मरकुस 15 - Muria Far Western

राजपाल पिलातुसना मुने येसु

¹ पोळद पसियाना पहारात मुक्याल याजक लोकुरक अनि यहुदि अदिकारि लोकुरक अनि मूसाना नियमतुन करिहवालोरासंग यहुदि महा सभा सान्डे सल्ला किस येसुन दोहच ओसुन पिलातुसना कयदे सोपेकितुर।

² पिलातुस येसुन पुच्चेमातुर, “बाताल निमा यहुदिलोरा राजाल आन्दि?” येसु पिलातुसतुन उत्तर हितुर, “ओद निमाय इन्दिला आतोन।”

³ मुक्याल याजक लोकुरक येसुना पोरो दुसरो पकाय पोल्लोंगता दोष लावे किन्दुरक।

⁴ पिलातुस येसुन असा पुच्चेमातुर, “बाताल निमा बाराय उत्तर हेवि? हुळा येरक निकुन बचोक पोल्लोता दोष हियाला आतोरक।”

⁵ येसु असा वने बाराय उत्तर हेवोर इन्जोर पिलातुसतुन पकाय आश्चरय आतुर।

पिलातुस येसुन हव्काना साटि दन्ड हिन्तोर

⁶ ओद हनुमता दियाते लोकुरक विनन्ति किया बोरायि वरोर कयदितुन तासियाना पिलातुसना रिवाज मता।

⁷ बरब्बास पोरोयतोर वरोर मानेय मतोरक। ओर रोमि शासनता विरुद आता वाहचनातिगा पकाय लोकुरकुन हव्कस मतोरक, ओरक कयदि लोकुरकनिगा वरोर मतोर।

⁸ अनि पकाय भीळ हन्ज दरवरसांग निमा हनुमता दिया वरोर कयदिन सोळे किन्तोन अदाम लेहका वरोर कयदिन सोळेकिम इन्जोर पिलातुसिन विनन्ति कियाला लागतुरक।

⁹ मुक्याल याजक लोकुरक येसुन दोखाते पयस मतोर इन्जोर पिलातुस पुन्ज मतोर। इन्जोर पिलातुस ओरकुन उत्तर हितुर,

¹⁰ “नना मिया साटि यहुदियातोर राजान सोळे कियाका इन्जोर बाताल मिया इच्चा मन्ता?” इन्जोर पुच्चेमातुर।

¹¹ मति येसुना बदला बरब्बासतुन सोळे केविर इन्जोर मुक्याल याजक लोकुरक सबोय लोकुरकुन दमके किसोर मतोरक।

¹² इदाम केन्जुन पिलातुस ओरकुन असा पुच्चेमातुर, “मति निमाट यहुदिलोरा राजा इन्तोरिट ओर मानेयतुन नना बाताल कियाका?”

¹³ ओरक असा जोरदे केयतुरक, “ओन कुरुस पोरो अन्जहिच हव्किट।”

¹⁴ पिलातुस ओरकुन इतुर, “येर बाताल गलति कितोर?” मति ओरक असा जोरदे केयन्दुरक, “ओन कुरुस पोरो अन्जहिच हव्किट।”

¹⁵ असके पिलातुस भीळतुन गिरदा कियान साटि बरब्बासतुन तासितुर अनि येसुन सोटाते हाहस कुरुस पोरो अन्जहिच हव्किर इन्जोर ओन लोकुरकनिगा सोपेकिसितुर।

सयनिक लोकुरक येसुन अपमान किन्तोरक

¹⁶ रोमि सयनिक लोकुरक येसुन राजवाडाता डुवारतिगा ओतुरक अनि सबोय सयनिक लोकुरकुन केयतुरक।

¹⁷ असके ओरक येसुन रेंगाल रंगता कुरता करिहतुरक अनि काटाता मुकुट ओना तलापोरो इरतुरक।

¹⁸ “हे यहुदिलोरा राजा नमस्कार” इदाम इन्ज ओरक ओन नमस्कार कियाला लागतुरक।

¹⁹ ओरक येसुना तलातुन सोटाते हिन्दुरक, ओना पोरो उक्सतुरक अनि मिन्डांग टेकेकिस नमस्कार किसोर मन्दुरक।

²⁰ ओरकुन आपुना बुतो किस तरास वात असके ओनापोरोडाल रेंगाल रंगता कुरता रेहच ओनांग सन्दरांग पोन्डिहतुर। अनि ओन कुरुस पोरो अन्जिहला साटि बाहरो ओतुरक।

येसुन कुरुस पोरो अन्जहाना

²¹ सिकन्दर अनि रुपुसनोर बाबो शमोन कुरेनि नाटेनोर मतोर। ओर नाटेनिगाडाल वास मतोर। ओर येसुना हेरेटाल हन्दुर असके सयनिक लोकुरक शिमोनिन पयस येसुना कुरुस पयिला जबरदस्ति कितुरक।

²² ओरक येसुन गुलगुता पोरोयता जागादिगा ततुरक। (गुलगुताना अर्थ जोपळिता जागा इन्जोर मन्ता।)

²³ अगा सयनिक लोकुरक येसुन लोहवान अंगुरता जोमा हिया लागतुरक मति येसु अद उन्डोर आतुर।

²⁴ असके सयनिक लोकुरक येसुन कुरुस पोरो अन्जिहतुर अनि ओना सन्दरानुंग अलग भाग किस बोन बोद भाग पुटार इन्जोर ओरक अदेना पोरो चिटिंग वाटतुरक।

