मत्ति 24 - Muria Far Western

येरुसलेम मन्दिरता नाश

¹ येसु येरुसलेम मन्दिरताल पसियस हन्जोर मतोर असके ओनोर चेलालोर येरुसलेम मन्दिर बचोन सोबाय बनेकितोर इदाम तोहान साटि ओना हेरे वातुरक।

² येसु ओरकुन, “निमाट इद मन्दिर सबोय हुळिला आतोरिट बहे? इगा उन्दि कलदा पोरो दुसरो कल मनो आस इद मन्दिरता सबोय कल अडिय अरहार इन्जोर नना मिकुन खरोय इन्तोना।”

पकाय तकलिप अनि दुःखता सुरुवात

³ येसु जयतुन मटा पोरो उदस मतोर असके चेला लोकुरक वरोरे आस येसुना हेरे वास ओन, “इव पोल्लोंग बसके आयनुंग? अनि निया वायाना अनि दुनियाता अन्तता चिन्ह बाताल आयार?” इन्जोर माकुन वेहा इन्जोर विनन्ति कितुरक।

⁴ येसु ओरकुन उत्तर हितुर, “बोरे मिकुन भळके केमाकिर इन्जोर सावदान मन्ट!

⁵ ‘नना मसि आन्दान’ इदाम इन्जुन पकाय लोकुरक नावा पोरोयते वास पकाय लोकुरकुन भळके कियानुरक।

⁶ निमाट लळायिह अनि लळायिता बारेता समाचार केन्जकिट मति वरियमाट बाक्याकि इव आयाना जरुरि मन्ता, मति ओद बेरा दुनियाता अन्त आयो आयार।

⁷ बाक्याकि जाति जातिता विरोद लळायि कियानुरक अनि उन्दि राज्य दुसरो राज्यता विरोद लळायि कियानुर अनि पकाय जागातिगा दुष्काळ अनि भुकंप आयनुंग।

⁸ इव सबोय पोल्लोंग पकाय तकलिपता सुरु आयार।

⁹ ओद दियांग मिया विरोदि लोकुरक मिकुन पकाय तकलिप कियाना साटि दुसरोना कयदे हियानुरक अनि ओरक मिकुन हव्कानुरक, अनि नावा चेला आयानाता कारण सबोय जातितोर लोकुरक मियासंग दुश्मनि कियानुरक।

¹⁰ ओद दियांग नावा चेलाल लोकुरकनिकेडाल पकाय लोकुरक नावा विस्वास तासियानुरक, अनि वरोर दुसरोन पयपियाहनुरक अनि वरोर दुसरोन दुश्मनि इरानुरक,

¹¹ परमेस्वरना पोल्लो वेहवाल इदाम आपुनतुन खोटाल वेहवालोर पकाय लोकुरक वासुन पकाय लोकुरकुन भळके कियानुरक।

¹² दुनियातिगा लोकुरक खराब बुतो कियाना पकाय आयनुंग इन्जोर पकाय लोकुरा मया बन्द आयार।

¹³ मति आकरिवनाह हिमते सहन किस मन्दानुर ओनाय अनन्त काळता हायानाता दन्डताल पिसहानुर।

¹⁴ अनि स्वरग राज्यता इद सोबाता पोल्लो सबोय जातितिगा गवाहि आस सबोय दुनियातिगा प्रचार किहानुर असके अन्त वायार।”

पकाय हजोर तकलिपता सुरुवात

¹⁵ येसु असा इतुर, “मति परमेस्वरना पोल्लो वेहवाल दानियलना द्वारा पकाय वरसाना मुने वेहच मतोर लेहका बसके निमाट सबोय तासिस विताना कारण मन्ता ओद अशुद्ध चिजतुन मन्दिरता पवित्र जागातिगा नितिता हुळकिट, (इदेना अर्थ बाताल मन्ता इन्जोर वाचेकेवाल आपुनास समजेमायिर)।

