मत्ति 28 - Muria Far Western

येसु असा जिवेमास तेदान्तोर

¹ यहुदि लोकुरा पवित्र दियाता पजा हपताता पहले दिया मन्जे इतवार दिया वियानपाहारा आतपा मरियम मगदलनि अनि दुसरो मरियम येसुना बिजगुडितुन हुळिला वातुंग।

² अनि सान्डे उन्दि हजोर भुकंप आतु, बाक्याकि प्रबुनोर वरोर दूत स्वरगताल रयतुर अनि ओर बिजगुडिता कवाळ मुच मतोरक ओद कलदुन गुचिहतुर अनि अदेनिगा उदितुर।

³ ओना रुप विज लेहका अनि ओना सन्दरा बर्फ लेहका पान्डरि मता।

⁴ केपवालोरक ओन हुळस वरेते कसिंगसोर हातोरक लेहका आतुरक।

⁵ स्वरगदूत आसकुन इतुर, “वरियमाट, कुरुस पोरो अन्जहिस हव्कतोर येसुन निमाट पळकिला आतोरिट इन्जोर नना पुन्तोना।

⁶ ओर इगा हिलेर, मति आपुना पोल्लोता अनुसार ओर असा जिवेमास तेदितोर। वराट, बगा ओन इरस मतोर ओद जागा हुळाट।

⁷ अनि सान्डेय हन्जुन ओनोर चेलालोरकुन इन्ट, ‘ओर हातोरिगाडाल जिवेमास तेदितोर अनि ओर मिया पहले गलील प्रदेशते दान्तोर अनि अगा ओर मिकुन दिसानुर!’ इदाम नना मिकुन इतोना इन्जोर मरिंगमाट” इदाम इतुर।

⁸ अव वरे अनि पकाय गिरदाते बिजगुडिताल सान्डे पसियस ओनोर चेलालोरकुन समाचार वेहान साटि वितसोर हतुंग।

⁹ असके येसु अवेहकुन मिलेमातुर। अनि “मिकुन नमस्कार” इन्जोर इतुर। अव हेरे वास ओनांग काल्क अरसुन ओना आरादना कितुंग।

¹⁰ असके येसु अवेहकुन इतुर, “वरियमाट; निमाट हन्जुन नावोर तमोलोरकुन गलील प्रदेशतिगा हनिर इन्जोर वेहाट, अगा ओरक नाकुन दिसानुर।”

केपवालोर सयनिक लोकुरा खोटाल गवाहि

¹¹ असके अव आसक अगा आता सबोय पोल्लोंग चेला लोकुरकुन वेहिलाय हन्दुंग असके केपवालोर सयनिकनिगाडाल हुचुलोर सयनिक लोकुरक सहेरतिगा हन्जुन आतांग पुरा घटनातुन मुक्याल याजक लोकुरकुन वेहतुरक।

¹² असके ओरक यहुदि अदिकारिलोरासंग जमा आस विचार कितुरक अनि सयनिक लोकुरकुन पकाय डबुंग हितुरक,

¹³ “ ‘नरका माक हुन्ज मतोरोम असके ओनोर चेलालोर वासुन ओन कलस ओतुरक’ इदाम इन्किट इन्जोर इतुरक।

¹⁴ अनि इद पोल्लो राज्यपालना मुनेवनाह अवार ते माक ओन समजेह कियाकोम अनि मिकुन बाराय आयिला हेवोम आयकोम” इन्जोर इतुरक।

¹⁵ आकरिते ओरक डबुंग येतस ओरा आग्या अनुसार कितुरक। इद पोल्लो नेन्डवनाह येहुदि लोकुरकनिगा फयलेमाता मन्ता।

“दुनियाता सबोय लोकुरकुन चेला बनेकिम्ट” इन्जोर येसु आपुना चेला लोकुरकुन आग्या हिन्तोर

¹⁶ पजा अकरा चेलालोर गलील प्रदेशतिगा येसु ओरकुन हन्दिला वेहच मतोर ओद मटा पोरो हतुरक।

¹⁷ येसुन हुळतुर असके ओरक ओन आरादना कितुरक, मति दुसरो हुचुलोरक शंका कितुरक।

¹⁸ येसु ओरा हेरे वातुर, “स्वरगतिगा अनि दरतितिगा सबोय अदिकार नाकुन हिता मन्ता।

¹⁹ इन्जोर निमाट हन्जुन, बाबो अनि मरि अनि पवित्र आत्माता पोरोयते बपतिस्मा हिस,

²⁰ नना मिकुन आग्या हितोना ओद सबोय पोल्लोंग ओरकुन मानेमायिला करहिस सबोय जातितोर लोकुरकुन नावा चेलाह बनेहकिम्ट; नना ते दुनियाता अन्तवनाह दरोज मियासंग मन्तोना” इन्जोर इतुर।