मरकुस 1 - Muria Far Western

युहन्ना बपतिस्मा हेवालना वेहाना

¹ परमेस्वरनोर मरि येसु मसिना सुसमाचारता सुरुवात।

² “ ‘नना नावोर दूततुन निया मुने लोहान्तोना ओर निया साटि हरि सुदरे कियानुर।

³ प्रबुना हरि तयार किम्ट अनि ओना हरि सिदो किम्ट इन्जोर वारु पल्लातिगा वरोर केयवालना लेंग केन्ज वायिला आता।’ ” इन्जोर परमेस्वरना पोल्लो वेहवाल यशायाहना पुस्तकतिगा कोटता मन्ता अदामे युहन्नाल वातोर।

⁴ ओर वारु पल्लातिगा बपतिस्मा हिस, निमाट पाप कियाना बन्द किम्ट अनि बपतिस्मा स्विकार किम्ट! असके परमेस्वर मिया पापता मापि हियानुर इदाम वेहतुर।

⁵ यहुदिया प्रदेशतोर अनि येरुसलेम मन्वालोर पकाय लोकुरक पसियस ओना हेरे हतुरक। अनि आपुना पापतुन मानेमास यरदन नदितिगा ओनाकेडाल बपतिस्मा येतितुरक।

⁶ युहन्ना हुटता कल्कने बनेहकितांग सन्दरांग करिन्दुर, अनि नळियतिगा तोलाता पट्टा दोहन्दुर अनि ओर तिन्दाना योग्य मता पतेंग अनि काळालनियतुन तिन्दुर।

⁷ अनि “नावा परके वायवाल मन्तोर, ओर नावाताल वने लाववाले मन्तोर, नना ओना हरपुहना डोरिंग झुकेमास लोहाना नावा लायक हिले।

⁸ नना ते मिकुन एरते बपतिस्मा हिन्तोना मति ओर मिकुन पवित्र आत्माते बपतिस्मा हियानुर” इदाम ओर वेहिन्दुर।

येसुना बपतिस्मा अनि परिक्षा

⁹ ओदबेरा येसु गलील प्रदेशता नासरत सहेरताल वास यरदन नदितिगा युहन्नानिकेडाल बपतिस्मा येतितुर।

¹⁰ अनि ओर एताल पसियस पोरो वातुर ते सान्डेय आबार तरियाना अनि पवित्र आत्मा परेवा लेहका ओना पोरो रयाना हुळतुर।

¹¹ अनि “निमा नावोर प्रिय मरि आन्दि, नियागा नना गिरदा आन्तोना” इन्जोर स्वरगताल उन्दि लेंग आत।

¹² असके पजा पवित्र आत्मा येसुन सान्डेय वारु पल्लातिके लोहतु।,

¹³ अगा सयतान येसुन परिक्षा कितु अनि च्याळिस दियांग ओर वारु पल्लातिगा केळाता जानवरसंग मतोर। अनि स्वरगदूतक ओना सेवा किसोर मतोरक।

येसुना सेवाता सुरुवात

¹⁴ युहन्नान कयदि आतुर असके येसु गलील प्रदेशतिगा वास परमेस्वरना राज्यता सोबाता पोल्लो वेहिला लाकतुर।

¹⁵ “परमेस्वर वाचा हिस मतोर ओद काळ वाता, अनि परमेस्वरना राज्य हेरे वाता, मिया पाप कियाना बन्द किस सोबाता पोल्लोतिगा विस्वास किम्ट!” इदाम इतुर।

येसु आपुना पहलेटा चेलालोरकुन केयान्तोर

¹⁶ उन्दि दिया येसु गलील नाहारता टकाहेरे हन्ज मतोर असके ओर शिमोन अनि ओनोर तमो अद्रियासतुन नहारतिगा जालि वाटानपा हुळतुर, ओरक मीन्क पयवालोरक मतोरक।

¹⁷ येसु ओरकुन “नावा परके वाट, नना मिकुन मानेयतुन परमेस्वरना हेरे ततवाल बनेहकियाका” इन्जोर इतुर।

¹⁸ असके ओरक सान्डेय जालितुन हरचुन ओना परके वातुरक।

¹⁹ हुडुन्सा मुने विळस ओर जबदिनोर मरि याकुब अनि ओनोर तमो युहन्नान डोंगातिगा जालितुन सुदरे कियानपा हुळतुर।

²⁰ ओर सान्डेय ओरकुन केयतुर अनि ओर आपुनोर बाबो जबदीतुन बुतो केवालोरासंग डोंगातिगा तासिस ओना परके हतुर।

येसु दुष्टात्मा पयतोर मानेयतुन सुदरे किन्तोर

²¹ येसु गलील प्रदेशता कफरनहुम सहेरतिगा हतुर अनि ओर सान्डेय समाज मन्डलितिगा हन्ज परमेस्वरना पोल्लोतुन लोकुरकुन वळकिला लागतुर।

²² अनि ओर मूसाना नियमतुन करिहवालोर लेहका आयो मति अदिकारते उपदेश हिन्दुर इन्जोर लोकुरक ओद उपदेश केन्ज दंगे मातुरक।

