मत्ति 8 - Muria Far Western

येसु कोळि बिमार मानेयतुन सुदरे किन्तोर

¹ येसु आपुना वळकाना मारिहच ओद मटाताल रयतुर असके लोकुरा उन्दि पकाय भीळ ओना परके वातुरक।

² असके वरोर कोळि बिमारितोर मानेय येसुना हेरे वास ओन नमस्कार किस “हे प्रबु, निया इच्चा मन्दार ते नाकुन शुद्ध किया परान्तोन” इन्जोर इतुर।

³ येसु कय मुनेकिस ओन इटतुर, “नावा इच्चा मन्ता, निमा शुद्ध आम” इन्जोर इतुर। अनि सान्डेय ओर कोळि बिमारिताल बेस आतुर।

⁴ येसु ओन, “हुळा, बोने वेहमा, निमा हन्जुन आपुनतुन याजकतुन तोहा अनि मूसाना आग्याता अनुसार बलि हिम असके निमा कोळि बिमारिताल बेस आतोन इदाम लोकुरकुन समजेमायार” इन्जोर इतुर।

रोमि सयनिक अदिकारिना विस्वासतुन येसु प्रशंसा किन्तोर

⁵ येसु कफरनहुम नाटेनिगा वातुर असके रोमि सयनिक लोकुरा वरोर अदिकारि येसुना हेरे वास ओन,

⁶ “हे प्रबु, नावोर नोवकर लोतिगा लकवा बिमारिते पकाय तकलिपते मन्तोर” इन्जोर ओन विनन्ति कितुर।

⁷ असके येसु ओर अदिकारिन, “नना वास ओन सुदरे कियाका” इन्जोर इतुर।

⁸ मति अदिकारि ओन, “हे प्रबु, निमा नावा लोन वायिलाय नना लायकि हिले। मति निमा केवल उन्दि पोल्लो इन्जिम ते नावोर नोवकर बेस आयनुर इन्जोर उत्तर हितुर।

⁹ बाक्याकि नना वने दुसरो मानेयना अदिकारते मन्तोना, अनि नावा अदिकारते सयनिक लोकुरक मन्तोरक। नना वरोन हन इन्तोना ते ओर दान्तोर, अनि दुसरोन वाय इन्तोना ते ओर वान्तोर, अनि आपुनोर नोवकरतुन ‘इद किम’ इन्तोना ते ओर किन्तोर।”

¹⁰ इद केन्जुन येसुन आश्चरय आतु, अनि ओना परके वान्दुर ओरकुन, “नना इस्रायेलतिगा वने इचोन हजोर विस्वास बोनागाय कलियोन इन्जोर नना मिकुन खरोय इन्तोना इन्जोर इतुर।

¹¹ अनि पूरव अनि पश्चिमतिकेडाल पकाय लोकुरक वास अब्रहाम, इसहाक अनि याकुबनासंग स्वरग राज्यतिगा जेवन साटि उदानुर इन्जोर नना मिकुन इन्तोना।

¹² मति परमेस्वर मुनेय आचतोर विस्वास केवोर आस मतोर पकाय यहुदिलोकुरकुन बाहरो आन्दारते वाटसियानुर, अगा किलाना अनि पल्क कडरे कियाना आयार।”

¹³ असके येसु ओर रोमि अदिकारिन, “हन निया विस्वास कितोन लेहका निया साटि आयि” इन्जोर इतुर अनि ओनोर नोवकर ओदे बेरा बेस आतुर।

येसु अलग-अलग बिमार मतोर लोकुरकुन सुदरे किन्तोर

¹⁴ येसु पतरसना लोन वातुर असके पतरसना पोयाळ पिनिते हुन्जता हुळतुर।

¹⁵ येसु अदेना कयदुन इटतुर अनि अदेना पिनि रयतु, अनि अदु तेदचुन ओरा सेवा कियाला लागतु।

¹⁶ ओद दिया पोळद मुलत असके लोकुरक दुष्टात्मा मता पकाय लोकुरकुन ओना हेरे ततुरक अनि येसु अव दुष्टात्मातुन आपुना केवल उन्दिय पोल्लोते पसिहतुर अनि सबोय बिमार लोकुरकुन सुदरे कितुर।

