मत्ति 26 - Muria Far Western

येसुन हव्कान साटि डाव

¹ येसु इव सबोय पोल्लोंग इन्ज मारिहतुर असके पजा ओर आपुना चेलालोरकुन,

² “रन्ड दियाना पजा पसहाता हनुम मन्ता इन्जोर निमाट पुन्तोरिट अनि इद दिया मानेयतोर मरि कुरुस पोरो अन्जहिच हव्कान साटि पयपियाहनुर” इन्जोर इन्दिला लागतुर।

³ असके मुक्याल याजक लोकुरक अनि यहुदि अदिकारि लोकुरक कायिफा पोरोयतोर हजोर याजकना राजवाडाता डुवारतिगा जमा आतुरक,

⁴ अनि येसुन दोखाते पयस हव्कस वाटाना इन्जोर वरोन दुसरोनासंग विचार कियाला लागतुर।

⁵ मति “लोकुरा नडुम पकाय गळबड आयमाकि इन्जोर पसहाता हनुमता बेरा आयो” इन्जोर ओरक इन्दुरक।

येसुना पोरो दयमुर निय दोसान्ता

⁶ येसु बेतनियाहतिगा कोळि बिमारि मतोर शिमोनना लोन मतोर असके,

⁷ उन्दि आळ पकाय किमति कलदा बरणितिगा पकाय किमतिता दयमुर निय ओना हेरे ततु, अनि ओर जेवेकियाला उदितुर असके ओद दयमुर निय ओना तलापोरो दोसतु।

⁸ इद हुळसुन ओनोर चेला लोकुरक होंगदे वरोन दुसरोन इतुर, “इदेन बाक्या बेकारते खरचा किति?

⁹ इदेन पकाय किमतते मोमसुन अव डबुंग गरिब लोकुरकुन तुस परिन्द” इन्जोर इतुर।

¹⁰ इद पुन्ज येसु ओरकुन इतुर, “इद आळदुन बाक्या तकलिप हिन्तोरिट? ओद नावा साटि सोबाय बुतो किता।

¹¹ गरिब ते मियासंग दरोज मन्तोरक, मति नना दरोज मियासंग मनोन आयका।

¹² ओद इद दयमुर निय नावा मेन्दुलतिगा दोसता ओद नावा मिसान साटि किता मन्ता।

¹³ दुनियातिगा बगा बगा इद सोबाता पोल्लो वेहानुरक अगा सबोय अदेना आटवन चर्चा आयार इन्जोर नना मिकुन खरोय इन्तोना।”

यहुदाल येसुन पयपियान साटि डबुंग येतान्तोर

¹⁴ असके येसुना बारा खास चेलाह लोकुरकनिगा वरोर मन्तोर यहुदा इस्करियोति मुक्याल याजक लोकुरा हेरे हन्जुन,

¹⁵ “नना ओन मिया कयदे पयपिस हियाका ते नाकुन बाताल हियाकिट?” इन्जोर इतुर; ओरक ओन चान्दिता तिसा डबुंग काहच हितुर।

¹⁶ अनि ओदे बेराताल ओर येसुन पयपिहयाना सन्दि हुळन्दुर।

येसु पसहा हनुमता जेवन तिन्तोर

¹⁷ यहुदि लोकुरा अखमिरि रोटिता हनुम दियाता पहले दिया, चेला लोकुरक येसुना हेरे वास, “निया साटि पसहा हनुमता जेवन माक बगा तयारि कियाना निया इच्चा मन्ता?” इन्जोर पुच्चेमातुरक।

¹⁸ येसु ओरकुन इतुर, “सहेरतिगा वरोर मानेयना हेरे हन्जुन, ‘नावा बेरा हेरे मन्ता; नना आपुना चेला लोकुरासंग निया लोतिगा पसहाता जेवन तिनका इन्जोर गुरु इन्तोर’ ” इदाम ओन इन्ट।

¹⁹ चेला लोकुरक येसुना आग्या लेहका पसहा हनुमता जेवन तयारि कितुरक।

²⁰ पोळद मुलत असके येसु आपुना बारा चेला लोकुरासंग जेवन कियाला उदितुर।

²¹ ओरक तिन्दिला आस मन्दुरक असके येसु, “मियागाडाल वरोर मानेय नाकुन पयपियाहनुर इन्जोर नना मिकुन खरोय इन्तोना” इदाम इतुर।

²² असके ओरक पकाय दुःखि आतुरक, अनि “ओर नना आन्दान बहे प्रबु?” इदाम सबोय लोकुरक ओन पुच्चेमायिला लागतुरक,

