मत्ति 20 - Muria Far Western

अंगुरता बगिचातिगा रोजि केवालोरा पिटो

¹ स्वरगराज्यता बारेते लोकुरकुन समजेमायान साटि येसु इदाम असा उन्दि पिटो वेहतुर, “स्वरग राज्य आपुना अंगुरता बगिचातिगा बुतो कियाला बुतो केवालोरकुन केयान साटि हतोर लोन मालकान लेहका मन्ता।

² ओर बुतो केवालोरकुन उन्दि दियाता रोजि ठहरे किस आपुना अंगुरता बगिचातिगा ओर बुतो कियान साटि लोहतुर।

³ नोव नेकाना हेरे लोनमालकाल असा लोताल पसियतुर अनि हुचुलोर लोकुरक हाटुमतिगा बोदे बुतो हिलेर आस बेकारे नितितोर इन्जोर ओर हुळतुर।

⁴ असके ओरकुन ‘निमाट वने अंगुरता बगिचातिगा हन्ट, मिकुन उन्दि दियाता योग्य मन्ता रोजि नना मिकुन हियाका’ इन्जोर इतुर; आकरिते ओरक वने बगिचातिगा बुतो कियाला हतुर।

⁵ पजा ओर दुपाडा बारा अनि मून्ड नेकाना हेरे पसियस अदामे कितुर।

⁶ सयुंग नेकाना हेरे ओर असा पसियस हाटुमतिगा दुसरो लोकुरकुन नितितोर हुळतुर अनि ओरकुन, ‘निमाट इगा दियामेन्ड बेकारते बाक्या नितितोरिट?’ इन्जोर पुच्चेमातुर।

⁷ ओरक ओन ‘माकुन बोरे रोजिते केयोर’ इन्जोर ओर उत्तर हितुर। असके मालकाल ओरकुन ‘निमाट वने अंगुरता बगिचातिगा हन्ट’ इन्जोर इतुर।”

⁸ “नुलपेहबेरा अंगुरता बगिचातोर मालकाल आपुनोर हिसाब इरवालिन इतुर, ‘बुतो केवाल लोकुरकुन केयस परकेडाल वातोर अनि पहले वातोरवनाह ओरकुन रोजि हिसिम’ इन्जोर इतुर।

⁹ अदामे सयुंग नेकतपा अंगुरता बगिचातिगा हतोरक बुतो केवालोरकुन उन्दि दियाता योग्य रोजि पुटतु।

¹⁰ मुने वातुर ओरक माकुन वले डबुंग पुटानुंग इदाम विचार कितुरक मति ओरकुन वने केवल उन्दि दियाता योग्य रोजि पुटतु।

¹¹ ओद डबुंग येचुन ओरक मालकाना विरुद बळबळेमासोर इन्दिला लागतुरक,

¹² ‘येर परकेडाल वातोर केवल उन्दिय घंटा बुतो कितुर ते वने निमा ओरकुन पोळदमेन्ड कासता अदिते तकलिप आस बुतो कितोम मावा बराबर उन्दि दियाता रोजि हिति’ इन्जोर इतुर।

¹³ मालकाल ओरागडाल वरोन इतुर, ‘हे गोतियाल, नना निया पोरो बाराय अन्याय केवोन। बाताल निमाय नावाकेडाल उन्दि दियाता योग्य रोजिते बुतो कियाना ठहरे केवि आस मन्दि?

¹⁴ निया रोजि बचोन मन्ता अदेन येता अनि हन; निकुन बचोन हियाका अचोने येर परकेडाल वातोर ओरकुन वने हियाका इदाम नावा इच्चा मन्ता।

¹⁵ आपुना चिजतुन नावा इच्चा लेहका नना कियाका इन्जोर बाताल इद उचित हिले? नना बाताले हियान साटि हजोर मन मन्ता इन्जोर बाताल निमा नावा हेवा किन्तोन बहे?’

