मत्ति 27 - Muria Far Western

राजपाल पिलातुसना मुने येसु

¹ वियान पहारात सबोय मुक्याल याजक लोकुरक अनि यहुदि अदिकारि लोकुरक येसुन हव्कान साटि विचार कियाला लागतुरक।

² ओरक ओन दोहच ओतुरक अनि राज्यपाल पिलातुसना कयदे सोपे कितुर।

यहुदा इसकरियोतिना हायाना

³ असके येसुन दन्ड हियान साटि न्याय कितोर इन्जोर ओन पयपिहवाल यहुदाल हुळसुन ओर किता खराब बुतोता बारेते पस्तेमातुर, अनि अव तिसा चान्दिता डबुंग मुक्याल याजक अनि यहुदि अदिकारिलोरा हेरे मलस ततुर।

⁴ “नना वरोर दोष हिलेर मानेयतुन हव्कान साटि पयपिहच पकाय पाप कितोना” इदाम इतुर। ओरक ओन इतुर, “ते माक बाताल कियाकोम? अदेन निमा जिमेदार मन्तोन।”

⁵ असके ओर अव डबुनुंग मन्दिरतिगा हरचिस अगडाल हतुर। अनि हन्जुन आपुनतुन फासि किस हातुर।

⁶ मुक्याल याजक लोकुरक अव डबुनुंग येतितुरक, “इव नतुरता डबुंग आन्दुंग इन्जोर इव डबुनुंग मन्दिरता दानपेटितिगा इराना यहुदि नियमता अनुसार उचित हिले” इन्जोर वळकस वरोन दुसरोनासंग विचार कितुरक,

⁷ आकरिते ओरक अव डबुते दुसरो देशताल वास हातोर लोकुरकुन मिसान साटि वरोर कुंभारना डन्डतुन असतुरक।

⁸ इद कारणते ओद डन्डतुन नेन्डवनाह नतुरता डन्ड इदाम पोरोय इन्तोर।

⁹ “इस्रायेलतोर लोकुरक ओना साटि हियाना निश्चित किस मतोरक चान्दिता तिसा डबुंग ओरक येतितुरक,

¹⁰ अनि प्रबु नाकुन आग्या हिस मतोर अदामे कुंभारता डन्ड असान साटि अव डबुंग हितुरक” इन्जोर परमेस्वरनोर पोल्लो वेहवाल यिर्मयाहना द्वारा वेहता पोल्लो इदाम पुरा आतु।

राजपाल पिलातुस येसुना न्याय किन्तोर

¹¹ राज्यपाल पिलातुसना मुने येसु नितितुर, असके राजपाल ओन “बाताल निमा यहुदिलोरा राजाल आन्दि?” इन्जोर पुच्चेमातुर। येसु ओन इतुर, “ओद निमाय इतोन।”

¹² मुक्याल याजक लोकुरक अनि यहुदि अदिकारिलोरक ओनागा दोष लावे किसोर मतोरक असके ओर बाराय उत्तर हेवोर आतुर।

¹³ असके पिलातुस ओन, “येरक निया विरोदते बाताल बाताल गवाहि हियाला आतोर इन्जोर निमा बाताल केन्जवि?” इन्जोर पुच्चेमातुर।

¹⁴ मति येसु ओरक पुच्चेमाता बोदे आरोपता बारेते उन्दि वने पोल्लोता उत्तर हेवोर आतुर इन्जोर राज्यपाल पिलातुस पकाय आश्चरय आतुर।

राजपाल पिलातुस येसुन हव्काना दन्ड हिन्तोर

¹⁵ सबोय पसहा हनुमतिगा लोकुरक साटि लोकुरक इच्चा किन्दुरक बोरे वरोर कयदितुन तासिसिंदुर इदाम राज्यपालना उन्दि रिवाज मता।

¹⁶ ओदबेरा ओरा कयदितिगा बराब्बास पोरोयतोर बदनाम आतोर वरोर कयदि मतोर।

¹⁷ आकरिते ओरक जमा आतुर असके पिलातुस ओरकुन पुच्चेमातुर, “नना मियासाटि वरोर मानेयतुन तासिका, बोने तासियिला पहाजे?, बाताल ओर बरनब्बासिन या मसि पोरोयतोर येर येसुन पजाजे?”

