मरकुस 10 - Muria Far Western

सोळचिटिता बारेते येसुना करिहाना

¹ पजा येसु अगडाल पसियस यरदन नदिता होदपाकाळ यहुदियाता सिमातेके हतुर। असा वने भीळ ओना हेरे जमा आत, ओर आपुना रितिते ओरकुन उपदेश हिया लागतुर।

² असके परीसि लोकुरक ओना हेरे वास, परिक्षा कियान साटि ओन पुच्चेमातुरक, “मानेय आपुना मुत्तेन सोळेकेविर इन्जोर बाताल इद उचित मन्ता?”

³ येसु ओरकुन उत्तर हितुर, “मूसाल मिकुन बाताल आग्या हितोर?”

⁴ ओरक इतुरक, “आपुना मुत्तेन सोळचिटि कोटस अदेन कयदिगा हिसुन तासियाना इन्जोर मूसाल आग्या हितोर।”

⁵ येसु ओरकुन इतुर, “मिया मन्दा कटोरताता कारण ओर मिया साटि इद आग्या कोटतोर।

⁶ मति सबोय बनेकियानाता सुरुवाते परमेस्वर ओरकुन मानेय अनि आळ इदाम बनेहकितोर।

⁷ इद कारणते मानेय आपुनोर अवाल-बाबोनिगाडाल अलगो आस आपुना मुतेनसंग उन्दि आयनुर।

⁸ अनि ओरक इवुरास उन्दि मेन्दुल आयनुर, इन्जोरक ओरक इदेक रन्ड आयो मति उन्दि मेन्दुल मन्तोरक।

⁹ इन्जोर परमेस्वर जोळेहकितोर ओरकुन मानेय अलगो केमाकिर।”

¹⁰ पजा येसु लोतिगा मन्दानपा चेलालोरक इदेना बारेते ओन असा पुच्चेमातुरक।

¹¹ येसु ओरकुन इतुर, “बोरायि आपुना मुत्तेन तासिस दुसरो आळतासंग मरमिंग केविर ते ओर पहले मुत्तेना विरोदते व्यभिचार किन्तोर।

¹² अनि मुत्ते आपुना मुजोन तासिस दुसरो मानेयनासंग मरमिंग केवि ते ओद व्यभिचार किन्ता।”

येसु बालकिन आशिरवाद हिन्तोर

¹³ पजा येसु ओरा पोरो कय इरीर इन्जोर लोकुरक बालकिन ओना हेरे ततिला लागतुरक मति चेलालोरक ओरकुन रांगतुरक।

¹⁴ चेलालोरक रांगतुरक इन्जोर येसु हुळस होंग आस ओरकुन इतुर, “बालकिन नावा हेरे वायिला हिम्ट ओरकुन मना केमाट, बाक्याकि परमेस्वरना राज्य बालक लेहका बोर मन्तोरक ओरा साटि मन्ता।

¹⁵ बोरायि परमेस्वरना राज्यतुन बालक लेहका स्विकार केवोर ओर परमेस्वरना राज्यतिगा बसकेय हन्दिला परोर आयनुर इन्जोर नना मिकुन खरोय इन्तोना।”

¹⁶ अनि येसु बालकुन अतितुर अनि ओना पोरो कय इरस ओन आशिरवाद हितुर।

सावकार मानेय अनि अनन्त जिवन

¹⁷ येसु अगडाल पसियस हरिते हन्दिला आस मतोर असके वरोर मानेय वितसोर ओना हेरे वातुर अनि येसुना मुने मिन्डांग टेकेकिस ओन पुच्चेमातुर, “हे बेसतोर गुरु, अनन्त जिवन स्विकार कियान साटि नना बाताल कियाका?”

