मत्ति 14 - Muria Far Western

बपतिस्मा हेवाल युहन्नानिन हव्कान्तोर

¹ ओदबेरा गलीलि प्रदेशतोर राजाल हेरोदेस येसुना चर्चा केन्जतुर,

² “येर बपतिस्मा हेवाल युहन्नाल आन्दुर। ओर हातोरिगाडाल असा जिवेमातोर इन्जोर आश्चरयता बुतो कियाना लाव ओनिगा तोहान्तांग” इदाम ओर आपुनोर दास लोकुरकुन इतुर।

^3-4 बाक्याकि हुचुक दिया मुने हेरोदेस युहन्नान दोहच जेहलतिगा वाटस मतोर। हेरोदेस आपुनोर तमो फिलिप्पुसना मुत्ते हेरोदियासिन आपुना मुत्ते किस इरस मतोर। इद कारणते “नियमता अनुसार इद उचित हिले” इन्जोर युहन्ना हेरोदेस राजान पकाय बेरा चेतेहकिस इतुर।

⁵ ओर युहन्नान हव्काना इच्चा किन्दुर मति लोकुरक ओन परमेस्वरना पोल्लो वेहवाल समजेमान्दुर इन्जोर लोकुरकुन वरियन्दुर।

⁶ मति हेरोदेसना जनमदिया यहुन्नानिन हव्किलाय उन्दि सन्दि पुटतु ओद पोल्लो इदाम मता, हेरोदियासना पेडि कार्यक्रमदिगा येन्दस हेरोदेसिन गिरदा कितु।

⁷ असके बाताले निमा तलकिकि अदेन नना निकुन हियाका इन्जोर ओर शपथ किस ओद पेडिन वाचा हितुर।

⁸ ओद आपुना अवहारि करहिस हिता अनुसार, “बपतिस्मा हेवाल युहन्नाना तला दळियातिगा इगाय नाकुन तरा” इन्जोर तलकिहतु।

⁹ राजाल दुःखि आतुर मति आपुना शपथ सबोय वरताह लोकुरक केन्जतुरक इन्जोर ओद शपथ मानेमायाना आयो इदाम किया परोर आतुर। इन्जोर युहन्नाना तला हिसिम्ट इदाम आग्या हितुर।

¹⁰ अनि ओर जेहलदिगा सयनिक लोकुरकुन लोहच युहन्नाना तलातुन कदियतुर।

¹¹ अनि ओना तला दळियातिगा ततुर अनि पेडिन हितुर, अनि ओद आपुना अवहारिना हेरे ओतु।

¹² असके युहन्नानोर चेला लोकुरक वातुरक अनि ओना मुरदातुन ओस मिसितुरक, अनि ओरक हन्जुन ओद पोल्लो येसुन वेहतुरक।

येसु सयुंग हजार मानेयकुन जेवन तिहान्तोर

¹³ इद केन्जतुर असके येसु सान्डे अगडाल पसियतुर अनि ओर डोंगातिगा अन्जुन अगडाल बोदे सुनसान जागादिगा वरोरे हतुर। लोकुरक इद केन्जुन नाट-नाटेनाल ताकसोरे ओना परके वातुरक।

¹⁴ ओर नहारता टकातिगा रयतुर असके उन्दि हजोर भीळ हुळतुर अनि ओरा पोरो दया वातु अनि ओरा बिमारितुन सुदरे कितुर।

¹⁵ बेरा मुलत असके ओनोर चेला लोकुरक येसुना हेरे वास, “इद सुनसान जागा मन्ता अनि बेरा आयिला आता, ओरक नाटेनिगा हन्जुन आपुना साटि जेवन अस तरीर इन्जोर लोकुरकुन लोहकाट” इदाम इतुरक।

¹⁶ मति येसु ओरकुन, “ओरा हन्दाना जरुरि हिले। निमाटे ओरकुन तिन्दिला हिम्ट” इन्जोर इतुर।

¹⁷ ओरक येसुन, “इगा मावा हेरे सयुंग रोटिंग अनि रन्ड मीन्कुन तासिस असा बाराय हिले” इन्जोर इतुरक।

