मरकुस 14 - Muria Far Western

येसुन पयान साटि दोखा बनेकिन्तोर

¹ रन्ड दियाना पजा पसहा अनि अखमिरि रोटिता हनुम वायवाल मता। येसुन बदाम दोखाते पयस होवक्स वाटाना इन्जोर मुक्य याजक लोकुरक अनि मूसाना नियमतुन करिहवालोरक विचार किन्दुरक।

² मति पोलो दिया पयकाट ते लोकुरक वाहचानुरक इन्जोर ओरक इन्दुरक।

बेथानियातिगा उन्दि आळ येसुना पोरो दयमुर निय दोसान्ता

³ येसु बेथानियातिगा शिमोन पोरोयतोर मानेयना लोतिगा जेवे कियाला उदस मतोर। ओन पहले कुष्टरोग मता। असके उन्दि आळ लोपा वात, ओदेना कयदे जटामांसि मराताल टन्डता पकाय किमतिता शुद्ध दयमुर निय निन्दिता उन्दि पकाय किमतिवाला कलदा बरणि मता। ओद बरणि पोरोडा भाग ओहच ओद निय येसुना तलापोरो वडियत।

⁴ मति बोरे बोरे आपुना मन्दे होंग किस इन्दा लागतुरक “इद नियतुन बाक्या इदाम नाश कितु।

⁵ ओद निय वरोर मजुरना उन्दि वरसाता मजुरिताल पकाय किमतते मोमस मनवार अनि अदाम पुटतांग डबुंग गरिब लोकुरकुन वाटे किस परन्दु इन्जोर ओरक अदेना विरोद होंगते इतुरक।”

⁶ येसु ओरकुन इतुर, “ओदेन सोळेकिम्ट ओदेन बाक्या तकलिप किन्तोरिट? ओद नावा साटि सोबाय बुतो किता।

⁷ गरिब लोकुरक मियासंग दरोज मन्तोरक अनि मिया इच्चा कियानपा ओरकुन सोबाय मदत किया परान्तोरिट मति नना ते मियासंग दरोज मन परोन आयका।

⁸ ओद नावा साटि बोद कियापरत ओद कित। नावा मिसानाता मुने ओद नावा मेन्दुलपोरो जटामासिता निय दोसत।

⁹ पुरा जगते बगाय आयि सोबाता पोल्लो वेहानुर अगा ओद आळता बुतोता वने चर्चा आटवन कियानुरक इन्जोर नना मिकुन खरोय इन्तोना।”

यहुदा विस्वासघात किन्तोर

¹⁰ यहुदा इस्करियोति येसुना बारा चेलारिगाडाल वरोर मतोर। ओर येसुना विस्वासघात किस येसुन पयस हियाला साटि मुक्याल याजक लोकुरकनिके हतुर।

¹¹ यहुदा वायाना कारण समजेमात असके मुक्याल याजक लोकुरक गिरदा आतुरक। अनि ओरक युदान डबुंग हियाका इन्जोर वाचा कितुरक। इन्जोर ओर येसुन पयस हियाला सन्दि हुळन्दुर।

चेलालोरकनासंग पसहाता आकरि जेवन

¹² अखमिरि रोटिता हनुमता पहले दिया यहुदि रिति रिवाचता अनुसार बोकळा पिलातुन असकान्तोर ओद दिया ओनोर चेलालोर येसुन पुच्चेमातुरक, “माक हन्ज निया साटि पसहाता जेवन बगा तयारि कियाकोम?”

¹³ येसु आपुनोर चेलाहनिगाडाल रन्ड मानेयकुन इदाम इन्ज लोहतुर, “निमाट सहेरते हन्ट अनि उन्दि अळकाते वरोर मानेय एर ओयानपा मिकुन मिलेमायनुर ओना परके हन्ट।

¹⁴ अनि ओर बोद लोन दायनुर ओद लोतोर मालकान इन्ट, ‘नेन्ड नुलपेबेरा माक पसहाता जेवन कियान साटि बोद खोलि निमा तयार किस इरतोन ओद हुळान साटि मावोर गुरु नियाके लोहतोर’ इन्जोर ओन वेहाट।

¹⁵ ओर मिकुन अद माळिता पोरो सजेह किस तयार किता उन्दि हजोर खोलि तोहानुर अगा जेवन तयारि किम्ट।”

¹⁶ चेलालोर पसियस सहेरतिगा वातुरक अनि येसु बदाम इन्ज मतोर अदामे आत अनि अगा पसह तयार कितुरक।

¹⁷ पोळद मुलत असके येसु बारा चेलालोरासंग वातुर।

¹⁸ ओरक उदस जेवन किन्दुरक असके येसु इतुर, “मियागाडाल वरोर मानेय ओर नावासंग जेवन कियाला आतोर ओन नाकुन पयस हियानुर इन्जोर नना मिकुन खरोय इन्तोना।”

¹⁹ ओरक दुःखि आतुरक अनि ओरक वरोर वरोर मानेय येसुन इदाम इन्दा लागतुरक, “बाताल नना आन्दान? बाताल नना आन्दान?”

