मत्ति 9 - Muria Far Western

लकवा बिमार मानेयतुन येसु सुदरे किन्तोर

¹ पजा ओर डोंगाते गलील नहारता होदपाकाळ हन्जुन आपुना नार मन्जे कफरनाहुमतिगा वातुर।

² अनि अगा हुचुलोर लोकुरक लकवा बिमार मानेयतुन कटुलतिगा इरसुन ओना हेरे ततुरक। येसु ओरा विस्वासतुन हुळसुन ओर लकवा बिमार मानेयतुन इतुर, “हे नोना, हिमते मन्ट निया पाप मापि आतु” इन्जोर इतुर।

³ असके मूसान नियमतुन करिहवालोर हुचुलोर लोकुरक, “येर ते परमेस्वरना निन्दा किन्तोर” इन्जोर मन्दे विचार कितुरक।

⁴ येसु ओरा मन्दा पोल्लोंग पुन्ज, “निमाट आपुना आपुना मन्दे बाक्या गलति विचार कियाला आतोरिट?

⁵ निया पाप मापि आतु इन्जोर इन्दाना या तेदा अनि वलिया इन्जोर इन्दाना बोद पोल्लो सोपो मन्ता” इन्जोर पुच्चेमातुर।

⁶ मति मानेयतोर मरिन दरतितिगा पापतुन मापि कियाना अदिकार मन्ता इदाम निमाट पुन्दिला पहाजे इन्जोर ओर लकवा बिमार मानेयतुन, “तेदा, आपुना कटुल ताहा अनि आपुना लोन हन” इन्जोर इतुर।

⁷ ओर तेदचुन आपुना लोन हतुर।

⁸ लोकुरक इद हुळसुन वरियतुरक अनि मानेयतुन इदाम अदिकार हितोर परमेस्वरना महिमा कियाला लागतुरक।

मत्ति पोरोयतोर मानेयतुन येसु आचान्तोर

⁹ येसु अगडाल मुने हतुर असके मत्ति पोरोयतोर वरोर मानेयतुन टाक्स येताना नाकादिगा उदितोर हुळतुर, अनि येसु ओन इतुर, “नावा परके वाय।” ओर तेदचुन ओना परके हतुर।

¹⁰ येसु मत्तिना लोतिगा जेवन कियान साटि उदितुर असके पकाय टाक्स येतवालोर अनि पापि लोकुरक वासुन येसु अनि ओनोर चेलालोरासंग जेवेकियालाय उदितुरक।

¹¹ इद हुळसुन परीसि लोकुरक येसुना चेला लोकुरकुन, “मिवोर गुरु टाक्स येतवालोरासंग अनि पापि लोकुरासंग बाक्या तिन्तोर?” इन्जोर इतुर।

¹² इद केन्जुन येसु ओरकुन इतुर, “बिमार मानेय तासिस बिमार हिलेर मानेयतुन डाकटरना जरुरि हिले।

¹³ ‘बलिदान आयो मति नना दयाता इच्चा किन्तोना’ इन्जोर पवित्र पुस्तकतिगा कोटता पोल्लोता अर्थ बाताल मन्ता इन्जोर निमाट हन्जुन करियाट। नना परमेस्वरना मुने येताना योग्य बुतो केवाल मन्तोना इदाम आपुनतुन समजेमायवाल लोकुरकुन साटि आयो मति माक पापि लोकुरक आन्दोम इदाम विचार केवालोरकुन केयान साटि नना वातोना” इन्जोर इतुर।

उपासता बारेता प्रश्न

¹⁴ असके युहन्नानोर चेलालोरक येसुना हेरे वास, “माक अनि परीसि लोकुरक बसकेन बसकेन उपास किन्तोरोम, मति नियोर चेलालोरक बाक्या उपास पयोर?” इन्जोर पुच्चेमातुरक।

¹⁵ येसु ओरकुन, “बाताल दुलहाल बरातसंग मन्दानुर ते वरताह लोकुरक दुःख किया परान्तोरिट? मति दुलहान बरातिगाडाल अलग कियाना दियांग वायनुंग असके ओरक उपास पयानुरक।

¹⁶ उन्दि जुनाल सन्दरा हरारते पुनाल सन्दरा कदियसुन बोरे जोळेह किस कोटोर। बाक्याकि अदाम कियानुर ते, कोटस जोळेकिता ओद जागा असा हरार अनि अद सन्दरा मुनेटालताल पकाय खराब आयार।

¹⁷ अनि लोकुरक पुनाल अंगुरता जोमा जुनाल तोलाता जोरियातिगा निहोर, बाक्याकि इदाम कियानुर ते पुनाल अंगुरता जोमातिगा ग्यास तयारास जोरिया हरार अनि अंगुरता जोमा पोंगान्ता अनि जोरिया नाश आसिन्ता; मति पुनाल अंगुरता जोमा केवल पुनाल तोलाता जोरियातिगा निहान्तोर अदाम अव रन्डास पिस मन्तांग।”