²³ ओर उत्तर हितुर, “नावासंग रोटि वाटितिगा आहच तिन्दिला आतोर वरोर नाकुन पयपियाहनुर।

²⁴ नावा बारेते पवित्र पुस्तकतिगा कोटता लेहका नना मानेयतोर मरि हायका। मति मानेयतोर मरिन पयपियाहन्तोर ओर मानेयतुन परमेस्वरताल पकाय दन्ड पुटार, ओर जनमे आयोर आस मनेर ते ओना साटि बेस आस मन्वार।”

²⁵ असके ओन पयपिहवाल यहुदाल, “हे रब्बी, ओर नना आन्दान बहे?” इन्जोर पुच्चेमातुर, येसु ओन इतुर, “इंगो! निमाय आन्दि।”

प्रबु-जेवन

²⁶ ओरक तिन्दिला आस मन्दुरक असके येसु रोटितुन पयतुर अनि परमेस्वरना धन्यवाद किस रोटितुन किळिहतुर अनि चेलालोरकुन हितुर, “इद येचुन तिन्ट, इद नावा मेन्दुल आन्द” इन्जोर इतुर।

²⁷ पजा ओर अंगुर जोमाता कटोरातुन पयस धन्यवाद कितुर, अनि ओरकुन हितुर, “निमाट सबोय लोकुरक इगाडाल उन्ट,

²⁸ इद नावा नतुर आन्दु, इदेनते परमेस्वर आपुना लोकुरासंग उन्दि पुनाल करार बनेकितोर। अनि इद पकाय लोकुरा पापता मापि साटि पसियता मन्ता।

²⁹ मावा बाबोना राज्यतिगा मियासंग पुनाल आस अंगुरता जोमा उन्दानावनाह अंगुरता इद जोमा असा नना उनोन आयिका इन्जोर नना मिकुन इन्तोना।”

³⁰ असके पजा ओरक भजन इन्ज जयतुन मटा पोरो हतुरक।

पतरस येसुन पुनोर इन्तोर

³¹ असके पजा येसु ओरकुन इतुर, “नेन्डे नरका निमाट सबोय लोकुरक नावा विस्वास तासिस नावा हेरेटाल वितोरिट, बाक्याकि ‘नना मेहवालतुन असकिका अनि गोहडिता बेळांग हिके-होके आयनुंग’ इदाम पवित्र पुस्तकतिगा कोटता मन्ता।

³² मति नना हातोरिगाडाल असा जिवेमास तेदानपा मिया मुने गलील प्रदेशतिगा दाका।”

³³ असके पतरस, “सबोय लोकुरक निया विस्वास तासिस निया हेरेटाल वितानुर ते वने नना निया विस्वास तासोन आयका” इन्जोर उत्तर हितुर।

³⁴ येसु ओन, “नेन्डे नरका निमा कोर कुसानाता मुने नाकुन मून्ड बेरांग पुनोन इन्कि” इन्जोर नना निकुन खरोय इन्तोना इदाम इतुर।

³⁵ “नाकुन नियासंग हायिला वने पुटार ते वने नना निकुन बसकेय तासिवोन आयका” इदाम पतरस येसुन उत्तर हितुर। अदामे सबोय चेला लोकुर वने इतुरक।

गतसमनि बगिचातिगा येसुना प्रार्थना

³⁶ असके पजा येसु आपुनोर चेलाह लोकुरासंग गतसमनि पोरोयदा उन्दि बगिचातिगा वातुर अनि आपुनोर चेलाह लोकुरकुन, “नना अगा हन्जुन प्रार्थना किस मलस वायाना वनाह इगाय उदस मन्ट” इन्जोर इतुर।

³⁷ ओर पतरस अनि जबदिनोर इवुरास मरकुन आपुनासंग ओतुर अनि ओर दुःखि अनि व्याकुल आयिला लागतुर।

³⁸ असके येसु ओरकुन इतुर, “नावा जिवा हायाना लेहका पकाय दुःखि मन्ता, निमाट इगा पोस नावासंग केपसोर मन्ट।”

³⁹ पजा ओर हुचुन्सा असा मुने विळस अडिय अरसुन “हे नावोर बाबो, आय परार ते पकाय तकलिपता इद वाटि नावा हेरेटाल लक किम, ते वने नावा इच्चा लेहका आयो मति निया इच्चा लेहका आयि” इन्जोर प्रार्थना कितुर।

⁴⁰ पजा ओर चेलाहना हेरे वास ओरकुन हुन्जतोर हुळतुर। अनि ओर पतरसिन इतुर, “बाताल निमाट नावासंग उन्दि गन्टावने केपसोर मन्दिला परविट?