¹⁸ बाक्याकि ओरक येसुन हेवाते पयपिहच हितोर इन्जोर पिलातुस पुन्दुर।

¹⁹ ओर न्यायता सिंहासनतिगा उदस मतोर असके ओना मुत्ते ओन बातमि लोहतु, “निमा ओर दरमि मानेयना बारेते बाताले नडुम अरमा, बाक्याकि ओना कारण नना नेन्ड कनिष्कानते पकाय दुःख सहेन कितोना” इन्जोर इहितु।

²⁰ मति ओरक बराब्बासतुन तसिर अनि येसुन हव्किर इन्जोर मुक्याल याजक लोकुरक अनि यहुदि अदिकारि लोकुरक लोकुरा भीळतुन भळकेह कितुरक।

²¹ राजपाल असा लोकुरा भीळतुन पुच्चेमातुर, “येरक इवुरासनिगाडाल नना मिया साटि बोन तासियाका इन्जोर निमाट इच्चा किन्तोरिट?” इन्जोर पुच्चेमातुर। “बराब्बासिन” इन्जोर लोकुरा भीळ इतुरक।

²² पिलातुस ओरकुन, “पजा मसि इन्तोर ओर येसुन, बाताल कियाका?” इदाम पुच्चेमातुर ते सबोय लोकुरक ओन, “ओन कुरुस पोरो अन्जहिच हव्किला पहाजे!” इन्जोर इतुरक।

²³ “ओर बाताल गलति कितोर?” इन्जोर पिलातुस इतुर। “ओन कुरुस पोरो अन्जहिच हव्किला पहाजे।” ओरक असा जोर-जोरदे केयस इन्दिला लागतुरक।

²⁴ असा वने पकाय दंगा आयिला आता इन्जोर दुसरो बाताले फायदा हिले इदाम पिलातुस हुळस ओर एर पयस लोकुरा मुने आपुनांग कयक नोरतुर, “नना येर सोबाय मानेयना नतुरता बारेते दोषि हिलेन, निमाट अदेन गुनेगार मन्तोरिट” इन्जोर इतुर।

²⁵ “येना नतुर मावा अनि मावा सन्तानकुन आयि” इन्जोर सबोयि लोकुरक उत्तर हितुरक।

²⁶ अदाम पिलातुस बराब्बासतुन ओरा साटि तासितुर, अनि येसुन सोटाते हिस कुरुस पोरो अन्जिहिच हव्किर इन्जोर सोपे किसितुर।

सयनिक लोकुरक येसुन अपमान किन्तोरक

²⁷ असके राज्यपाल पिलातुसनोर सयनिक लोकुरक येसुन राजपालना राजवाळाता लोपा ओस सयनिक लोकुरा सबोय दल नालुंग आस बासा जमा कितुरक,

²⁸ अनि सयनिक लोकुरक ओनांग सन्दरांग रेहच ओन रेंगाल रंगता कुरता करिहतुर।

²⁹ अनि काटाता मुकुट बनेकिस ओना तला पोरो इरतुरक, अनि ओना तिन्दान कयतिगा उन्दि बळगा हितुरक अनि ओना मुने मिन्डांग टेकेकिस “हे यहुदियातोर राजा, नमस्कार!” इदाम इन्ज ओना मजाक कियाला लागतुरक।

³⁰ असके ओना पोरो उसकतुरक, अनि बळगा पयस ओना तलापोरो असा असा हियाला लागतुरक।

³¹ ओरक ओना मजाक कियाना मारिहतुरक असके ओना रेंगाल कुरता रेहच ओनाय कुरता असा पोन्डिहतुरक, अनि कुरुस पोरो अन्जहिच हव्कान साटि ओतुरक।