²³ ओदबेरा ओरा समाज मन्डलितिगा दुष्ट आत्मा पयतोर वरोर मानेय मतोर।

²⁴ ओर पकाय जोरदे इतुर “हे नासरितोर येसु, माकुन नियासंग बाताल बुतो मन्ता? बाक्या निमा माकुन नाश कियान साटि वातोन? निमा बोर आन्दि इन्जोर नना पुन्तोना, निमाय परमेस्वरनोर पवित्र मरि आन्दि।”

²⁵ येसु दुष्टात्मातुन रांगतुर, “कमेक मन अनि ओनागाडाल पसियसुन हन” इन्जोर इतुर।

²⁶ असके दुष्ट आत्मा ओन मोडियस अनि पकाय जोरदे किलिंगसोर ओनागाडाल पसियस हतु।

²⁷ अनि इदेन हुळसुन सबोय लोकुरक दंगे मातुरक अनि “इद पोल्लो बदाहना आन्दु? इद ते बातालतरि पुनाल उपदेश मन्ता, ओर अदिकारता संग दुष्ट आत्मातुन वने आग्या हिन्तोर अनि अव ओना आग्या मानेमान्तांग” इन्जोर वरोन दुसरोना संग वळकिला लागतुरक।

²⁸ अनि ओना पोरोय सान्डेय गलीलता हेरेटा सबोय प्रदेशतिगा फयलेमायिला लागतु।

येसु पकाय बिमारलोरकुन सुदरे किन्तोर

²⁹ अनि पजा येसु सान्डेय समाज मन्डलितिगाडाल पसियस याकुब अनि योहानाना संग शिमोन अनि अद्रियासना लोन वातुर।

³⁰ अगा शिमोना पोयहारिन पकाय पिनि तरिहच मता अनि ओरक सान्डेय अदेना बारेते येसुन इतुरक।

³¹ असके ओर हेरे हन्जुन अदेना कय पयस अदेन ताहतुर अनि अदेना पिनि रयतु अनि ओद ओना सेवा कियाला लागतु।

³² नुलपेहबेरा पोळद मुळियतपा लोकुरक सबोय अलगो-अलगो बिमार लोकुरकुन अनि बोनागा दुष्ट आत्मा मन्ता ओरकुन ओना हेरे ततुरक।

³³ अनि नगरता पकाय लोकुरक ओद लोता मुने जमा आतुरक,

³⁴ अनि अलगो-अलगो बिमारिता तकलिपते मतोरक इदाम पकाय लोकुरकुन येसु सुदरे कितुर, पकाय दुष्टात्मातुन पसिहतुर। अनि दुष्टात्मांग ओन पुन्दुंग इन्जोर अवेहकुन वळकिला हेवोर।

येसु वरोरे प्रार्थना किन्तोर

³⁵ पोळद पसियाना पकाय मुने ओर तेदस पसियतुर अनि उन्दि सुनसान जागादिगा हतुर अनि अगा प्रार्थना कियाला लागतुर।

³⁶ असके शिमोन अनि ओनोर संगवाले ओन पळकिला हतुरक,

³⁷ ओरक येसुन कलियतुरक असके, “सबोय लोकुरक निकुन पळकिला आतोरक” इन्जोर ओन इतुरक।

³⁸ येसु ओरकुन, “वाट माक बगातरि हेरेटा नार दाकाट नना अगा वने सोबाता पोल्लो वेहका बाक्याकि नना इद बुतो साटिय पसियस वातोना” इन्जोर इतुर।

³⁹ अदाम ओर सबोय गलील प्रदेशतिगा हन्जुन ओरा समाज मन्डिलितिगा प्रचार अनि दुष्टात्मातुन पसिहसोर मतोर।

येसु कोळि बिमारितुन सुदरे किन्तोर

⁴⁰ वरोर कोळि बिमारिवाले मानेय येसुना हेरे वास ओना मुने मिन्डांग टेकेकिस, “निमा नाकुन इद बिमारिताल सुदरे किया परान्तोन” इन्जोर ओन विनन्ति कितुर।

⁴¹ अनि येसु ओनागा दयाकिस कयक मुने किस ओन इटसुन, “नावा इच्चा मन्ता निमा इदेक शुद्ध आम” इदाम इतुर।

⁴² अनि सान्डेय ओना कोळि बिमारि बेस आत अनि ओर शुद्ध आतुर।

⁴³ असके येसु कोडि बिमारितोर मानेयतुन चेतेहकिस इतुर:

⁴⁴ “हुळा बोने बाराय इनमा मति सान्डे हन्जुन आपुनतुन याजकतुन तोहा अनि आपुन शुद्ध आयाना बारेते मूसाना आग्याता अनुसार बलिदान हिम। इदाम कियाकिट ते निमा सुदरे मातोन इन्जोर सबोय लोकुरकुन गवाहि आयार” इन्जोर चेतेकिस ओन लोहतुर।

⁴⁵ मति ओर बाहरो हन्जुन इद पोल्लोता पकाय वेहिला लाकतुर अनि बाताल आतु इन्जोर पोल्लोतुन फयलेकियाना सुरु कितुर। इदेनते येसुन सहेरतिगा सबोय लोकुरा मुने हन परोर आतुर इन्जोर येसु बाहरो वारु पल्लातिगा मतोर। अनि सबोय बासाडोर लोकुरक येसुना पोल्लोंग केन्जान साटि ओना हेरे वासोर मतोरक।