मत्ति 12 - Muria Far Western

येसु पवित्र दियाता वने प्रबु मन्तोर

¹ ओदबेरा यहुदि लोकुरा पवित्र दिया येसु अनि येसुनोर चेला लोकुरक डन्डतिगाडाल हन्दिला आस मन्दुरक, अनि चेला लोकुरकुन करवसतु असके ओना चेला लोकुरक डन्डतांग गोहकनिकेडाल हुचुक हनक कोयसुन कयदे तुस्क-तुस्कसुन तिन्जोरिंग हन्दिला आस मन्दुरक।

² परीसि लोकुरक इद हुळसुन, “हुळा, पवित्र दिया उचित हिले ओद बुतो नियोर चेला लोकुरक कियाला आतोर” इन्जोर येसुन इतुरक।

³ येसु ओरकुन इतुर, “दावुद अनि ओनोर संगवारिहकुन करवसतु असके बाताल कितुरक?

⁴ ओरक मन्दिरतिगा हन्जुन केवल याजक लोकुरकुन तासिस दावुद अनि दावुदिनासंगे मन्तोर दुसरो बोरे मानेयकुन तिन्दिला पोलो मता परमेस्वरतुन तरिहता ओव रोटिंग ओरक तितुरक इन्जोर बाताल निमाट वाचे केविट बहे?

⁵ या पवित्र दिया मन्दिरतोर याजककेय पवित्र दियातुन नियमतुन पालन केवोर आस मनेर ते वने ओरक दोष हिलेर आस मतोरक इन्जोर बाताले मूसाना नियमतिगा निमाट वाचे केविट बहे?

⁶ मति इगा ओर मन्दिरताल वने हजोर मन्तोर इन्जोर नना मिकुन इन्तोना।

⁷ ‘नना बलिदानते आयो मति दयाते गिरिदा आन्तोना’ इदेना अर्थ निमाट पुन मनेरिट ते निमाट दोष हिलवान दोष हेविट आस मनेरिट।

⁸ नना मानेयतोर मरि पवित्र दियातोर वने प्रबु मन्तोना” इन्जोर इतुर।

येसु वतिता कयवाले मानेयतुन सुदरे किन्तोर

⁹ येसु अगडाल पसियसुन ओर यहुदि लोकुरा मन्दिरतिगा वातुर।

¹⁰ अगा वरोर मानेय मतोर, ओना कय वच मता। अगा मतोरक परीसि लोकुरक येसुन दोष हियान साटि येसुन इदाम पुच्चेमातुरक, “बाताल पवित्र दिया मानेयतुन सुदरे कियाना मूसाना नियमता अनुसार योग्य मन्ता बहे?”

¹¹ येसु ओरकुन इतुर, “मियागडाल वरोर मानेयना हेरे उन्दिय बेळा मन्ता ते ओद बेळा पवित्र दिया गुमियातिगा अरि ते ओर अदेन पयसुन टन्डोर आयनुर बहे?

¹² मति मानेय उन्दि बेळाताल बचोन महत्वातोर हिलेर बहे? इन्जोर पवित्र दिया भला कियाना उचित मन्ता।”

¹³ असके येसु ओर मानेयतुन, “आपुना कय मुने किम” इन्जोर इतुर; ओर कय मुने कितुर, अनि ओद कय दुसरो कय लेहका बेस आतु।

¹⁴ असके येसुन बोद प्रकारते नाश कियाकाट इन्जोर परीसि लोकुरक बाहरो हन्जुन ओन हव्कान साटि वरोन दुसरोनासंग विचार कियाला लागतुरक।

परमेस्वर निवळे कितोर दास

¹⁵ इद पुन्ज येसु अगडाल हतुर। अनि पकाय लोकुरक ओना परके हतुरक, अनि ओर सबोय लोकुरकुन सुदरे कितुर।

¹⁶ अनि ओरक ओना बारेते लोकुरकुन बाताले वेहमाकिर इन्जोर पकाय चेतेहकिस वेहतुर।

¹⁷ “हुळाट, येन नना आचतोना नावोर दास आन्दुर, ओन नावा मन गिरदा किन्ता नावोर प्रिय दास, नना आपुना आत्मा ओनिगा हियाका, अनि ओर दुसरो जातिता लोकुरकुन न्यायता पोल्लो वेहानुर।

¹⁸ ओर वाहचोर आयनुर, अनि जोरदे किलोर आयनुर, अनि हाटुमतिगा बोरे ओना पोल्लो केन्जोर आयनुर।