¹⁸ “ओव नावा हेरे तराट” इन्जोर येसु इतुर।

¹⁹ असके येसु लोकुरा भीळतुन रोन्डातिगा उदिलाय वेहतुर, अनि अव सयुंग रोटिंग अनि रन्ड मीन्कुन पयतुर, अनि स्वरगतिके हुळस धन्यवाद किस रोटिनुंग किळहिच-किळहिच चेलाह लोकुरकुन हितुर अनि चेला लोकुरक लोकुरकुन हितुरक।

²⁰ सबोय लोकुरक तिन्जुन ओरा पोटा पन्जतु असके पिसता तुकळेतांग बारा ओडिंग निन्दितांग चेला लोकुरक ताहतुरक।

²¹ अनि तिनवालोर आसक अनि बालकिन तासिस, लगभग सयुंग हजार मानेयक मतोरक।

येसु एतापोरो ताकान्तोर

²² असके पजा येसु लोकुरकुन आपुना लोन हन्दिला हितुर। असके आपुनोर चेला लोकुरकुन डोंगातिगा उदस ओना मुने ओरक नहारता होदपाकाळ हनिर इन्जोर दन्दरे कितुर।

²³ ओर लोकुरकुन सार कितुर असके पजा प्रार्थना कियान साटि अलगो मटा पोरो हतुर, अनि नुलपेहबेरा ओर अगा वरोरे मतोर।

²⁴ ओदबेरा डोंगा गलील नहारता टकाताल पकाय लक हन्ज मता। वळिय मुनेटाल वासोर मता इन्जोर ओरा डोंगा पळवाते होलेमासोरिंग मता।

²⁵ अनि येसु वियाना मुने कोरकुसेंग बेरा नहारता एतापोरो ताकसोर ओरा हेरे वान्दुर।

²⁶ चेलालोर ओन नहारता एतापोरो ताकाना हुळसुन वरियतुरक। अनि “येर भुत आन्दुर” इन्जोर पकाय वरेते जोरदे किलसोर केयिला लागतुरक।

²⁷ असके येसु ओरासंग वळकतुर, “हिमते मन्ट नना आन्दान, वरियमाट” इन्जोर इतुर।

²⁸ पतरस ओन उत्तर हितुर, “हे प्रबु, निमाय आन्दि ते नाकुन निया हेरे एर पोरो ताकसोर वायाना आग्या हिम” इन्जोर इतुर।

²⁹ “वाय” इन्जोर येसु इतुर। असके पतरस डोंगातिगाडाल रयसुन येसुना हेरे हन्दान साटि एर पोरो ताकिला लागतुर।

³⁰ मति वळियतुन हुळसुन वरियतुर अनि मुळन्दिला आस मन्दुर असके जोरदे, “हे प्रबु, नाकुन पिसहा” इन्जोर किलसोर केयतुर।

³¹ येसु सान्डे कय मुने किस ओन पयतुर, “निकुन नावागा विस्वास हिले बहे? निमा बाक्या शंका किति?” इन्जोर इतुर।

³² असके येसु अनि पतरस डोंगातिगा अन्जतुरक असके वळिय रोमत।

³³ असके डोंगातिगा मतोरक दुसरो चेला लोकुरक, “खरोय निमा परमेस्वरनोर मरि आन्दि” इदाम इन्जुन ओना आरादना कितुरक।

येसु गन्नेसरत प्रदेशतिगा बिमार लोकुरकुन सुदरे किन्तोर

³⁴ ओरक गलील नहारता होदपाकाळ रयसुन गन्नेसरत प्रदेशतिगा अवतुरक।

³⁵ असके अगाडोर लोकुरक ओद डोंगाते वातोर ओर येसु आन्दुर इदाम पुतुरक अनि ओरक हेरे गुरेटांग प्रदेशते मन्तोरक सबोय लोकुरा हेरे येसु इगा मन्तोर इदाम पोल्लो लोहच वेहतुरक असके ओद प्रदेशतोर सबोय बिमार लोकुरकुन ओना हेरे ततुरक।

³⁶ अनि केवल ओना सन्दराता कोडितुन इटका इन्जोर ओन विनन्ति कितुरक। अनि ओन इटतुरक सबोय लोकुरक सुदरेमातुरक।