⁴¹ निमाट परिक्षाते अरियवि आयकिट इन्जोर केपसोर मन्जुन प्रार्थना किसोर मन्ट। आत्माते तयार मन्ता मति मेन्दुल कमजोर मन्ता” इन्जोर इतुर।

⁴² पजा ओर दुसरो बेरा हन्जुन, “हे नावोर बाबो, नना इद सहेन कियाना पकाय जरुरि मन्ता ते निया इच्चा पुरा आयि” इन्जोर प्रार्थना कितुर।

⁴³ अनि ओर मलस वातुर असके चेलालोकुरक पकाय हुसकाळते असा हुन्ज मतोरक इदाम हुळतुर।

⁴⁴ ओरकुन तासिस ओर असा हतुर, अनि येसु मुने प्रार्थना किता अवेय पोल्लोते असा वने तिसरो बेरा प्रार्थना कितुर।

⁴⁵ असके पजा ओर चेलाह लोकुरा हेरे वासुन, “इदेक हुन्जसोर आराम किम्ट, हुळाट, बेरा अवता, अनि नना मानेयतोर मरि पापिलोरा कयदे सोपेह कियानुर।

⁴⁶ तेदाट, माक दटु, हुळाट, नावोर पयपिहवाल हेरे अवतोर” इन्जोर इतुर।

येसुन दोखा हिस पयान्तोरक

⁴⁷ ओर इदाम वळकसोर मतोर असके बारा चेलाहनिगाडाल वरोर मतोर यहुदाल अनि ओनासंग मुक्याल याजक लोकुरक अनि यहुदि लोकुरा अदिकारि लोकुरक लोहतोरक पकाय भीळ तलवारक अनि टेन्गांग पयस वातुरक।

⁴⁸ येसुन पयपिहवाल मतोर यहुदाल, “नना बोन चुमा येतका ओरे येसु आन्दुर, ओन पयस ओम्ट” इदाम सुचेहकिस मतोर।

⁴⁹ अनि सान्डेय यहुदा येसुना हेरे वास “हे गुरु, नमस्कार” इदाम इन्ज येसुन चुमा कितुर।

⁵⁰ येसु ओन, “हे गोतियाह, निमा बोद बुतो साटि वातोन अदेन किम” इन्जोर इतुर। असके लोकुरक ओना हेरे वास येसुन आहच ओन बन्द कितुरक।

⁵¹ येसुनोर संगवारिहनिगाडाल वरोर आपुना तलवार टन्डतुर अनि हजोर याजकना दासतुन हितुर अनि ओना कवितुन कदियतुर।

⁵² असके येसु ओन, “तलवार अदेना काठिनिगा इरा बाक्याकि तलवार ताकाहन्तोरक सबोय लोकुरक तलवारते नाश आयनुरक।

⁵³ नना आपुना बाबोन विनन्ति कियाका ते इदेक बारा सयनिक दलताल जास्तो स्वरगदूतकुन नावा हेरे नाकुन केपान साटि लोहानुर इदाम निमाट पुनविट बहे?

⁵⁴ मति अदाम कियाकि ते पवित्र पुस्तकतिगा इदाम आयाना जरुरि मन्ता इन्जोर कोटस मता ओव पोल्लोंग बदाम पुरा आयार?” इन्जोर इतुर।

⁵⁵ ओद बेरा येसु भीळतुन, “बाताल निमाट तलवारक अनि टेन्गांग पयस नाकुन कलेर लेहका पयान साटि पसियतोरिट? नना दरोज मन्दिरतिगा उदस उपदेश हिन्दान असके निमाट नाकुन पयस ओयविट।

⁵⁶ मति इद सबोय परमेस्वरना पोल्लो वेहवालोर कोटता पोल्लो पुरा आयि इन्जोर इदाम आतु” इन्जोर इतुर। असके सबोय चेला लोकुरक ओन तासिस वितितुरक।

येसु यहुदि लोकुरा हजोर सभाता मुने

⁵⁷ येसुन पयवालोर येसुन कायिफा पोरोयतोर हजोर याजकना हेरे ओतुरक, अगा मूसाना नियमतुन करिहवालोरक अनि यहुदि अदिकारि लोकुरक जमा आस मतोरक।