¹⁹ ओर न्यायता पोल्लो जिकानवनाह ओर वकता जाळितुन देहोर आयनुर, अनि पोतियता वातितुन पिहोर आयनुर।

²⁰ अनि यहुदि आयोर लोकुरक ओना पोरोयतिगा आशा इरानुर।”

²¹ इन्जोर परमेस्वरना पोल्लो वेहवाल यशायाहना द्वारा इन्ज मतोर ओद पोल्लो पुरा आयि।

परीसि लोकुरक येसुन निन्दा किन्तोरक

²² असके हुचुलोर लोकुरक वरोर आन्दराल-मुकान येसुना हेरे ततुरक अनि ओनागा दुष्टात्मा मता; अनि येसु ओन सुदरे कितुर। ओर वळकिला अनि हुळिला लागतुर।

²³ असके सबोय लोकुरक चकेमास, “बाताल येर दावुदनोर मरि आन्दुर बहे?” इन्जोर इन्दा लागतुरक।

²⁴ मति परीसि लोकुरक इद केन्जुन “येर ते दुष्टात्मातोर मुक्याल बालजबुलना लावतेय दुष्टात्मातुन पुळान्तोर” इन्जोर इतुर।

²⁵ येसु ओरा मन्दा पोल्लो पुन्ज ओरकुन इतुर, “बोदायि राज्यता लोकुरक आप आपुनासंग विरोद किस फुट आन्ता ते ओद राज्य नाश आन्ता, अनि बोदायि सहेर अनि परिवार आपुना लोकुरकुन विरोद किस फुट आन्ता ते ओद प्रदेश अनि परिवार टिकेमास मनो।

²⁶ अनि सयतान सयतानतुन पसिहान्तोर ते अवेह आपुनिगा विरोद किस फुट आता; ते पजा ओरा राज्य बदाम बनेमास मन्दार?

²⁷ नना सयताना लावते दुष्टात्मातुन पसिहान्तोना ते मिवोर मरक बोना लावते दुष्टात्मातुन पसिहान्तोर? इन्जोर निमाट खराब कितिट इदाम मियोर मरक मिया न्याय कियानुरक।

²⁸ मति नना परमेस्वरना आत्माता मदतते दुष्टात्मातुन पसिहान्तोना इन्जोर परमेस्वरना राज्य मिया हेरे अवता।

²⁹ पहलवानतुन दोहोर आयनुर ते पहलवाना लोतिगा बोरे मानेय होळियसुन ओना संपति कलिला बदाम परान्तोर? पहलवानतुन दोहानुर ते ओना संपतितुन कलिला परान्तोर।”

³⁰ अनि येसु इतुर, “नावासंग बोर हिलेर ओर नावा विरोदते मन्तोर, अनि बोर नावासंग सेवाते लोकुरकुन परमेस्वरना हेरे तरोर ओर परमेस्वरना हेरेटाल लोकुरकुन लक किन्तोर।

³¹ इन्जोर मानेयना सबोय प्रकारता पाप अनि निन्दातुन मापि कियानुर मति पवित्र आत्माता विरोद निन्दा कियानुर ते मापि केवोर आयनुर इन्जोर नना मिकुन इन्तोना।

³² बोरायि नना मानेयतोर मरिना विरोदते बोदे पोल्लो इन्दानुर ते ओना इद गुन्हातुन मापि कियानुर, मति बोरायि पवित्र आत्माता विरोदते बाताले इन्दानुर ते ओना गुन्हा इद दरतितिगा या वायवांग काळते वने मापि केवोर आयनुर।”

मरा अनि अदेना काया

³³ येसु असा इतुर, “मरातुन सोबाय इन्किट ते अदेना कायातुन वने सोबाय इन्ट या मरातुन खराब इन्किट ते अदेना कायातुन वने खराब इन्ट बाक्याकि मरातुन अदेना कायाते पुन्तोर।

³⁴ हे नांग तरासतोर पिलांग, निमाट खराब मन्ज बदाम सोबाय पोल्लोंग इन्दा परान्तोरिट? बाक्याकि मन्दिगा निन्दिता मन्ता, अदे टोडितिगाडाल वान्ता।

³⁵ वरोर सोबाय मानेय ओना मन्दिगा जमा मन्ता सोबाय पोल्लोताल सोबाय पोल्लोंग वळकान्तोर। अनि वरोर खराब मानेय ओना मन्दिगा मन्तांग खराब पोल्लोंगतिगाडाल खराब पोल्लोंग वळकान्तोर।

³⁶ अनि परमेस्वरना न्यायता दिया सबोय मानेयतुन आपुना सबोय बेकार वळकाना पोल्लोता हिसाब हिया लागार इन्जोर नना मिकुन इन्तोना।

