मरकुस 13 - Muria Far Western

येरुसलेम मन्दिरता नाश

¹ येसु येरुसलेम मन्दिरताल पसियन्दुर असके ओनोर चेलाहनिगाडाल वरोर मानेय ओन इतुर, “हे गुरु, हुळा, बचोन सोबाता कल! अनि बचोन हजोर बील्डिंग मन्ता!”

² येसु ओन इतुर, “बाताल निमाट इव हजोह-हजोह बील्डिंग हुळान्तोरिट बहे? इगा कलदा पोरो कल वने मनो आयार इदाम इद बील्डिंग पुरा नाश आयार।”

दुनियाता अन्तता चिन्ह

³ येसु जयतुन मटा पोरो येरुसलेम मन्दिरता मुने उदस मतोर असके पतरस, याकुब, युहन्ना अनि अन्दरियास वरोरे आस ओन पुच्चेमातुर,

⁴ “कलदापोरो कल मनो आयार इव पोल्लोंग बसके आयनुंग इन्जोर माकुन वेहा अनि इव सबोय पोल्लोंग पुरा आयाना अद बेराता चिन्ह बाताल आयार?”

⁵ येसु ओरकुन इन्दा लागतुर, “बोरे मिकुन दोखा हेमाकिर इन्जोर हुशार मन्ट।

⁶ ‘नना मसि आन्दान’ इदाम इन्जुन पकाय लोकुरक नावा पोरोयते वास पकाय लोकुरकुन भळके कियानुरक।

⁷ निमाट लळायिता अनि लळायिता समाचार केन्जकिट ते वरियमाट बाक्याकि इव पहले आयाना जरुरि मन्ता मति ओद बेरा दुनियाता अन्त आयो आयार।

⁸ बाक्याकि जात जातिता विरोद, राज्य राज्यता विरोद लळायि कियानुर, पकाय जागातिगा भुकंप अनि दुष्काळ आयनुंग, इव सबोय पोल्लोंग पकाय तकलिपता सुरुवात आयार।

⁹ मति निमाट आपुना बारेते हुशार मन्ट बाक्याकि लोकुरक मिकुन हजोर सभातिगा सोपे कियानुरक अनि समाज मन्डलितिगा ओसुन पिटहानुरक अनि नावोर चेला आतिट इन्जोर राजपाल अनि राजाना मुने मिकुन हाजर कियानुरक अनि इद बेरा नावा बारेते ओरा मुने गवाहि वेहाना सन्दि आयि।

¹⁰ मति पहले येसु मसिना सोबाता पोल्लो सबोय जातितिगा वेहिला पहाजे।

¹¹ ओरक मिकुन ओस न्याय कियान साटि सोपेकियानुर असके माक बाताल इन्काट इन्जोर मुनेय चिन्ता केमाट। ओदबेरा बाताल आयि परमेस्वर मिकुन वेहनुर ओदे इन्दाना, बाक्याकि वळकवाल निमाट आयविट मति पवित्र आत्मा मन्तोर।

¹² तमो-तमोन, बाबोन-मरि अनि बालक अवाल-बाबोना विरोदते पसियस ओरकुन हव्काहनुरक।

¹³ अनि निमाट नावोर चेलाह आतिट इन्जोर सबोय लोकुरक मिकुन दुश्मनी कियानुर मति बोर आकरिवनाह हिमते सहेन किस मन्दानुर ओर अनन्त काळता हायानाता दन्डताल पिसहानुर।”

महासन्कटता बेरा वायार

¹⁴ येसु असा इन्दिलातोर, “आकरिते सबोयतुन अशुद्ध कियाना चिज बगा उचित हिले अगा निताना कारणते सबोय लोकुरक ओदेन तासिस विताना हुळानुरक असके (इद बोर वाचेकिन्तोर ओर सम्जेकिम्ट) बोर यहुदियातिगा मन्दानुर ओरक मटा पोरो वितिरक।

¹⁵ लोन पोरो मन्दानुर ओरक आपुना लोता पोरोडाल रेयस लोताल बाताले ततान साटि लोपा हन्माकिर।

¹⁶ अनि डन्डनिगा मन्दानुरक ओरक आपुना सन्दरांग साटि परके मलस हन्माकिर।

¹⁷ अव दियांग बोद मेन्दुलते मन्दार अनि पाल उहचोर मन्दार अवेन साटि पकाय कष्ट!

