मत्ति 15 - Muria Far Western

यहुदि लोकुरा रीति-रिवाज पालन कियानाता बारेते प्रश्न

¹ असके येरुसलेमताल हुचुलोर परीसि अनि मूसाना नियमतुन करिहवालोर येसुना हेरे वातुरक।

² “नियोर चेलालोर पुरकातोर लोकुरा रिवाजतुन बाक्या मानेमायोर? ओद रिवाज मानेमायोर आस कय नोरवाय रोटिंग बाक्या तिन्तोरक?” इन्जोर इन्दिला लागतुरक।

³ येसु ओरकुन उत्तर हितुर, “निमाट वने आपुना रिवाजता कारण बाक्या परमेस्वरना आग्या मानेमायविट?

⁴ बाक्याकि ‘आपुनोर बाबो अनि आपुना अवाहारिना आदर किम्ट’ अनि ‘बाबो या अवाहारिना अपमान बोरे केविर ते ओन हव्किला पहाजे’ इदाम परमेस्वर आग्या हितुर।

⁵ मति निमाट इन्तोरिट, ‘निकुन मदत कियाना चिज नना परमेस्वरतुन सोपे कितोना इन्जोर मिया बाराय मदत किया परोन इदाम बोरे आपुना बाबोन या अवहारिन इन परान्तोर।’

⁶ इदाम ओन आपुनोर अवाल-बाबोना आदर कियाना जरुरि हिले इन्जोर निमाट करहान्तोरिट। इद प्रकारते निमाट आपुना रिति-रिवाज मानेमातोर ओद कारणते परमेस्वरना पोल्लोतुन कमजोर बने कितोरिट।

⁷ हे कपटि लोकुरक, परमेस्वरना पोल्लो वेहवाल यशायाह मिया बारेतेः

⁸ ‘येर लोकुरक टोडिते नावा आदर किन्तोर, मति ओरा मन नावाताल लक मन्ता।

⁹ अनि केवल मानेयकना नियमतुन पालन कियाना साटि करहान्तोर इन्जोर येरक बेकार रितिते नावा उपासना किन्तोरक’ इदाम यशायाह वेहता ओद पोल्लो येरा बारेते बराबर मता।”

मानेयकुन परमेस्वरना मुने अशुद्ध किन्तांग ओव पोल्लोंग

¹⁰ असके येसु लोकुरकुन आपुना हेरे केयस ओरकुन इतुर, “केन्जुन समजेमाम्ट,

¹¹ मानेयतुन परमेस्वरना मुने अशुद्ध किन्ता चिज टोडिते लोपा दान्ता चिज आयो मति टोडिताल पसियान्ता पोल्लोंग मानेयतुन परमेस्वरना मुने अशुद्ध किन्ता।”

¹² असके चेला लोकुरक येसुना हेरे वासुन, “परीसि लोकुरक इद पोल्लो केन्जुन निया विरोद किन्तोरक इन्जोर बाताल निमा पुन्तोन?” इन्जोर येसुन इतुरक।

¹³ येसु ओरकुन, “स्वरगतोर नावोर बाबो उरसोर अव सबोय मराहकुन हिरतासंग तेहकस वाटानुर।

¹⁴ ओरकुन हन्दिला हिम्ट, ओरक अन्दराह उपदेश हेवालोर मन्तोर। अनि आन्दराल मानेय अन्दराहकुन हरि तोहानुर ते इवुरास गुमियातिगा अरानुरक” इन्जोर उत्तर हितुर।

¹⁵ इद केन्जुन पतरस ओन “इद पिटो माकुन समजेहकिस वेहा” इन्जोर इतुर।

¹⁶ येसु आपुना चेलालोरकुन इतुर, “बाताल निमाट इदेक वने इदेना बारेते समजेमायविट?

¹⁷ टोडिलोपा दान्ता बाताले ओद पोटातिगा हन्जुन बाहरो पसियस दान्ता इन्जोर बाताल निमाट पुनविट?