³⁷ बाक्याकि आपुना पोल्लोता कारण निकुन परमेस्वर निरदोष ठहरे कियानुर अनि आपुनाय पोल्लोता कारण निकुन परमेस्वर दोषि ठहरे कियानुर।”

यहुदि अदिकारि लोकुरक स्वरगताल चमत्कार तलकान्तोरक

³⁸ असके हुचुलोर नियमतुन करिहवालोरक अनि परीसि लोकुरक, “हे गुरु, नियाकेडाल आश्चरय बुतोता उन्दि चमत्कार हुळाना माक इच्चा किन्तोरोम” इन्जोर येसुन इतुरक।

³⁹ असके येसु ओरकुन इतुर, “खराब अनि व्यभिचार लोकुरा इद पिळि चमत्कार पळकान्तोरक, मति परमेस्वरना पोल्लो वेहवाल योना साटि परमेस्वर कितोर ओद चमत्कार तासिस दुसरो बोदे चमत्कार ओरकुन परमेस्वर हेवोर आयनुर इन्जोर उत्तर हितुर।

⁴⁰ योनाल मून्ड नरका-पलिंग एतिगा बेहरा मीनता पोटालोपा मतोर अदामे नना मानेयतोर मरि मून्ड नरका-पलिंग दरतिता लोपा मन्दानुर।

⁴¹ निनवे सहेरतोर लोकुरक न्यायता दिया इद काळतोर लोकुरासंग तेदचुन मिकुन दोषि ठहरे कियानुरक, बाक्याकि ओरक परमेस्वरना पोल्लो वेहवाल योनाना वेहाना केन्जुन ओनागा विस्वास कितुर, मति हुळाट योनानाताल वने सबोयताल हजोर मानेय इगा मन्तोर, मति निमाट ओना पोल्लो केन्जविट, ओर ननाय आन्दान।

⁴² दक्षिण दिसाते मता शेबा देशता रानि न्यायता दिया इद काळतोर लोकुरासंग तेदचुन मिकुन दोषि ठहरे कियार, बाक्याकि ओद सुलेयमान राजाना ग्यानता पोल्लोंग केन्जान साटि दरतिता दुसरो कोन्टाताल वातु, अनि हुळाट, सुलेयमानताल वने सबोयताल हजोर मानेय इगा मन्तोर, मति निमाट ओना पोल्लो केन्जविट, ओर ननाय आन्दान।”

दुष्टात्मा असा मलस वान्ता

⁴³ येसु असा इतुर, “दुष्टात्मा मानेयताल पसियान्ता असके ओद वतिता जागादिगा आराम कियान साटि पळकसोर वलियान्ता, मति ओद जागा अदेन पुटो।

⁴⁴ असके ओद ‘नना तासिस मन्दान ओदे मेन्दुलतिगा नना मलस दाका’ इन्जोर इन्ता। सान्डे ओद मलस वास ओद मेन्दुल खालि अनि सापसुप कितोर इदाम हुळान्ता।

⁴⁵ असके ओद हन्जुन आपुनताल वने पकाय खराब सात दुष्टात्मांगतुन आपुनासंग ततान्ता। अनि ओव सबोय वासुन ओर मानेयनिगा होळियस उदिन्तांग। अनि ओर मानेयता दसा पहलेटालता वने पकाय खराब आयार। इदेकता इद खराब पिळिता लोकुरा दसा इदामे आयार।”

येसुना अवहारि अनि तमोलोरक

⁴⁶ येसु भीळता लोकुरासंग वळकसोर मतोर असके ओना अवहारि अनि तमोह भीळता बाहरो वातुरक अनि ओरक ओनासंग वळकाना इच्चा किन्दुरक।

⁴⁷ असके बोरे येसुन, “निया याल अनि निवोर तमोह बाहरो नितितोरक अनि ओरकुन नियासंग वळकाना इच्चा मन्ता” इन्जोर इतुर।

⁴⁸ इद केन्जुन ओर, “नावा याल बोद आन्दु? अनि नावोर तमोह बोर आन्दुर?” इन्जोर पुच्चेमातुर।

⁴⁹ अनि आपुनोर चेलाहनिके आपुना कय तोहचुन “हुळाट, नावा याल अनि नावोर तमोह येरक आन्दुरक।

⁵⁰ नावोर स्वरगतोर बाबोना इच्चाते बोरायि ताकान्तोर, ओरे नावोर तमो, नावा हेलाळ, अनि नावा याल आन्दु” इन्जोर इतुर।