मरकुस 16 - Muria Far Western

येसुना असा जिवेमायाना

¹ यहुदि लोकुरा पवित्र दिया मारत असके मरियम मगदलनि, याकुबना अवहारि मरियम अनि सलोमि हन्जुन येसुना मेन्दुलतुन लावे कियान साटि सोबाय दयमुरता चिजक अस्ततुंग।

² हपताता पहले दिया मन्जे इतवार दिया पोळद पसियाना मुने अव बिजगुडितिगा वातुंग।

³ अनि वायानपा, “मावा साटि बिजगुडिता दरवाजाताल कलदुन बोर गुचहानुर?” इन्जोर अव आपसते इन्दुंग।

⁴ मति कल गुचता मता इन्जोर अगा हतपा अव हुळतुंग, ओद कल पकाय हजोर मता।

⁵ बिजगुडिता लोपा हतुंग असके अव वरोर लयोरिन पान्डरिंग सन्दरांग पोन्डस तिन्दानबासा उदस मतोर इदाम हुळतुंग अव पकाय दंगे मातुंग।

⁶ ओर अवेहकुन इतुर, “निमाट दंगे मायमाट। कुरुस पोरो अन्जिहच हव्कतोर ओर येसु नासरिन निमाट पळकान्तोरिट। ओर असा जिवेमातोर; ओर इगा हिलेर। हुळाट! ओरक येसुन इरस मता जागा इद मता।

⁷ मति निमाट हन्ज ओना चेलालोरकुन अनि पतरासिन ‘ओर मिया मुने गलीलतिगा दायनुर इन्जोर वेहाट, ओन बदाम पहले इन्ज मतोर अदामे निमाट ओन अगा हुळकिट इदाम वेहाट।’ ”

⁸ अनि अव वरे अनि आश्चरयता मारे बिजगुडिताल पसियस वितितुंग अनि वरेता मारे अव बोने बाताले इनोंग।

मरियम मगदलनिन येसु दिसान्तोर

⁹ (आटवळाता पहले दिया मन्जे इतवार दिया पोळद पसियाना मुने येसु असा जिवेमासुन पहले मगदलनि पोरोयता नाटेना मरियमतुन दिसतुर। ओदेनिगाडाल येसु सात दुष्टात्मातुन पसिहिस मतोर।

¹⁰ ओद हन्जुन दुःखते डुब्बेमास अनि किलिंगसोर मतोरक ओर चेला लोकुरकुन इद समाचार हितु।

¹¹ येसु जितो मन्तोर अनि ओद येसुन हुळता इन्जोर ओर केन्जतुरक मति ओरक अदेन विस्वास केवोरक।

इवुर चेलालोरकुन येसुना दिसाना

¹² पजा इवुरक चेला लोकुरक नाटेनिके हन्ज मतोर असके ओर दुसरो रुपते ओरकुन ओर दिसतुर।

¹³ ओरक वने हन्जुन माक येसुन हुळतोम इन्जोर दुसरो चेलालोरकुन वेहतुरक मति ओरक वने ओद पोल्लो विस्वास केवोरक।

येसुना खास चेलालोरक साटि येसुना हजोर आग्या

¹⁴ अकरा चेलालोरक जेवेकियाला उदस मतोरक असके ओरकुन येसु दिसतुर। अनि ओर जितो आतपा बोर बोर ओन हुळस मता ओरा गवाहितुन विस्वास केवो आस मतोर इन्जोर येसु ओरा अविस्वासतुन रांगतुर।

¹⁵ येसु ओरकुन इतुर, “निमाट दरतिता सबोय जागादिगा हन्जुन सबोय लोकुरकुन सोबाता पोल्लो प्रचार किम्ट।

¹⁶ बोर विस्वास किस बपतिस्मा येतानुर ओनाय पिसहानुर मति बोर नावागा विस्वास केवोरक आयनुरक ओरकुन दन्ड पुटार।

¹⁷ अनि विस्वास केवालोरनिगा इदाम चिन्ह मन्दार: नावा पोरोयते ओरक दुष्टात्मातुन पसिहियानुरक, ओरक पुनांग-पुनांग बोलिंग वळकानुरक।

¹⁸ ओरक तरासकुन ताहानुरक अनि ओरक जेहेर वने उन्डानुरक ते बाराय आयो आयार अनि ओरक बिमार लोकुरा पोरो कय इरानुरक ते ओरक चंगा आयनुरक” इन्जोर इतुर।

येसुना स्वरगारोहण

¹⁹ प्रबु येसु ओरासंग वळकसोर मतोर असके ओर स्वरगतिगा ताहतुर अनि परमेस्वरना तिन्दान कयबासा उदितुर।

²⁰ अनि ओरक पसियस सबोय जागा सोबाता पोल्लो वेहतुरक, अनि प्रबु ओरासंग बुतो किसोर मतोर। अनि ओर वेहता सोबाता पोल्लो खरोय मन्ता इन्जोर ओद चिन्हाता द्वारा प्रबु मजबुत किसोर मतोर। आमिन।)