¹⁶ असके यहुदि प्रदेशतिगा मन्तोरक ओर लोकुरक मटा पोरो विचोर हन्ट।

¹⁷ लोता पोरो मन्दानुर ओर आपुना लोताल बाताले चिज टन्डान साटि अडिय रेयमाकिर।

¹⁸ अनि डन्डतिगा मन्दानुर ओर आपुना बिलानकेट साटि परके हन्माकिर।

¹⁹ ओद दियांगते मेन्दुलते मन्दानुंग अनि पाल उहचोर मन्दानुंग अवेहना साटि पकाय तकलिप आयार!

²⁰ मति मिया विताना पिनि दियांगते या पवित्र दियाते आयमाकि इन्जोर प्रार्थना किसोर मन्ट।

²¹ बाक्याकि दुनियाता सुरुवाताल इदेकवनाह आयो अनि असा बसकेय आयो आयार इदाम पकाय तकलिप ओद बेरा आयार।

²² अनि परमेस्वर ओव दियानुंग कमि केवोर आस मनेर ते बोरे मानेय पिसोर आस मनेर मति आपुना आचतोर लोकुरा कारण ओर ओव दियानुंग कमि कियानुर।

²³ ओद दियांग बोरे मिकुन ‘हुळाट, मसिहा इगा मन्तोर या अगा मन्तोर!’ इदाम इनिर ते विस्वास केमाट।

²⁴ बाक्याकि पकाय खोटाल मसि अनि नना परमेस्वरना पोल्लो वेहवाल इदाम खोटाल वेहवालोरक तेदचुन आय परार ते आचतोरकुन वने भळके कियान साटि हजोर चिन्हा अनि पकाय चमत्कारता बुतोंग किस तोहानुरक।

²⁵ आटवन इराट, नना पहलेटाले मिकुन इद सबोय इतोना।

²⁶ इन्जोर ओरक मिकुन ‘हुळाट, ओर वारु पल्लातिगा मन्तोर’ इन्जोर इनिर ते बाहरो पसियस हन्माट; या ‘हुळाट, ओर खोलि लोपा मन्तोर’ इदाम इन्दानुर ते विस्वास केमाट।

²⁷ बाक्याकि बिजलि पुरवतिकेडाल पसियस पचिमवनाह मान्जान्ता अदामे नना मानेयतोर मरिना वने वायाना आयार।

²⁸ बगाय मुरदा मन्दार अगाय गिदाह जमा आयनुंग।”

मानेयतोर मरिना असा मलस वायाना

²⁹ येसु असा वेहतुर, “ओव दियांगता पकाय तकलिपता पजा ‘सान्डेय पोळद आन्दार आयार अनि नलेन्ज वेळिचि हेवो आयार, अनि हुकोंग आबारताल अरानुंग अनि आबारतांग लावक होलेमायनुंग’।

³⁰ असके मानेयतोर मरिना चिन्हा आबारतिगा दिसार अनि पजा दरतिता सबोय जातितोर लोकुरक वरेते किलसोर नना मानेयतोर मरिन पकाय लाव अनि महिमातासंग आबारता ढगिंगते वायानपा हुळानुरक।

³¹ ओर पिपारिता हजोर लेंगदासंग आपुनोर स्वरगदूतकुन लोहनुर, अनि ओरक आबारता उन्दि सिवाताल दुसरो सिवावनाह नालुंगास बासाडाल आपुनोर आचतोर लोकुरकुन जमा कियानुरक।”

अन्जीर मराता पिटो

³² येसु असा वेहतुर “अन्जीर मराताल उन्दि पोल्लो करयाट: अन्जीर मरातांग आकिंग कावसुन अदेना कोहक हिरवो आस अदिते पुनाह आकिंग कोडसातांग असके इदेक डोकाल वाता इन्जोर लोकुरक समजेमान्तोरक।