²⁵ ओरक येसुन कुरुस पोरो अन्जिहतुरक असके सकारता नोव नेकस मता।

²⁶ “यहुदिलोरा राजा” इदाम उन्दि दोषपत्र कोटता पाटि ओनागा लावेकिसितुरक।

²⁷ ओरक येसुनासंग रन्ड डाकुलोरकुन वरोर ओना तिन्दान कयबासा अनि दुसरोन डावो कयबासा कुरुस पोरो अन्जिहतुरक।

²⁸ (इद रितिते, “दुष्ट लोकुरकनिगा ओना गिन्ति आत” इन्जोर येसुना बारेता पवित्र पुस्तकता वाचा पुरा आत।)

²⁹ अनि हरिताल हनवालोरक तला होलियस-होलियस “वा, वा, मन्दिरतुन अरिहवाल अनि मून्ड दियाने पुरा बनेह केवाले,

³⁰ कुरुस पोरोडाल रयस आपुनतुन पिसहा” इदाम ओना निन्दा कियाला लागतुरक।

³¹ इदामे मुक्याल याजक लोकुरक अनि नियमतुन करिहवालोरक अनि यहुदि मुक्यालोकुरक आपसते येसुना बारेते मजाक कितुरक: “येर दुसरो लोकुरकुन पिसिहतुर मति आपुनतुन पिसिह परोर।

³² माक हुळस विस्वास कियाकोम इन्जोर इस्रायेलतोर राजा मसि इदेक कुरुस पोरोडाल रयस वायिर।” अनि ओनासंग कुरुस पोरो अन्जिहच मतोरक इवुर डाकुलोरक वने येसुन ओना निन्दा किन्दुरक।

येसुना हायाना

³³ अनि दुपाडा बारा नेक्सुन ते मून्ड नेक्नाहका देशतिगा सबोय आन्दार आस मता।

³⁴ अचोय बेरा येसु पकाय जोरदे किलतुर, “एली, एली, लमा शबक्तनि?” इदेना अर्थ, “हे नावोर परमेस्वर, हे नावोर परमेस्वर, निमा नाकुन बाक्या सोळेकिति?” इदाम मन्ता।

³⁵ ओना हेरे नितस मतोरक ओर लोकुरकनिकेडाल हुचुलोरक इद केन्जुन, “हुळाट ओर एलियान केयान्तोर” इन्जोर वेहतुरक।

³⁶ इन्जोर ओरागाडाल वरोर मानेय वितसोर हन्ज उन्दि स्पंज हवियता अंगुरता जोमातिगा नाहतुर अनि वदुरता उन्दि लाटितिगा इरस: “पोसाट! एलिया ओन अडिय रेहिला वान्तोर या वायोर इद माक हुळकाट” इन्जोर वेहचुन ओर येसुन उन्दिला हितुर।

³⁷ असके येसु पकाय किलसोरिन जिवा तासितुर।

³⁸ अनि येरुसलेम मन्दिरता पळदा पोरोडाल अडियवनाह हरस रन्ड तुकळांग आतुंग।

³⁹ ओना मुने नितस मतोर वरोर रोमि सयनिक लोकुरा अदिकारि येसुन जोरदे केयस जिवा तासियाना हुळसुन, “खरोय येर मानेय परमेस्वरनोर मरि मतोर” इन्जोर इतुर।

⁴⁰ हुचुक आसक वने लकडाल हुळन्दुंग। अवेहनिगाडाल मरियम मगदलनि, हुडलोर याकुबना अनि योसेसना अवहारि मरियम अनि सलोमि मतांग।

⁴¹ येसु गलीलतिगा मतोर असके ओना सेवा किस अव ओना परके आन्दुंग। अनि ओनासंग येरुसलेमतिगा वास मतांग दुसरो पकाय आसक वने मतांग।

येसुना मिसाना

⁴² ओदबेरा पोळद मुलस मता अनि इद यहुदिलोकुरा रिति रिवाज अनुसार तयारिता दिया मन्जे पवित्र दियाता मुनेटा दिया मता।

⁴³ अनि परमेस्वरना राज वायाना हर हुळस मतोर ओर अरिमतियातिगा मन्वाल यूसुफ पोरोयतोर वरोर मतोर। ओर यहुदिलोकुरा हजोर सभातोर सदस्य मतोर। ओर हिमत किस पिलातुसना हेरे हतुर अनि येसुना मुरदातुन तल्कतुर।

⁴⁴ ओर सान्डेय हातुर इन्जोर केन्जुन पिलातुस आश्चरय किस ओर सुबेदारतुन केयस बाताल येसु हातोर इदाम पुच्चेमातुर।

⁴⁵ पिलातुस सुबेदार निकेडाल हाल जानेमातुर असके येसुना मुरदातुन युसुपतुन हितुर।

⁴⁶ असके यूसुफ उन्दि लाटिवाले चादर अस ततुर। अनि येसुना मुरदातुन ओर रेहच ओद चादर हुरहितुर अनि उन्दि आदितिगा कातस मतोर बिजगुडितिगा इरतुर अनि बिजगुडिता दरवाजतिगा उन्दि कल दुरस मुचतुर।

⁴⁷ ओन बगा इरतोर इन्जोर मगदलनि पोरोयता नाटेना मरियम अनि योसेसना अवहारि मरियम हुळिला आस मतांग।