¹⁸ येसु ओन इतुर, “निमा नाकुन बेसतोर गुरु बाक्या इन्तोन? परमेस्वरदुन तासिस बोरे बेसतोर हिलेर।

¹⁹ निमा आग्यातुन पुन्तोन बहे, ‘हव्काना आयो, व्यभिचार केमाट, कलेर कियाना आयो, खोटाल गवाहि हियाना आयो, दुसरोन दोखा हियाना आयो, आपुनोर बाबो अनि अवहारिना आदर किम्ट।’ ”

²⁰ ओर येसुन इतुर, “हे गुरु, इव सबोयतुन नना लयोरपनताल मानेमासोर वातोना।”

²¹ येसु ओन हुळस ओन मया कितुर। अनि ओन इतुर, “नियागा उन्दि पोल्लोता कमि मन्ता, निमा हन्जुन निया सबोय चिज मोमस गरिब लोकुरकुन हिम, निमा अदाम कियाकि ते निकुन स्वरगतिगा धन पुटार। अनि पजा वास नावा परके आम” इदाम वेहतुर।

²² इद पोलो केन्जुन ओन पकाय दुःख किसोर मलस हतुर बाक्याकि ओर पकाय सावकार मतोर।

²³ येसु सबोयबासा हुळस आपुनोर चेलालोरकुन, “दनवान लोकुरक परमेस्वरना राज्यतिगा हन्दाना बचोन कटिन मन्ता!” इन्जोर इतुर।

²⁴ चेलालोरक येसुना पोल्लोते आश्चरय आतुर, येसु असा ओरकुन इतुर, “हे मावोर बालक, धन संपतिगा विस्वास इरान्तोरक परमेस्वरना राज्यतिगा हन्दाना बचोन कटिन मन्ता।

²⁵ धनि मानेय परमेस्वरना राज्यतिगा हन्दानाताल हुट सुयिता बुकाताल पसियस हन्दाना सुदोय मन्ता इन्जोर नना मिकुन इन्तोना।”

²⁶ ओरक पकाय आश्चरय आस आपसते इन्दा लागतुरक, “ते पजा बोन पिसिहला आय परान्ता।”

²⁷ येसु ओरकुन हुळस, “मानेयनिकेडाल इद आय परो, मति परमेस्वरताल आय परान्ता; बाक्याकि परमेस्वरताल सबोय आय परान्ता” इन्जोर इतुर।

²⁸ पतरस ओन इन्दा लागतुर, “हुळा माक ते सबोय तासिस निया परके वातोरोम!”

²⁹ अनि येसु इतुर, “बोर नावा साटि अनि सोबाता पोल्लोसाटि लोन, तमो, हेलाळ, अवाल-बाबो आपुना बालक अनि आपुना डन्डतुन सोळे किन्तोर,

³⁰ ते ओन इद दुनियातेय नुर पट लोन, तमो हेलाळ, अवाल बाबाल, बालक अनि डन्ड वने पुटार अनि अदेनासंग लोकुरकनिकेडाल मिकुन पकाय तकलिप वने पुटार। अनि वायाना काळते ओन स्वरगतिगा अनन्त जिवा वने पुटार इदाम नना मिकुन खरोय इन्तोना।

³¹ मति मुने मन्तोरक पकायि लोकुरक आकरितोर आयनुरक अनि आकरि मन्तोरक पकाय लोकुरक मुनेटोर आयनुरक।”

येसु आपुना हायानाता बारेते असा वेहान्तोर

³² ओरक येरुसलेम हन्जोर मतोरक, अनि येसु ओरा मुने मुने हन्दिला आस मतोर, चेलालोरक आश्चरयते मतोरक अनि बोर ओना परके परके ताकिन्दुरक ओरक वरियस मतोरक, असके पजा ओर बारा चेलालोरासंग ओनागा वायाना पकाय तकलिप बारेते वळकिला लागतुर,

³³ “हुळाट, माक येरुसलेम दान्तोरोम अनि नना मानेयतोर मरि मुक्याह याचक अनि मूसाना नियमतुन करिहवालोरा कयदे पयानुर अनि ओरक ओन हव्कान साटि योग्य ठहरे कियानुर अनि दुसरो जातिता लोकुरा कयदे सोपे कियानुर।

³⁴ ओरक ओन कवनुरक, ओना पोरो उक्सनुरक, ओन पट्टाते हियानुरक अनि ओन होवकस वाटनुरक अनि मून्ड दियाना पजा ओर असा जिवे मायनुर।”

याकुब अनि युहन्नाना विनन्ति

³⁵ जबदिनोर मरक याकुब अनि युहन्ना येसुना हेरे वासुन इतुरक, “हे गुरु, माक बारायि निकुन तलकिकोम अद निमा मावा साटि किम इन्जोर मावा इच्चा मन्ता।”

³⁶ येसु ओरकुन इतुर, “नना मिकुन साटि बाताल कियाका इन्जोर मिया इच्चा मन्ता?”