²⁰ येसु ओरकुन इतुर, “ओर बारातिगाडाल वरोर मन्तोर इदेक ओर नावासंग दळियातिगा कय वाटिला आतोर।

²¹ बाक्याकि नना मानेयतोर मरि पवित्र पुस्तकतिगा कोटता लेहका हायका। मति बोना द्वारा नना मानेयतोर मरिनुन पयपियान्तोर ओर मानेयतुन हाय! ओर मानेय जनम आयो आस मनेर ते ओना साटि बेस आस मनेर” इन्जोर ओर इतुर।

प्रबु-जेवन

²² ओरक तिन्दिला आस मतोरक असके येसु रोटि पयतुर अनि प्रार्थना किस ओदेना तुकळांग किस ओरकुन हितुर अनि इतुर, “इद नावा मेन्दुल आन्द।”

²³ पजा ओर वाटि पयस धन्यवाद कितुर अनि ओरकुन हितुर ओर सबोयलोर अगडाल उतुरक।

²⁴ अनि येसु ओरकुन इतुर, “इद नावा नतुर आन्द, इद नतुर पकाय लोकुरक साटि किता बलिदान मन्ता। इद नतुरते परमेस्वर आपुना लोकुरासंग किता करारतुन मजबुत किन्तोर।

²⁵ परमेस्वरना राज्यतिगा पुनांग अंगुरता जोमा उनोन आयका अचोवनाह नना असा इद अंगुरता जोमा उनोन आयका इन्जोर मिकुन खरोय इन्तोना।”

²⁶ ओरा जेवन मारतु असके पजा ओरक भजन इन्जुन जयतुन मटा पोरो हतुरक।

पतरसना इन्कारता भविष्यवाणि

²⁷ येसु ओरकुन इतुर, “निमाट सबोय लोकुरक नाकुन वरोरे तासिस दाकिट बाक्याकि ‘नना बेळांग मेहवालिल असकिका अनि बेळांग हिके-होके आयनुंग’ इन्जोर पवित्र पुस्तकतिगा कोटता मन्ता।

²⁸ मति नना असा जिवेमायका अदेना पजा मिया मुने गलीलतिगा दाका” इन्जोर वेहतुर।

²⁹ पतरस येसुन इतुर, “निकुन सबोय लोकुरक सोळेकियानुरक मति नना निकुन बसकेय सोळे केवोन।”

³⁰ येसु पतरसतुन इतुर, “नेन्ड नरका रन्ड बेरा कोर कुसाना मुने निमा नाकुन मून्ड बेरा इन्कार कियाकि इन्जोर नना निकुन खरोय इन्तोना।”

³¹ मति पतरस असा हिमतते इतुर, “नियासंग नाकुन हायलागार ते वने नना निकुन इन्कार केवोन आयका” इन्जोर वेहतुर। अनि बाकितोर चेलालोर वने इदामे इतुरक।

येसु गतसमनि पोरोयता बगिचातिगा प्रार्थना किन्तोर

³² पजा ओरक गतसमनि पोरोयदा बगिचातिगा वातुरक अनि येसु आपुनोर चेलालोरकुन इतुर, “नना प्रार्थना मारनावनाह निमाट इगा उदस मन्ट।”

³³ अनि येसु, पतरस, याकुब अनि युहन्नान आपुनासंग ओतुर अनि ओर पकाय दुःख अनि व्याकुल आयिला लागतुर।

³⁴ अनि येसु ओरकुन इतुर, “नावा जिवा हायाना लेहका पकाय दुःखि आतोना। निमाट इगा केपसोर मन्ट हुन्जमाट।”

³⁵ पजा येसु हुचुन्सा मुने विळतुर अनि जागातिगा अडिय मुरसुन प्रार्थना कियाला लाकतुर, नावागा वायवाल मन्ता ओद सन्कट लक आयि इन्जोर प्रार्थना कियाला लागतुर।

³⁶ “हे बाबाल निमा सबोय किया परान्तोन। इद पकाय तकलिपता सहनतुन नावा हेरेटाल लक किम, नावा इच्चा आयो मति निया इच्चा बदाम मन्ता अदाम आयि” इन्जोर इतुर।

³⁷ पजा येसु वातुर अनि ओरकुन हुन्जानपा हुळस पतरसतुन इतुर, “हे शिमोन, निमा हुन्जिला आतोन, बाताल निमा उन्दि तास वने केपिला परवि?