येसुन कुरुस पोरो अन्जहाना

³² रोमि देशतोर सयनिक लोकुरक येसुन बाहरो ओसोर मतोरक असके कुरेनि देशतिगा मन्वाल शिमोन पोरोयतोर मानेयतुन ओरक हुळतुरक। अनि ओरक ओन पयस येसुना कुरुस पयिला जबरदस्ति कितुरक।

³³ ओरक गुलगुता अर्थ खोपळिता जागा इन्तोर ओद जागातिगा अवतुरक,

³⁴ असके ओरक कयता चव मता उन्दि चिज अंगुरता जोमातासंग मिलेह किस येसुन उन्डिला हितुरक, मति ओर अदेन नाकस हुळतुर ते अदेन उन्डाना इच्चा केवोर।

³⁵ अनि ओरक येसुन कुरुस पोरो अन्जहितुरक असके ओरक चिटिंग वाटस ओनांग सन्दरांग तुसतुरक।

³⁶ अनि ओरक अगा उदस ओन केपिला लागतुरक।

³⁷ अनि “यहुदियातोर राजाल येसु येरे आन्दुर” इदाम ओना दोष कोटता पाटि ओना तलापोरो कुरुसतिगा कोहकसितुरक।

³⁸ असके ओनासंग इवुर ओन्डकाहकुन वरोन तिन्दान कयबासा अनि दुसरोन डावान कयबासा कुरुस पोरो अन्जिहतुरक।

³⁹ ओद हरिते हनवाल-वायवालोर लोकुरक तला होलेकिस येसुन मजाक किन्दुरक,

⁴⁰ “हे मन्दिरतुन अरिहस मून्ड दियाते बनेह केवाल निमा आपुनतुन पिसहा! निमा परमेस्वरनोर मरि आन्दि ते कुरुसपोरोडाल अडिय रयस वाय” इदाम इन्दुरक।

⁴¹ अदामे मुक्याल याजक लोकुरक, नियमतुन करहिवालोर अनि यहुदि अदिकारिलोरक इदाम इन्जुन मजाक किन्दुरक,

⁴² “येर दुसरो लोकुरकुन पिसिहतुर, अनि आपुनतुन पिसहिला परोर। येर ‘इस्रायेलतोर राजाल आन्दुर’ ते इदेक कुरुसपोरोडाल रयस वायनुर ते माक ओनागा विस्वास कियाकाट।

⁴³ ओर परमेस्वरनिगा विस्वास किन्तोर। परमेस्वर येन गिरिदा किन्तोर ते इदेक ओन पिसहिविर, बाक्याकि ‘नना परमेस्वरनोर मरि आन्दान’ इन्जोर येर इन्ज मतोर।”

⁴⁴ इदामे ओनासंग कुरुस पोरो अन्जहिच मतोर ओन्डकाह वने ओना निन्दा किन्दुरक।

येसुना हायाना

⁴⁵ अनि दुपाडा बारा नेक्सुन ते मून्ड नेक्नाहका देशतिगा सबोय आन्दार आस मता।

⁴⁶ लगभग मून्ड नेकानाता हेरे येसु, “एली, एली, लमा शबक्तनी?” इन्जोर पकाय जोरदे केयस किलतुर, (इदेना अर्थ, “हे नावोर परमेस्वर, हे नावोर परमेस्वर, निमा नाकुन बाक्या तासिति?” इन्जोर मन्ता।)

⁴⁷ अगा नितस मतोरक ओरागाडाल हुचुलोर लोकुरक इद केन्जुन, “ओर एलियान केयान्तोर” इन्जोर इतुर।

⁴⁸ सान्डे ओरागाडाल वरोर वितसोर हन्जुन उन्दि स्पंज हवियता अंगुरता जोमातिगा नाहतुर अनि वदुरता लाटितिगा इरस ओन उन्दिलाय हितुर।

⁴⁹ मति दुसरोर इतुर, “पोसाट, एलियाल ओन पिसहिला वान्तोर या वायोर हुळाट” इन्जोर इतुर।

⁵⁰ असके येसु पकाय जोरदे किलसोरिन जिवा तासितुर।

⁵¹ अनि असके येरुसलेम मन्दिर लोपाता पळदा पोरोडाल अडियवनाह हरस रन्ड तुकळेंग आतुंग। अनि दरति होलेमातु अनि आदिंग ओरतुंग।

