरक।

³² येसुना हेरे पकाय भीळ उदस मता; असके वरोर मानेय येसुन इतुर, “हुळा, निया अवहारि अनि तमोलोरक बाहरो निकुन पळकिला आतोरक।”

³³ येसु ओन उत्तर हितुर, “नावा अवहारि अनि तमोलोरक बोर आन्दुर?”

³⁴ अनि ओना हेरे उदस मतोर ओर लोकुरकुन हुळस इतुर, “हुळाट, नावा अवाह अनि तमोह येरकेय आन्दुरक!

³⁵ बाक्याकि बोरायि परमेस्वरना इच्चाते ताकान्तोर ओरे नावोर तमो, हेलाळ, अनि अवाल आन्द।”