³⁸ निमाट परिक्षाते अरवि आयकिट इन्जोर केपसोर मन्जुन प्रार्थना किसोर मन्ट। आत्मा तयार मन्ता मति मेन्दुल कमजोर मन्ता।”

³⁹ येसु असा हतुर अनि ओर मुने प्रार्थना किता अवेय पोल्लोते प्रार्थना कितुर।

⁴⁰ असा वास ओरांग कोन्डांग उसकाळते मन्दुंग इन्जोर ओरक हुन्जतोर हुळतुर। ओरक ओन बाताल उत्तर हियाकाट इन्जोर पुनोर आन्दुर।

⁴¹ असा तिसरो बेरा वास ओरकुन इतुर, “बाक्या निमाट हुन्जसोर अनि इदेकवनाह आराम कियालातोरिट? मिया हुन्जाना अनि आराम कियाना मनि! इदेक परमेस्वर योजना किता ओद बेरा वात। हुळाट नना मानेयतोर मरिन पापि लोकुरा कयदे पयस हियानुर।

⁴² तेदाट; माक हन्दिला पहाजे; नाकुन पयसिवाल इगा हेरे अवतोर” इन्जोर वेहतुर।

येसुन दोखाते पयस हिन्तोर

⁴³ येसु वळकिला लागतुर असके चेला लोकुरकनिगाडाल वरोर मतोर ओर यहुदा मुने वातुर। आपुनासंग मुक्याल याजक लोकुरकनिकेडाल अनि नियमतुन करिहवालोरक निकेडाल अनि यहुदि अदिकारि लोकुरकनिगाडाल उन्दि पकाय भीळ तलवारिंग अनि बळगांग पयस ओरा हेरे सान्डेय अवतुरक।

⁴⁴ नना बोन चुमा कियाका ओर मानेयिन पयस ओन बन्दोबस्तते ओम्ट इन्जोर यहुदा ओरकुन सुचेह हिस मतोर।

⁴⁵ ओर लोकुरक वातुर असके यहुदा येसुना हेरे हतुर, “हे गुरु” इदाम इन्ज येसुन चुमा कितुर।

⁴⁶ असके लोकुरक येसुन पयतुर,

⁴⁷ ओदबेरा हेरे मतोर बोरे आपुना तलवार टन्डस मुक्याल याजकना दासतुन हिस ओना कवितुन कदितुर।

⁴⁸ येसु भीळतोर लोकुरकुन पुच्चेमातुर, “बाताल निमाट तलवारक अनि टेन्गांग पयस नाकुन कलेर लेहका पयान साटि वातोरिट?

⁴⁹ नना दरोज मन्दिरतिगा उपदेश हिस मियासंग मतोना असके निमाट नाकुन पयविट। मति पवित्र पुस्तकतिगा नावा बारेते कोटता परमेस्वरना पोल्लो पुरा आता पहाजे इन्जोर इद घटना आत।”

⁵⁰ असके येसुनोर सबोय चेलालोरक ओन तासिस वितितुरक।

⁵¹ वरोर लयोर मानेय आपुना मेन्दुलतिगा चादर मुचस येसुना परके हन्दुर ते लोकुरक ओन पयतुरक।

⁵² मति ओर चादर तासिस बान्डाले वितितुर।

येसु यहुदिलोरा महा सभाता मुने

⁵³ पजा ओरक येसुन महायाजकना हेरे ओतुरक सबोय मुक्याल याजक लोकुरक, यहुदि अदिकारि लोकुरक अनि नियमतुन करिहवालोरक ओना हेरे जमा आतुरक।

⁵⁴ पतरस लक-लकडाल येसुना परके परके महायाजकना डुवारवनाह हतुर अनि सिपायिलोरासंग उदस किस आरिन्दुर।