⁵² अनि बिजगुडिंग तरियतुंग अनि हास मतोर पवित्र लोकुरा पकाय मुरदा जिवेमास तेदितुरक।

⁵³ अनि येसुना असा जिवेमास तेदानाता पजा ओरक बिजगुडिताल पसियस पवित्र सहेरतिगा मन्जे येरुसलेम सहेरतिगा हतुरक अनि पकाय लोकुरकुन दिसतुरक।

⁵⁴ असके सयनिक लोकुरा वरोर अदिकारि अनि ओनासंग येसुन केपिन्दुरक, भुकंप अनि अदेनासंग आस मता दुसरो सबोय पोल्लोंग हुळस पकाय वरियतुरक, “खरोय येर परमेस्वरनोर मरि मतोर” इन्जोर इतुर।

⁵⁵ गलील प्रदेशताल येसुना सेवा किसोर ओनासंग वास मतांग पकाय आसक बोव लकडाले हुळसोर मतांग।

⁵⁶ अवेहनिगा मरियम मगदलनि अनि याकुब अनि योसेसना अवहारि मरियम अनि जबदिनोर मरकना अवहारि वने मतांग।

येसुन मिसाना

⁵⁷ पोळद मुलत असके यूसुफ पोरोयतोर अरमतिया प्रदेशतोर वरोर दनवान मानेय अगा वातुर ओर वने येसुनोर चेलाल मतोर।

⁵⁸ ओर पिलातुसना हेरे हन्जुन येसुना मुरदातुन तलकतुर। असके पिलातुस येसुना मुरदा ओन हियाना आग्या हितुर।

⁵⁹ यूसुफ येसुना मुरदा येतितुर अनि मुरदातुन मान्जता चादरते हुरितुर,

⁶⁰ अनि ओर आदितिगा कातस मतोर ओना पुनाल बिजगुडितिगा येसुना मुरदातुन इरस बिजगुडिता कवाळता मुने उन्दि हजोर कल दुरसोर मुचुन ओर मलस हतुर।

⁶¹ मरियम मगदलनि अनि दुसरो मरियम अगा बिजगुडिता मुने उदस मतांग।

येसुना बिजगुडितुन सयनिक लोकुरक केपान्तोरक

⁶² ओद दिया यहुदि लोकुरा पवित्र दिया साटि तयारिकियाना दियाता मुनेटा दिया मता, मुक्याल याजक लोकुरक अनि परीसि लोकुरक पिलातुसना हेरे जमा आस इतुरक,

⁶³ “हे सयबाल, ओर दोखा केवाल जिवित मतोर असके, ‘नना मून्ड दियाता पजा असा जिवे मायका’ इन्जोर माकुन इन्ज मतोर, ओद पोल्लो इदेक माकुन आटवन मन्ता।

⁶⁴ इन्जोर ओनोर चेलालोर वास ओना मुरदातुन कलस ओयिर अनि ‘ओर हातोरिगाडाल जिवेमास तेदितोर’ इन्जोर लोकुरकुन इन्दानुरक, असके ओद आकरि दोखा पहलेटाताल वने खराब आयमाकि इन्जोर तिसरो दियावनाह बिजगुडितुन केपिला पहाजे इन्जोर आग्या हिम” इन्जोर इतुरक।

⁶⁵ पिलातुस ओरकुन, “निमाट येसुना बिजगुडिता मुने केपान साटि सयनिक लोकुरकुन केय परान्तोरिट। हन्ट! बचोन सोबाय रितिते केपाना निमाट पुन्तोरिट अचोन ध्यानते केपाट” इन्जोर इतुर।

⁶⁶ अदाम ओरक सयनिक लोकुरकुन संग ओतुरक, अनि ओरक बिजगुडिता कवाळ मुच मता ओद हजोर कलदा पोरो शिक्का हिस केपवालोर सयनिक लोकुरकुन अगा इरसुन बिजगुडिता केपाना पका कितुरक।