³³ इदाम निमाट इव सबोय पोल्लोनुंग हुळकिट असके ओर हेरे कवाळ मुने अवतोर इन्जोर समजेमाम्ट।

³⁴ इव सबोय पोल्लोंग पुरा आयो आयनुंग अचोवनाह इद पिळिता अन्त आयो आयार इन्जोर नना मिकुन खरोय इन्तोना।

³⁵ आबार, अनि दरति बदलेमायार मति नावा पोल्लो बसकेय बदलेमायो आयार।”

दरोज केपसोर मन्ट

³⁶ येसु असा वेहतुर, “नना मानेयतोर मरिना असा मलस वायानाता ओद दियांगता अनि ओद बेराता बारेते स्वरगतोर दूतक अनि नना मरि वने पुनोर मति केवल मावोर बाबो पुन्तोर।

³⁷ नुहना दियांगता लेहका नना मानेयतोर मरिना वायाना वने आयार।

³⁸ बाक्याकि पकाय हजोर उसाता मुनेटा दियांग नुह हजोर डोंगातिगा अन्जोर ओद दियावनाह लोकुरक तिन्जोर-उन्डोर मतोरक अनि ओरा मानेयक अनि आसक मरमिंग किसोर मतोरक।

³⁹ अनि पकाय हजोर उसा वास सबोय लोकुरकुन पोंगहिस ओयानवनाह ओरकुन बाराय समजेमायो आत अदामे नना मानेयतोर मरिना वने वायाना आयार।

⁴⁰ ओदबेरा इवुर मानेय डन्डतिगा बुतो किसोर मन्दानुरक ओराकेडाल वरोन ओयनुर अनि दुसरोन अगाय तासियानुर।

⁴¹ रन्ड आसक उन्दि जतातिगा पिन्डि नोरसोर मन्दानुंग अव रन्डनिगाडाल उन्दि ओयनुर अनि दुसरो अगाय तासियानुर।

⁴² इन्जोर मिवोर प्रबु बोद दिया वायनुर इदाम निमाट पुनविट इन्जोर केपसोर मन्ट।

⁴³ मति कलेर बोद बेरा वायनुर इन्जोर लोतोर मालकाल पुन्ज मनेर ते ओर केपसोर मन्ज मनेर, अनि आपुना लोन ओहिला हेवोर आस मनेर इदाम पुन्ट।

⁴⁴ इन्जोर निमाट विचार केविट ओद बेरा नना मानेयतोर मरि वायनुर इन्जोर निमाट वने तयार मन्ट।”

इमानदार दास अनि दुष्ट दास

⁴⁵ येसु असा इन्दिला आतोर, “आपुना लोतोरकुन ठहरे किता बेरा जेवन हेविर इन्जोर मालकाल अदिकारि ठहरे कितोर इमानदार अनि बुद्धिमान दास बोर मन्तोर?

⁴⁶ ओनोर मालकाल वायानपा असके अदामे बुतो कियाना हुळान्तोर ओर दास धन्य मन्तोर।

⁴⁷ मालकान ओन आपुना सबोय संपतितिगा अदिकारि आस निवळे कियानुर इन्जोर नना मिकुन खरोय इन्तोना।

⁴⁸ मति ओर दास दुष्ट अनि ओना मालकाल इदेक सान्डे मलस वायोर इदाम आपुना मन्दिगा विचार कितुर।

⁴⁹ अनि आपुनोर संगवाले दासकुन हाहचोर मन्दानुर अनि दाळंगो उन्वालोरासंग तिन्जोर उन्डोर मन्दानुर।

⁵⁰ ते ओर दास विचार वने केवोर आयनुर ओद बेराते ओनोर मालकाल वायनुर।

⁵¹ अनि ओर दुष्ट दासतुन पकाय दन्ड हिस सोबाय बुतो केवालोर कपटि लोकुरासंग इरानुर; अगा लोकुरक किलसोर अनि नोमुरुते पल्क कटरे किसोर मन्दानुर।”