येसु हाता पेडिन जितो किन्तोर अनि बिमार आळदुन सुदरे किन्तोर

¹⁸ येसु युहन्नानोर चेला लोकुरासंग इव पोल्लोंग वळकसोर मतोर असके समाज मन्डलिता वरोर अदिकारि वासुन ओन नमस्कार किस, “नावा पेडि इदेक हाता मति निमा वासुन आपुना कय अदेन पोरो इरकि ते ओद जितो आयार” इन्जोर इतुर।

¹⁹ येसु तेदचुन आपुना चेलालोरासंग ओना परके हतुर।

²⁰ असके बारा वरसाताल नतुर हन्दाना बिमारि मता उन्दि आळ,

²¹ “नना ओना सन्दरातुन इटका ते बेस आयका” इन्जोर ओद आपुना मन्दे इन्जुन अदु येसुना परकेडाल वासुन सान्डे येसुना सन्दराता कोडितुन इटतु।

²² येसु परके मल्स अदेन हुळस, “पेडि हिमत इरा, निया विस्वास निकुन सुदरे किता” इन्जोर इतुर। ओदेय बेराताल ओद आळ बेस आतु।

²³ येसु यहुदि समाज मन्डलिता अदिकारिना लोतिगा अवतुर असके हामुर कार्यक्रमता हेरे बासरि नेकिहवालोर अनि किलवालोर लोकुरा भीळतुन हुळतुर।

²⁴ असके ओर, “गुचाट, पेडि हायो, हुन्जिला आता।” असके लोकुरक ओना मजाक कियाला लागतुरक।

²⁵ ओर भीळता लोकुरकुन बाहरो लोहतुर असके ओर लोपा हन्जुन पेडिना कयदुन पयतुर, अनि अदु पेडि जितो आस तेदित।

²⁶ अनि इद पोल्लोता चर्चा ओद देशतिगा पुरा फयले मातु।

येसु इवुर अन्दराहकुन दृष्टि हिन्तोर

²⁷ येसु अगडाल मुने हतुर असके इवुर अन्दराह मानेय, “हे दावुदनोर मरि, माकुन दया किम” इदाम इन्जोर ओना परके वातुरक।

²⁸ येसु लोन अवतुर असके ओरक अन्दराह लोकुरक ओना हेरे वातुरक, अनि येसु ओरकुन “नना इद किया परान्तोना?” इन्जोर बाताल मिकुन विस्वास मन्ता इदाम ओरकुन पुच्चेमातुर, “इंगो प्रबु” इदाम ओरक उत्तर हितुरक।

²⁹ असके येसु ओरा कोन्डानुंग इटस, “मिया विस्वासता अनुसार मिया साटि आयि” इन्जोर इतुर। सान्डे ओरा कोन्डांग तरियतुंग।

³⁰ “इद पोल्लोतुन बोरे पुन्माकिर” इन्जोर येसु ओरकुन चेतेहकिस इतुर।

³¹ मति ओरक पसियसुन पुरा देशतिगा ओना बारेता सोबाता पोल्लोतुन फयले कितुर।

येसु वरोर मुकाल मानेयतुन सुदरे किन्तोर

³² ओरक अगडाल बाहरो हन्दुर असके लोकुरक दुष्टात्मा मतोर वरोर मुकान येसुना हेरे ततुरक।

³³ अनि ओर दुष्टात्मातुन पसिहतुर ते मुकाल वळकिला लागतुर। असके “इस्रायेल देशतिगा इदाम बसकेय हुळोम” इन्जोर लोकुरा भीळ आश्चरय किस वेहतुरक।

³⁴ मति परीसि लोकुरक, “ओर ते दुष्टात्माता मुक्यालना मदतते दुष्टात्मातुन पसिहान्तोर” इन्जोर इतुरक।

परमेस्वरना सेवा साटि प्रार्थना किम्ट

³⁵ येसु सबोय सहेर अनि नाहक-नाहक वलियसोर यहुदि लोकुरा समाज मन्डलितिगा उपदेश किसोर स्वरग राज्यता बारेता सोबाता पोल्लो वेहचोर अनि सबोय प्रकारता बिमारि अनि कमजोरि लोकुरकुन सुदरे किसोर मतोर।

³⁶ ओर भीळतुन हुळस ओरा पोरो दया वातु। बाक्याकि मेहवाल हिलेंग लेस्कतांग बेळांग लेहका ओरक दुःखि आस मतोरक।

³⁷ असके ओर आपुना चेलालोरकुन इतुर, “कोयान साटि पन्डता डन्ड ते पकाय मन्ता मति बुतो केवालोर पकाय कमि मन्तोरक।

³⁸ इन्जोर आपुना डन्डता फसलतुन कोयान साटि पकाय बुतो केवालोरकुन लोहिर इन्जोर डन्डता मालकाल परमेस्वरिन विनन्ति किम्ट” इन्जोर इतुर।