मरकुस 2 - Muria Far Western

येसु लकवा बिमारितुन सुदरे किन्तोर

¹ हुचुक दियांगना पजा येसु कफरनहुम सहेरतिगा वातुर अनि ओर लोन मन्तोर इन्जोर इद पोल्लो सान्डे नाटेनिगा फयलेमात।

² पजा ओद लोता दरवाजता मुने जागा हिले आस मता अचोन पकाय लोकुरक जमा आतुरक। अनि येसु ओरकुन पोल्लो वेहन्दुर।

³ ओदबेरा ओरागाडाल नालुरक मानेयक वरोर लकवा बिमार मानेयतुन कटुलतिगा ताहच येसुना हेरे ततुरक।

⁴ मति लोकुरा पकाय भीळ मता इन्जोर येसुना हेरे हन्दा परोर ते ओरक येसु मन्दुर अगा पोरोडांग कवलानुंग गुचिचुन लकवावाले मानेय मतोर ओद कटुल ओनासंग अगा वळिहतुरक।

⁵ येसु ओरा विस्वास हुळस लकवा बिमार मानेयतुन, “हे मरि, नना निया पापतुन मापि कितान” इन्जोर इतुर।

⁶ असके अगा उदितोरक मूसाना नियमतुन करिहवालोरक “येर मानेय इदाम बाक्या परमेस्वरना अपमान किन्तोर?

⁷ परमेस्वरदुन तासिस बोर पापतुन मापिकिया परान्तोर!” इन्जोर आपुना मन्दे विचार किया लागतुरक।

⁸ ओरक आपुना मन्दे इदाम विचार कियाला आतोरक इन्जोर येसु सान्डेय आपुना मन्दे पुन्जुन ओरकुन इतुर, “निमाट आप-आपुना मन्दे इद विचार बाक्या कियाला आतोरिट।

⁹ ‘लकवा बिमारि मानेयतुन निया पापता मापि आत इदाम इन्दाना या तेदा आपुना कटुल ताहच वलिया इदाम इन्दाना बोद सोपो मन्ता’?

¹⁰ दरतितिगा पापता मापि कियाना वने मानेयतोर मरिन अदिकार मन्ता इदाम मिक पुन्किट” इन्जोर येसु लकवा बिमार मानेयतुन इतुर:

¹¹ “तेदा आपुना कटुल ताहच लोन हन इन्जोर नना निकुन इन्तोना” इदाम वेहतुर।

¹² ओर लकवा बिमारि मानेय सान्डेय तेदितुर अनि आपुना कटुल ताहच सबोय लोकुरकना मुने पसियस हतुर। असके सबोय लोकुरक दंगे मातुरक अनि “माक इदाम बसकेय हुळोम” इन्जोर परमेस्वरना महिमा किस वळकिला लागतुरक।

येसु लेविन आचान्तोर

¹³ येसु असा पसियस समुद्रता टकातिगा हतुर अनि पुरा भीळ ओना हेरे वात अनि येसु ओरकुन उपदेश हिया लागतुर।

¹⁴ हन्दानपा ओर हलपायिनोर मरि लेविन टाक्स नाकादिगा उदस मन्दुर ते हुळतुर, “नावा परके वाय” इदाम ओन इतुर अनि ओर तेदस येसुना परके वातुर।

¹⁵ येसु हलपायिना मरिना लोन जेवे कियाला उदितुर असके पकाय टाक्स येतवालोरक अनि पापि लोकुरक येसु अनि ओनोर चेलालोरासंग जेवे कियाला उदितुरक, बाक्याकि ओना परके वास मतोरक पकाय लोकुरक मतोरक।

¹⁶ येसु ते पापि अनि टाक्स येतवालोरासंग जेवे कियाला आतोर इन्जोर मूसाना नियमतुन करिहवालोरक अनि परीसिलोरक हुळस ओनोर चेलालोरकुन, “येसु ते टाक्स येतवाल अनि पापिलोरासंग बाक्या तिन्तोर उन्तोर?” इन्जोर पुच्चेमातुरक।

¹⁷ येसु इद केन्जचुन ओरकुन, “सोबाय लोकुरकुन आयो मति बिमार मानेयतुन डाक्डरना जरुरि मन्ता। नना परमेस्वरना मुने येताना योग्य बुतो केवाल मन्तोना इदाम आपुनतुन समजेमायवाल लोकुरकुन साटि आयो मति माक पापि लोकुरक आन्दोम इदाम विचार केवालोरकुन केयान साटि नना वातोना” इन्जोर इतुर।

उपासता प्रश्न

¹⁸ युहन्नानोर चेलालोरक अनि परीसिनोर चेलालोरक उपास पयन्दुर, इन्जोर हुचुक लोकुरक वास येसुन इदाम पुच्चेमातुरक, “युहन्नाल अनि परीसिनोर चेलालोर बाक्या उपास पयान्तोरक मति बाक्या नियोर चेलालोरक उपास पयोरक।”

¹⁹ येसु ओरकुन इतुर, “बोदवनाह दुलाल बरातिसंग मन्तोर अचोवनाह बाताल ओरक उपास कियाकिट बहे? बोदवनाह दुलाल वरातिसंग मन्तोर अचोवनाह ओरक उपास पयोरक।

²⁰ मति दुलहान ओरागाडाल अलगो कियाना दिया वायनुंग असके ओरक उपास कियानुरक।

²¹ पुनाल कपळाना पट्टि जुनाह सन्दरानासंग बोरे लावे केवोर, अदाम कियानुर ते ओद कपळाना पट्टि जुनाह सन्दराहनुंग हरहार।

²² पुनाह अंगुरता जोमातुन जुनाल चमडाता जोरियातिगा बोरे इरोरक। आयोते पुनाह अंगुरता जोमा जुनाल चमडाता जोरियातुन हिक्सियार। अनि अंगुरता जोमा जुनाल चमडाता जोरिया रन्डास नाश आयनुंग, मति पुनाल अंगुरता जोमा पुनाल चमडाता जोरियातिगाय निह लागान्ता।”

येसु पवित्र दियाता वने प्रबु

²³ येसु येहुदि लोकुरा पवित्र दिया डन्डताल हन्दुर असके ओनोर चेलालोरक ताकसोर ताकसोर उचुन गोहकुन कोयन्दुर।

²⁴ असके परीसि लोकुरक इतुरक, “हुळाट, पवित्र दिया इदाम बुतो बाक्या किन्तोरिट पवित्र दियाता नियमता अनुसार इद पोलो मन्ता।”

²⁵ अनि येसु ओरकुन इतुर, “दावुद राजान गरज मता असके ओर अनि ओनोर संगवारिहकुन करवस्तु असके ओर बाताल किस मतोर इन्जोर बाक्या निमाट बसकेय वाचे केविट?

²⁶ ओर अबियातार महायाजकना पहारात परमेस्वरना मन्दिरतिगा हन्जुन अगाडांग परमेस्वरिन समरपित किता हारिनुंग तितुर। याजक लोकुरा रोटिंग याजक लोकुरकुन हरचुन दुसरो बोरे लोकुरकुन तिन्दिला पोलो मता, मति ओर संगवालोरकुन वने ओव रोटिंग हितुर।”

²⁷ असके ओर परीसि लोकुरकुन इतुर, “मानेय पवित्र दिया साटि आयो मति पवित्र दिया मानेय साटि बनेहकितोर मन्ता।

²⁸ इन्जोर नना मानेयतोर मरि पवित्र दिनतोर वने प्रबु आन्दान।”