¹⁶ इदामे परकेडोर ओर मुने आयनुर अनि मुने मन्तोर ओर परके आयनुर।”

येसु हासुन असा जिवेमास तेदानाता बारेते असा इन्तोर

¹⁷ येसु येरुसलेम हन्दानपा बारा चेलाह लोकुरकुन आपुनासंग ओतुर, ओनासंग चेला लोकुरकुन तासिस बोरे लोकुरक हिले आसि, अनि हरितिगा ओरकुन इन्दिला लागतुर,

¹⁸ “हुळाट, माक येरुसलेम हन्दिला आतोरोम अनि अगा नना मानेयतोर मरि मुक्य याजक लोकुरक अनि मूसाना नियमतुन करिहवालोरा कयदे पयपिहयानुर, अनि ओरक ओन हायाना योग्य ठहरे कियानुरक,

¹⁹ अनि ओरक ओन यहुदि आयोर लोकुरा कयदे सोपे कियानुर अनि ओरक ओना मजाक कियानुरक अनि पकाय हाहानुरक अनि कुरुस पोरो अन्जहिस हव्कानुरक। मति ओर तिसरो दिया असा जिवेमास तेदानुर।”

उन्दि अवहारिना विनन्ति

²⁰ असके जबदिनोर मरकना अवहारि, आपुना मरकनासंग येसुना हेरे वास नमस्कार किस आपुना पेकोरक साटि बाताले कियाला तलकिला लागतु।

²¹ येसु अदेन, “निया साटि बाताल पहाजे?” इन्जोर पुच्चेमातुर। ओद येसुन इतु, “निमा राजाल आस राज कियाना बेरा नावोर येर इवुर मरक निया राज्यतिगा वरोर निया तिन्दान कयबासा, अनि वरोर निया डावान कयबासा उदिर इन्जोर वाचा हिम” इन्जोर इतुरक।

²² येसु अदेन, “निमाट बाताल तलकिन्तोरिट इन्जोर निमाट पुनविट। नना सहेन कियाका ओद पकाय तकलिपतुन निमाट सहेन किया परकिट बहे?” इन्जोर पुच्चेमातुर। ओरक येसुन, “इंगो! माक सहेन किया परान्तोरोम” इन्जोर इतुरक।

²³ येसु ओरकुन “खरोय निमाट नावा पकाय तकलिपतुन सहेन कियाकिट, मति आपुना तिन्दान कयबासा अनि डावान कयबासा बोने उपहाना नावा बुतो आयो, मति नावोर बाबो बोना साटि तयार कितोर ओरकुनेय ओद पुटार” इन्जोर इतुर।

²⁴ इद केन्जुन पिसतोर दहाय चेला लोकुरक ओर इवुर तमोलोरकुन होंग कितुरक।

²⁵ मति येसु ओरकुन हेरे केयस इदाम इतुर, “यहुदि आयोर लोकुरा राजालोर ओरागा राज किन्तोर, अनि ओरा अदिकारि लोकुरक ओरागा अदिकार किन्तोरक इन्जोर निमाट पुन्तोरिट।

²⁶ मति मियागा इदाम आयो आयार, मति बोरायि मियागडाल हजोर आयाना इच्चा किन्तोर ओर मिवोर सेवक बनेमायिर,

²⁷ अनि मियागडाल मुक्याल आयाना इच्चा किन्तोर ओर मिवोर दास बने मायिर।

²⁸ नना मानेयतोर मरि नावा सेवा किहाना साटि आयो मति नना दुसरोना सेवा कियान साटि अनि पापता बन्दनते मतोरक पकाय लोकुरकुन लेहचियान साटि आपुना जिवा अदेना किमत आस हेविर इन्जोर वातान।”

येसु इवुर अन्दराहकुन सुदरेह किन्तोर

²⁹ येसु अनि येसुना चेलालोकुरक यरिहोताल हन्जोर मतोरक असके लोकुरा पकाय भीळ ओना परके वातुरक।

³⁰ अगा हरदा ओदा इवुर अन्दराह उदस मतोरक, येसु इगाडाल हन्दिला आतोर इन्जोर ओरक केन्जतुरक असके, “हे प्रबु, दावुदनोर मरि, माकुन दया किम” इन्जोर जोरदे इन्दिला लागतुरक।

³¹ कमेक मनिर इन्जोर लोकुरक ओरकुन रांगतुरक, मति ओरक असा जोरदे, “हे प्रबु, दावुदनोर मरि, माकुन दया किम” इन्जोर इतुरक।

³² असके येसु अगाय नितितुर, ओरकुन केयतुर, “नना मिया साटि बाताल कियाका इन्जोर मिया इच्चा मन्ता?” इन्जोर पुच्चेमातुर।

³³ ओरक येसुन, “हे प्रबु, माक हुळिला पहाजे” इन्जोर इतुरक।

³⁴ येसुन ओरा पोरो दया वातु अनि ओरा कोन्डानुंग इटतुर असके सान्डेय ओरक हुळिला लागतुरक अनि ओरक ओना परके हतुरक।