मत्ति 2 - Muria Far Western

ग्यानि लोकुरक हेरोदेस राजाना हेरे

¹ हेरोदेस राजाना काळदे यहुदियाता बेतलहेम सहेरतिगा येसुना जनमा आतु असके पूरव दिशातिकेडाल हुकोंगता बारेता सोबाय पुन्तोरक हुचुलोर ग्यानि लोकुरक येरुसलेमतिगा वातुरक,

² “यहुदियातोर राजाल आस जनम आतोर बगा मन्तोर? माक ओर जनम आतुर इदाम तोहान्ता ओद हुको पूरव दिसाते हुळस ओन आरादना कियालाय वातोरोम” इन्जोर पुच्चेमातुर।

³ हेरोदेस राजाल इद केन्जुन ओनासंग येरुसलेमतोर सबोय लोकुरक पकाय चिन्ता आतुरक।

⁴ असके ओर लोकुरा सबोय मुक्याल याजक अनि मूसाना नियमतुन करिहवालोरकुन उन्दि जागा केयस, “मसिना जनम बगा आयिला पहाजे?” इन्जोर ओरकुन पुच्चेमातुर।

⁵ ओरक ओन इतुर, “यहुदियाता बेतलहेम सहेरतिगाय मन्ता” इन्जोर इतुर।

⁶ बाक्याकि परमेस्वरना पोल्लो वेहवालोरा द्वारा, “हे यहुदि प्रदेशता बेतलहेम, यहुदि प्रदेशता दुसरो सहेरताल निमा बाताले हुडलोर हिलवि, नियागाडाल वरोर राजाल पसियानुर, ओर नावोर इस्रायेल लोकुरकुन केपानुर” इन्जोर कोटता मन्ता।

⁷ असके हेरोदेस राजाल पूरव देशताल वातोर ओर ग्यानि लोकुरकुन मकस केयसुन ओद हुको बोद बेरा दिसतु इन्जोर ओरकुन पुच्चेमास समजेमातुर।

⁸ असके ओरकुन बेतलहेम सहेरतिगा इदाम इन्ज लोहतुर, “हन्ट, ओर नोनाना बारेते सोबाय मालुम किम्ट, अनि ओन हापळेमायनुर ते नाकुन समाचार हिम्ट बाक्याकि नना वने हन्ज ओन नमस्कार कियाका” इन्जोर ओरकुन इतुर।

⁹ राजाना पोल्लो केन्जुन ओरक हतुरक; अनि ओरक पूरव दिशातिके हुळस मतोर ओद हुको नोनाल बगा मतोर ओद जागातिगा अवस रोमनावनाह ओरा मुने मुने हन्जोर मता,

¹⁰ ओद हुको रोमतु इन्जोर हुळस ओरक पकाय गिरदा आतुरक।

¹¹ ओरक ओद लोन अवस ओर नोनान ओना अवहारि मरियमनासंगे हुळतुरक अनि ओरक नोनाना काल अरस ओना आरादना कितुरक, अनि ओरक आप-आपुना पकायि किमति चिज इराना डब्बा तरियस ओन सोनो, लोबान अनि दयमुर नियता भेट हितुरक।

¹² मति ओरक मल्स हेरोदेसना हेरे हन्माकिर इन्जोर परमेस्वर उन्दि कनिष्कानते ओरकुन सावदान कितुर असके ओरक दुसरो हरिते आपुना देशते हतुरक।

यूसुफिन लोतोरक मिस्रि देशतिगा मकस वितिन्तोरक

¹³ पूरव दिसाताल वातोरक ओर ग्यानि लोकुरक हतुरक असके पजा प्रबुनोर वरोर दूत यूसुफिन कनिष्कानबेरा दिस ओन इतुर, “तेदा, ओर नोनान अनि ओना अवहारिन पयस मिस्रि देशतिगा मकस हन अनि अगा मन्ट, अनि नना वेहवाय निमाट मलस वायमाट बाक्याकि हेरोदेस ओर नोनान हव्कान साटि पळकानुर।”

¹⁴ असके ओर नरकाय तेदच नोनान अनि ओना अवहारिन पयस मिस्रि देशतिगा हतुर।

¹⁵ अनि हेरोदेसना हायानवनाह अगाय मतुरक। “नना आपुना मरिन मिस्रि देशताल केयस ततान” इदाम प्रबु परमेस्वरना पोल्लो वेहवालोरा द्वारा इन्ज मतोर ओद पोल्लो पुरा आयि इन्जोर इदाम आत।

¹⁶ अनि ग्यानि लोकुरक ओनासंग दोखा कितोर इदाम हेरोदेस राजाल समजेमास ओर पकाय होंग आतुर, अनि ग्यानि लोकुरकुन पुच्चेमास समजेमातोर ओद बेराता अनुसार रन्ड वरसातोर या रन्ड वरसाताल हुडलोर मतोर सबोय नोनान बेतलहेम अनि अदेना हेरे गुरेटांग सबोय नाटेनिगा लोकुरकुन लोहच हव्कस वाटतुर।

¹⁷ “रामाहतिगा उन्दि लेंग केन्जतुरक, दुःख अनि पकाय जोरदा किलाना लेंग, राहेल आपुना पेकोरक साटि किलिन्द, अनि अदेना सबोय पेकोरक हास मतोरक इन्जोर अदेन शान्ततुन येताना इच्चा हिले आसि”

¹⁸ इदाम परमेस्वरना पोल्लो वेहवाल यिर्मयाहना द्वारा इन्ज मतोर ओद पोल्लो पुरा आत।

यूसुफना लोतोरक मिस्रदेसताल मल्स वान्तोरक

¹⁹ मति हेरोदेस हातपा पजा, प्रबुनोर दूत मिस्रि देशतिगा यूसुफिन कनिष्कानते दिसतुर,

²⁰ “नोनान हव्काना इच्चा किन्दुर ओर हातुर इन्जोर निमा तेदा, नोनान अनि ओना अवहारिन पयस इस्रायेल देशतिगा हन” इन्जोर इतुर।

²¹ ओर तेदितुर नोनाल अनि ओना अवहारिनसंग इस्रायेल देशतिगा मलस वातुर।

²² मति यहुदिया प्रदेशतिगा अरखिलावुस आपुनोर बाबो हेरोदेसना जागा राज कियाला आतोर इन्जोर केन्जुन अगा हन्दान साटि वरियतुर, कनिष्कानते परमेस्वरताल चेतावनि पुटिहिच गलील प्रदेशतिगा हतुर।

²³ अनि “ओन नासरि इन्दानुर” इदाम परमेस्वरना पोल्लो वेहवालोरा पोल्लो पुरा आयि इन्जोर ओरक नासरत पोरोयता प्रदेशतिगा हन्ज मन्दिला लागतुरक।