¹⁷ “ओर आपुनास मावा कमजोरितुन आपुनिगा येतितुर अनि मावा बिमारितुन ताहतुर” इदाम परमेस्वरना पोल्लो वेहवाल यशायाहना द्वारा इन्ज मतोर ओद पोल्लो इदाम पुरा आयि इन्जोर।

येसुना चेलाल बनेमायानाता किमत

¹⁸ येसु आपुना नालुंगास बासा लोकुरा उन्दि पकाय भीळ हुळतुर असके आपुना चेलालोरकुन नहारता होदपाकाळ हन्दाना आग्या हितुर।

¹⁹ असके वरोर मूसान नियमतुन करिहवाल मानेय येसुना हेरे वास, “हे गुरु, निमा बगाय दाकि ते वने नना निया परके वायका” इन्जोर इतुर।

²⁰ असके येसु ओन, “लाळग्याहकुन मन्दान साटि पान्जांग मन्तांग अनि आबारता पिटेनुंग मन्दान साटि गुडांग मन्तांग, मति नना मानेयतोर मरिन तला इरान साटि बगाय जागा हिले” इन्जोर इतुर,

²¹ असके चेला लोकुरकनिकेडाल दुसरो वरोर येसुन, “हे प्रबु, नाकुन मुने हन्जुन नावोर बाबोना मुरदातुन मिसिहिला हिम असके पजा निया परके वायका” इन्जोर इतुर।

²² मति येसु ओन, “निमा नावा परके वाय, अनि हातोरक आपुना हातोर लोकुरा मुरदा मिसिला हिम” इन्जोर इतुर।

येसु हूरेमाटियाल वळियतुन कमेक किन्तोर

²³ येसु डोंगातिगा अन्जतुर असके ओनोर चेलालोर वने ओना परके हतुर।

²⁴ अनि नहारतिगा उन्दि पकाय हजोर हूरेमाटियाल वळिय वातु अनि डोंगा एेता पळवाते निन्दिला आस मन्दु, अनि येसु हुन्जसोर मतोर।

²⁵ असके चेला लोकुरक हेरे वास, “हे प्रबु, माकुन पिसहा, माक हायिला आतोरोम” इन्जोर वेहचुन ओन तेहतुर।

²⁶ येसु ओरकुन इतुर, “हे अल्पविस्वासि लोकुरक, बाक्या वरयान्तोरिट?” ओर तेदचुन वळिय अनि समुद्रतुन रांगतुर, अनि सबोय कमेक आतु।

²⁷ अनि ओरक आश्चरय किस, “येर बदाम मानेय मन्तोर, वळिय अनि समुद्र वने ओना आग्या मानेमान्तांग” इन्जोर इन्दा लागतुरक।

दुष्टात्मा पयतोर मानेयतुन येसु सुदरे किन्तोर

²⁸ येसु नहारता होदपाकाळ गदरेनिया लोकुरा देशतिगा अवतुर ते दुष्टात्मांग मतोर इवुर मानेय बिजगुडिताल पसियस ओन हापळेमातुरक। ओरक पकाय वरेवसना मतोरक इन्जोर बोरे ओद हरिते हन्दिला परोर आतुरक।

²⁹ ओरक जोरदे इतुरक, “हे परमेस्वरनोर मरि, निमा मावा नडुम पिसकाट कियाला बाक्या वाति? बाताल निमा बेराता मुने माकुन पकाय तकलिप हियाला इगा वातोन बहे?”

³⁰ ओरा हुडुक लक पकाय पदिंगना गोहडि मेयिला आस मन्दुंग।

³¹ दुष्टात्मांग ओन, “निमा माकुन पसियाहन्तोन ते पदिना गोहडितिगा लोहचिम” इन्जोर विनन्ति कितुंग।

³² येसु अवेहकुन, “हन्ट” इन्जोर इतुर; अनि अव पसियसुन पदिना लोपा होळियतुंग अनि सान्डे पदिना सबोय गोहडि घाटाडताल विचोरिन समुद्रतिगा हन्ज अरतुंग अनि मुळियस हातुंग।

³³ पदिनुंग मेहवालोर वितितुरक अनि नाटेनिगा हन्जुन इव सबोय पोल्लोंग अनि दुष्टात्मांग पयतोरक मानेयकना बारेते वेहतुरक।

³⁴ असके नाटेनोर सबोय लोकुरक पसियसुन येसुन मिलेमायिला वातुरक, अनि मावा सिवाताल बाहरो हन इन्जोर ओन हुळसुन विनन्ति कितुरक।