⁵⁵ मुक्याल याजक लोकुरक अनि महा सभातोर सबोय लोकुरक येसुन हव्कान साटि ओना गलतिता बारेते बाताले गवाहि पळकिन्दुर मति ओर बोदे दोषि मन्तोर इदाम बाताले गवाहि पुटो।

⁵⁶ बाक्याकि पकाय लोकुरक ओना विरोदते अलग-अलग खोटाल गवाहि हिन्दुरक मति ओरा उन्दि वने गवाहि सारको हिले आसि।

⁵⁷ असके हुचुक लोकुरक ओना विरुद तेदस:

⁵⁸ “नना मानेय दोहतोर इद मन्दिर नाश किस वाटका अनि मून्ड दियाना पजा मानेय दोहोर उन्दि मन्दिर नितिहका इदाम इन्दानपा माक केन्जतोम” इदाम ओना विरुद खोटाल गवाहि इतुरक।

⁵⁹ ते वने ओरा गवाहि जोळेमास वायो।

⁶⁰ असके मुक्याल याजक नडुम नितस येसुन पुच्चेमातुर, “येर लोकुरक निया बारेते गवाहि हिन्तोरक बाताल निमा ओरकुन बाराय उत्तर हेवि?”

⁶¹ मति ओर कमेक मतोर अनि बाराय उत्तर हेवोर मुक्याल याजक येसुन असा पुच्चेमातुर, “बाताल निमा मावोर परम धन्य परमेस्वरनोर मरि मसि आन्दि?”

⁶² येसु इतुर, “इंगो, नना ओरे आन्दान; निमाट नना मानेयतोर मरिन सबोयताल लाववाले परमेस्वरना तिन्दान कयबासा उदस अनि आबारतांग ढगिंगते वायाना हुळकिट।”

⁶³ असके मुक्याल याजक आपुनांग सन्दरांग हरिच इतुर, “इदेक माक गवाहता असा बाताल जरुरि मन्ता?

⁶⁴ ओर परमेस्वरना विरोद किता मजाक निमाट वने केन्जतोरिट बहे। ओना बारेते मिया निर्णय बाताल मन्ता?” इन्जोर पुच्चेमातुर। येसुन हव्काना दन्ड हियाना सबोय लोकुरक ठहरे कितुरक।

⁶⁵ पजा बोरे ओना पोरो उसकिला लागतुरक ओना चेहरातुन दोहच मुठिते ओन हाहिला लागतुरक अनि ओन इन्दिला लागतुरक, “निकुन बोर हाहतुर इन्जोर भविष्यवाणि किम?” इदाम सयनिक लोकुरक ओना हाहिला लागतुरक।

पतरस येसुन पुनोन इन्तोर

⁶⁶ पतरस अडिय डुवारतिगा मतोर असके मुक्याल याजकना दासनिगडाल उन्दि बायि ओना हेरे वात।

⁶⁷ अनि पतरसिन किसि आरिला हुळस ओन पकाय ध्यानते हुळसुन, “निमा वने नासरतोर येसुनसंग मतोन” इन्जोर इन्दा लागत।

⁶⁸ ओर, “निमा बाताल इन्दिला आतोन इन्जोर नना पुनोन अनि नाकुन समजेयमायो” इन्जोर येसुन पुनोन इतुर। पजा ओर बाहरो वरान्डातिगा हतुर असके कोर कुस्त।

⁶⁹ अनि ओद दासि ओन असा हुळस, ओना हेरे नितस मतोर ओर लोकुरकुन असा इन्दा लागत, “येर मानेय येसुना चेलाहनिगाडाल वरोर आन्दुर” मति ओर असा येसुन पुनोन इतुर।

⁷⁰ हुडुक बेरा पजा पतरसिना हेरे नितस मतोर लोकुरक ओन इतुरक, “खरोय निमा येसुना चेलाहनिगाडाल वरोर आन्दि बाक्याकि निमा वने गलीलितोर आन्दि।”

⁷¹ असके “बोना निमाट पोल्लोंग कियाला आतोरिट ओर मानेयिन नना पुनोन” इदाम ओर शपथ किस इन्दिला लागतुर।

⁷² असके सान्डेय दुसरो बेरा कोर कुस्त। “रन्ड बेरा कोर कुसाना मुने निमा मून्ड बेरा नाकुन पुनोन इन्कि” इन्जोर येसु इन्ज मतोर ओद पोल्लो पतरस आलिहतुर। असके पतरस अदेना बारेते विचार किस ओना मन्दा नियन्त्रन देकतु अनि ओर किलिला लागतुर।