³⁷ ओरक येसुन इतुर, “निया महिमाता राज्यतिगा निया सिंहासनतिगा उदाना बेरा मावागाडाल वरोर निया तिन्दान कयबासा अनि दुसरो निया डाबानबासा उदाना साटि वाचा हिम।”

³⁸ येसु ओरकुन इतुर, “निमाट बाताल तलकान्तोरिट इन्जोर निमाट पुनविट! नना पकाय तकलिप सहन कियाका अदाम लेहका निमाट वने पकाय तकलिप सहेन किया परकिट बहे? नना हायका अदाम लेहका निमाट हायपरान्तोरिट बहे?”

³⁹ ओरक येसुन, “इंगो! माक सहेन किया परान्तोरोम” इन्जोर इतुरक। येसु ओरकुन इतुर, “नना सहेन कियाका ओद पकाय तकलिप निमाट सहन कियाकिट अनि नना बदाम हायका अदामे निमाट वने हायकिट इद निश्चित मन्ता।

⁴⁰ मति आपुना तिन्दान कयबासा अनि डावान कयबासा बोने उपहाना नावा बुतो आयो, मति नावोर बाबो बोना साटि तयार कितोर ओरकुने ओद पुटार” इन्जोर इतुर।

⁴¹ याकुब अनि युहन्ना येसुन हेरे बाताल तल्कतुरक इद ओना दहा चेलालोरकुन समजेमात असके ओरक याकुब अनि युहन्ना पोरो होंग कितुरक।

⁴² येसु ओरकुन हेरे केयस इतुर, “इद दुनियातोर राजाह लोकुरक ओरा लोकुरा पोरो राज किन्तोरक। अनि ओरा हजोर अदिकारि लोकुरक ओरागा वने अदिकार किन्तोरक।

⁴³ मति मियागा इदाम आयो, मियागाडाल हजोर आयाना इच्चा मन्ता ओर मिया सेवक आयिर।

⁴⁴ अनि बोरायि मियागाडाल सबोय लोकुरा मुक्याल आयाना इच्चा मन्ता ओर सबोय लोकुरा सेवक आयिर।

⁴⁵ बाक्याकि नना मानेयतोर मरि सेवा किहान साटि आयो मति दुसरो लोकुरकुन आपुनाय सेवा कियान साटि अनि पकाय लोकुरकुन पापताल पिसान साटि आपुना जिवा हेविर इन्जोर दरतितिगा वातोना।”

येसु आन्दराल बरतिमायिन दुष्टि हिन्तोर

⁴⁶ येसु अनि ओना चेलालोरक येरिहो सहेरतिगा वातुरक ओर अनि ओनोर चेलालोरक अनि उन्दि पकाय भीळ येरिहोतिगाडाल पसियन्द असके तिमायिनोर मरि बरतिमायि पोरोयतोर वरोर आन्दराल बिकारि हरदा ओदातिगा उदस मतोर।

⁴⁷ येसु नासरितोर आन्दुर इन्जोर केन्जुन ओर केयस केयस इन्दा लागतुर, “हे येसु दावुदनोर मरि नाकुन दया किम।”

⁴⁸ कमेक मन इन्जोर पकाय लोकुरक ओन रांगतुरक मति ओर असा वने केयिला लागतुर, “हे दावुदनोर मरि नाकुन दया किम।”

⁴⁹ असके येसु रोमस इतुर, “ओन केयाट” अनि लोकुरक ओर आन्दरान केयस ओन इतुर, “हिमत इरा तेदा, ओर निकुन केयान्तोर।”

⁵⁰ आन्दराल आपुना मुच्चाना सन्दरा हरच सान्डे तेदितुर अनि येसुना हेरे वातुर।

⁵¹ येसु ओन पुच्चेमातुर, “नना निया साटि बाताल कियाका इन्जोर निया इच्चा मन्ता?” आन्दराल ओन इतुर, “हे गुरु, नना हूळ परका इन्जोर नावा इच्चा मन्ता।”

⁵² येसु ओन इतुर, “हन निया विस्वास निकुन सुदरे किता” ओर सान्डेय हुळिला लागतुर अनि हरतिगा ओना परके वातुर।