¹⁸ मति इद घटना पिनिता बेरा आयमाकि इन्जोर प्रार्थना किसोर हन्ट।

¹⁹ बाक्याकि परमेस्वरना सुष्टिता सुरुवाताल इदेकवनाह आयो अनि असा बसकेय आयो आयार अदाम पकाय तकलिप अव दियांग मन्दानुंग।

²⁰ प्रबु अव दियांगतुन कमि केवोर आस मनेर ते उन्दि वने मानेय पिसो आस मनेर मति आपुना आचतोर लोकुरा कारण परमेस्वर अव दियातुन कमि कितोर।

²¹ ओदबेरा बोरे मिकुन, ‘हुळाट मसिहा इगा मन्तोर!’ ‘हुळाट अगा मन्तोर!’ इदाम इनिर ते विस्वास केमाट।

²² बाक्याकि खोटाल मसि अनि नना परमेस्वरना पोल्लो वेहवाल इदाम खोटाल वेहवालोरक तेदचुन आय परार ते परमेस्वर आचतोरकुन वने बहके कियान साटि चिन्ह अनि पकाय आश्चरयता बुतोंग तोहनुरक।

²³ मति निमाट हुशार मन्ट; हुळाट नना मिकुन सबोय पोल्लोंग मुनेय वेहतोना।”

येसु मसिना असा मलस वायाना

²⁴ अनि येसु असा ओरकुन इतुर, “ ‘अव दियांगनांग ओव पकाय तकलिपता पजा पोळद आन्दार आयार अनि हुकोंग वेहच हेवो आयनुंग।

²⁵ अनि आबारताल हुकोंग अरानुंग, आबारतांग सबोय चिज अनि अदेना लावक होलेमायनुंग।’

²⁶ असके लोकुरक नना मानेयतोर मरिन पकाय लाव अनि महिमातासंग ढगिंगते वायाना हुळानुरक।

²⁷ ओदबेरा ओर आपुना दूतकुन लोहच दरतिता इद कोन्टाताल आबारता ओद कोन्टावनाह सबोयबासा आपुना आचतोर लोकुरकुन जमा कियानुर।”

अन्जीरता मराता उदाहरण

²⁸ येसु असा इतुर, “अन्जीर मरातुन हुळस उन्दि दृष्टान्त करियाट, ओद मरातांग आकिंग कावसुन अदेना कोहक हिरवो आस पुनाह आकिंग कोळसिन्तांग असके इदेक डोकाल वाता इन्जोर निमाट समजेमान्तोर।

²⁹ इदाम निमाट वने इव पोल्लोंग आयाना हुळकिट ते ओर हेरे कवाळ मुने अवतोर इन्जोर समजेमायकिट।

³⁰ इव सबोय पोल्लोंग पुरा आयो आयनुंग अचोवनाह इद पिळिता अन्त आयो आयार इन्जोर नना मिकुन खरोय इन्तोना।

³¹ आबार अनि दरति बदलेमायार मति नावा पोल्लोंग ते बसकेय बदलेमायो आयार।”

केपसोर मन्ट

³² अनि येसु ओरकुन असा इतुर, “इद पोल्लोंग बोद दिया आयार इन्जोर केवल नावोर बाबाल पुन्तोर। मति दुसरो बोरे स्वरगताल दूतक अनि नना मानेयतोर मरिन वने पुनोन।

³³ हुळाट ओद समय बसके वायार इन्जोर निमाट पुनविट इन्जोर हुशार मन्ट अनि प्रार्थना किसोर मन्ट।

³⁴ नना मानेयतोर मरिना असा मलस वायाना आपुना लोन तासि पकाय लक हतोर वरोर मानेयना पिटो लेहका मन्ता: वरोर मानेय आपुना लोन तासि परदेश हन्दानपा ओर आपुना नोकरकुन अदिकार हिन्तोर अनि वरोन वरोन आप-आपुना बुतो कियाला वेहान्तोर अनि चोकिदारतुन केपसोर मन्दिला आग्या हिन्तोर लेहकाय मन्ता।

³⁵ इन्जोर मालकाल नुलपेबेरा या अरदो नरका या कोरकुसेंग बेरा इदाम बसके वायनुर इन्जोर निमाट पुनविट इन्जोर,

³⁶ ओर अचानक वायिर अनि मिकुन हुन्जतोर हुळमाकिर इन्जोर निमाट केपसोर मन्ट।

³⁷ अनि नना मिकुन इन्तोना ओदे सबोय लोकुरक साटि इन्तोना: निमाट केपसोर मन्ट।”