¹⁸ मति टोडिताल बाहर पसियान्ता पोल्लो ओद मन्दाल पसियान्ता अनि ओदे मानेयतुन परमेस्वरना मुने अशुद्ध किन्ता।

¹⁹ बाक्याकि खराब विचार, हव्काना, व्यभिचार, दुसरो आळदा या मुजोनासंग खराब संबन्द, कलाना, खोटाल गवाहि अनि निन्दा इद सबोय पोल्लोता विचार मानेयना मन्दाले पसियान्तांग।

²⁰ मानेयतुन परमेस्वरना मुने अशुद्ध किन्तांग इवे आन्दुंग; मति कय नोरवा जेवन कियाना मानेयतुन परमेस्वरना मुने अशुद्ध केवो।”

कनानि जातिता आळ येसुनिगा विस्वास किन्ता

²¹ येसु अगडाल पसियसुन सूर अनि सिदोन प्रदेशतिके हतुर।

²² ओद प्रदेशताल उन्दि कनानि जातिता आळ पसियत, “हे प्रबु, दावुदनोर मरि, नाकुन दया किम, नावा पेडिन दुष्टात्मा पकाय तकलिप कियाला आता” इन्जोर जोरदे इन्दिला लागतु।

²³ मति येसु अदेन बाराय उत्तर हेवोर आतुर। असके ओनोर चेला लोकुरक वासुन ओन, “ओद मावा परके जोरदे किलसोर वायिला आता अदेन लोहचिम” इदाम विनन्ति कितुरक।

²⁴ येसु ओरकुन “केवल इस्रायेल लोकुरा मायतांग बेळांगना शिवाय दुसरो बोना साटिय नाकुन लोहोर” इदाम उत्तर हितुर।

²⁵ मति ओद वातु येसुन नमस्कार किस, “हे प्रबु, नाकुन मदत किम” इन्जोर इन्दिला लागतु।

²⁶ ओर अदेन “बालकना रोटि नयकना मुने वाटाना बेस आयो” इन्जोर उत्तर हितुर।

²⁷ ओद इतु, “इंगो प्रबु, मति नयक पिला वने मालकाना जेवनताल अरता सितातुन तिन्तांग” इन्जोर इतुर।

²⁸ असके येसु अदेन, “हे बायि, निया विस्वास हजोर मन्ता। निया इच्चा लेहका निया साटि आयि” इन्जोर उत्तर हितुर। अनि ओदे बेरा अदेना पेडि बेस आतु।

अलग-अलग बिमार लोकुरकुन येसु सुदरे किन्तोर

²⁹ येसु अगडाल गलील नहारता टकाहेरे वातुर अनि मटा पोरो अन्जुन उदितुर।

³⁰ असके पकाय भीळ ओना हेरे वातु। ओरक आपुनासंग लंगळाह, अन्दराह, मुकाह, बयराह, ठुटाह अनि दुसरो पकाय लोकुरकुन ओना हेरे ततुरक, अनि ओरकुन ओना काल्कपोरो वाटसितुर, अनि ओर ओरकुन सुदरे कितुर।

³¹ मुकाह वळकान्तोरक, मुरस ताकवालोरक बेस आन्तोरक, लंगळाह ताकान्तोरक, अनि अन्दराह हुळान्तोरक इन्जोर लोकुरक हुळसुन आश्चरय किस इस्रायेलना परमेस्वरना महिमा कितुरक।

येसु नालुंग हजार लोकुरकुन तिहान्तोर

³² येसु आपुना चेलालोरकुन केयस, “येरक मून्ड दियाताल नावासंग मन्तोर अनि ओरा हेरे तिन्दान साटि बाराय हिले इन्जोर नाकुन इद भीळता दया वान्ता। ओरक हरतिगाय अवकेमास मनिर इन्जोर ओरकुन करवस्ता लोहाना नावा इच्चा हिले” इन्जोर इतुर।

³³ चेला लोकुरक येसुन इतुरक, “माक इचोन पकाय भीळतुन पन्जहान साटि इचोक रोटिंग माकुन इद सुनसान जागातिगा बगाडाल पुटानुंग?”

³⁴ येसु ओरकुन, “मिया हेरे बचोक रोटिंग मन्तांग?” इन्जोर ओरकुन पुच्चेमातुर। “सात रोटिंग, अनि हुचुक हुडलांग मीन्क वने मन्तांग” इन्जोर ओरक इतुरक।

³⁵ असके येसु लोकुरकुन जागादिगा उदान साटि आग्या हितुर।

³⁶ अनि अव सात रोटिनुंग अनि मीन्कुन येतस परमेस्वरना धन्यवाद किस किळिहतुर अनि आपुनोर चेलालोरकुन हितुर, अनि चेलालोर अदेन लोकुरकुन हितुरक।

³⁷ इदाम सबोय लोकुरक तिन्जुन पोटा पन्जतु अनि चेलालोर पिसतांग रोटिनांग तुकळेते सात ओडिंग निन्दितांग ताहतुरक।

³⁸ तिन्वालोर आसक अनि बालकिन तासिस नालुंग हजारक मानेयक मतोरक।

³⁹ पजा ओर भीळतुन हन्दिला किस डोंगातिगा अन्जतुर अनि मगदन देशता टकातिगा हतुर।