⁵⁸ मति पतरस लकडाले ओना परके परके हजोर याजकना डुवार वनाह हतुर अनि लोपा हन्जुन आकरिवनाह बदाम आयार इन्जोर हुळान साटि केपवालोरासंग उदितुर।

⁵⁹ मुक्या याजक लोकुरकुन अनि यहुदि लोकुरा हजोर सभा सबोय येसुन हव्कान साटि ओना विरोदते खोटाल गवाहि पळकिन्दुरक।

⁶⁰ पकाय खोटाल गवाह हेवालोरक मुनेवास खोटाल गवाहि हितुरक मति ओरकुन येसुन हव्कान साटि बाताले सबुत पुटो आतु।

⁶¹ आकरिते इवुरक मानेयक यहुदि लोकुरा हजोर सभाता मुने वातुरक, “नना परमेस्वरना मन्दिरतुन मुटिहच अदेन मून्ड दियाते बनेहकिया परान्तोना इन्जोर येर इतोर” इदाम ओरक वेहतुरक।

⁶² असके हजोर याजक नितस येसुन, “येरक निया बारेते गवाहि हिन्तोरक बाताल निमा ओरकुन बाराय उत्तर हेवि?” इन्जोर पुच्चेमातुरक।

⁶³ मति येसु बाराय वळकोर। असके महायाजक ओन “निमा परमेस्वरनोर मरि मसि आन्दि ते माकुन वेहा, नना निकुन जिवित परमेस्वरना पोरोयते शपथ हिन्तोना” इन्जोर इतुर।

⁶⁴ येसु ओन इतुर, “निमाय इतोन, इदेकताल निमाट मानेयतोर मरिन सबोय लाववाले परमेस्वरना तिन्दान कयबासा उदितोर अनि आबारता ढगिंगते वायाना वने हुळकिट इन्जोर नना मिकुन इन्तोना” इदाम इतुर।

⁶⁵ असके हजोर याजक आपुनांग सन्दरांग हरिहतुर, “येर परमेस्वरना निन्दा कितोर, इदेक माक गवाहता असा बाताल जरुरि मन्ता? निमाट इदेक परमेस्वरना निन्दा केन्जतोरिट।

⁶⁶ येना बारेते निमाट बाताल विचार किन्तोरिट?” इन्जोर ओर पुच्चेमातुर। “येर गुन्हेगार मन्तोर, येर हायाना योग्य मन्तोर” इन्जोर ओरक उत्तर हितुरक।

⁶⁷ असके ओरक ओना चेहरातिगा उसकतुरक अनि ओन ढुसाते हितुरक, दुसरोर थापळिते हिस इदाम इतुरक,

⁶⁸ “हे मसि, निकुन बोर थापळिते हितुर इन्जोर माकुन भविष्यवाणि किस वेहा।”

पतरस येसुन पुनोन इन्तोर

⁶⁹ पतरस बाहरो डुवारतिगा उदस मतोर। असके हजोर याजकना उन्दि दासि ओना हेरे वास, “निमा वने गलीलितोर येसुनसंग मतोन बहे” इन्जोर इतु।

⁷⁰ “निमा बाताल इन्दिला आतोन इन्जोर नना पुनोन” इदाम ओर सबोय लोकुरा मुने येसुन पुनोन इतुर।

⁷¹ ओर मन्डातिगा हतुर असके दुसरो दासि ओन हुळस अगा मतोरकुन, “येर वने नासरितोर येसुनसंग मतोर” इन्जोर इतु।

⁷² “नना ओर मानेयतुन पुनोन” इदाम ओर दुसरो बेरा शपथ तिन्ज येसुन पुनोन इतुर।

⁷³ हुडुक बेरा पजा अगा नितितोर लोकुरक पतरसना हेरे वास ओन, “खरोय निमा वने ओरागाडाल वरोर आन्दि बाक्याकि निया वळकनाता लेंग निमा ओरागाडाल वरोर आन्दि इन्जोर तोहान्ता” इन्जोर इतुरक।

⁷⁴ असके पतरस, “नना ओर मानेयतुन पुनोन! नना इन्तोना इद पोल्लो खरोय आयोते परमेस्वर नाकुन दन्ड हेविर। ओर मानेयतुन नना पुनोन” इदाम ओर शपथ किस इन्दिला लागतुर। अनि सान्डेय कोर कुसतु।

⁷⁵ असके “कोर कुसाना मुने निमा नाकुन मून्ड बेरांग पुनोन इन्कि” इदाम येसु इतोर ओद पोल्लो पतरस आलिहतुर। अनि ओर बाहरो हन्जुन पकाय दुःखते किलतुर।