मत्ति 11 - Muria Far Western

येसु अनि बपतिस्मा हेवाल युहन्नाल

¹ येसु आपुनोर बारा खास चेलाह लोकुरकुन आग्या हितुर असके पजा ओर ओरा प्रदेशतिगा उपदेश अनि सोबाता पोल्लो वेहान साटि अगडाल हतुर।

² युहन्नाल जेहलदिगा मसिना बुतोता सोबाता पोल्लो केन्जतुर अनि आपुनोर चेलाह लोकुरकुन लोहतुर,

³ “बाताल वायवाल मसि निमाय आन्दि, या माक बोरे दुसरोना हर हुळकोम?” इन्जोर ओरा द्वारा येसुन पुच्चेमातुरक

⁴ येसु ओरकुन इतुर, “अन्दराह हुळान्तोरक अनि लंगळाह ताकान्तोरक, कोळि बिमारितुन शुद्ध किन्तोर अनि बयराह केन्जान्तोरक, मुरदाहकुन जितो किन्तोर अनि गरिब लोकुरकुन सोबाता पोल्लो वेहान्तोर,

⁵ इदाम बाताले निमाट केन्जान्तोरिट अनि हुळान्तोरिट ओद सबोय पोल्लोंग हन्जुन युहन्नान वेहाट।

⁶ मति नाकुन विरोद केवोर ओर धन्य मन्तोर।”

⁷ युहन्नानोर चेलाह लोकुरक अगडाल हतुर असके, येसु युहन्नाना बारेते लोकुरकुन इन्दा लागतुर, “निमाट वारु पल्लातिगा बाताल हुळिला साटि हन्ज मतोरिट? बाताल वळियते होलेमान्ता जाळितुन?

⁸ आयो ते पजा निमाट खरोय बाताल हुळिला हन्ज मतोरिट? बाताल पकाय सोबाय कपळा करतोर मानेयतुन हुळान साटि हन्ज मतोरिट? सोबातांग अनि मान्जतांग कपळांग करांतोरक ओरक राजवाळातिगा मन्तोरक।

⁹ ते पजा बाक्या हन्ज मतोरिट? बाताल परमेस्वरना पोल्लो वेहवालिन हुळान साटि हन्ज मतोरिट? इंगो, परमेस्वरना पोल्लो वेहवालताल वने हजोर मन्तोर ओन हुळान साटि हतोरिट इन्जोर नना मिकुन इन्तोना।

¹⁰ ‘नना आपुनोर दूततुन निया मुने लोहान्तोना, ओर निया मुने निया हरि तयार कियानुर’ इन्जोर पवित्र पुस्तकतिगा कोटता मन्ता ओर येरे आन्दुर।

¹¹ आळदाल जन्मेमातोर ओरागाडाल बपतिस्मा हेवाल युहन्नाताल हजोर बोरे हिलेर इन्जोर नना मिकुन खरोय इन्तोना; मति स्वरग राज्यतिगा हुडलोरताल हुडलोर ओनाताल हजोर मन्तोर।

¹² बपतिस्मा हेवाल युहन्नाना दियाताल इदेक वनाह स्वरग राज्यतिगा लोकुरक लावदे हन्जोर मतोर अनि लाववाले अदेन उदान्तोर।

¹³ परमेस्वरना पोल्लो वेहवाल सबोय लोकुरक अनि मूसाना नियम बपतिस्मा हेवाल युहन्नाना काळवनाह परमेस्वरना पोल्लो वेहचोर मतोरक।

¹⁴ अनि निमाट मूसाना नियम अनि परमेस्वरना पोल्लो वेहवालोरा पोल्लोतुन स्विकार कियान साटि तयार मन्तोरिट ते वायाना परमेस्वरना पोल्लो वेहवाल एलियाल ओरे आन्दुर इन्जोर निमाट समजेमाम्ट।

¹⁵ निमाट बाताल केन्जान्तोरिट अदेन पकाय ध्यानते केन्जुन सम्जेकिम्ट।”

¹⁶ येसु असा इतुर, “नना इद बेराता लोकुरा बोन उपमा हियाका? हाटुमतिगा उदस वरोर दुसरोन केयस,

¹⁷ ‘माक मिया साटि बासरि नेकिहतोम, मति निमाट येन्दविट, माक दुःखता पाटांग ओतोम, मति निमाट किलविट’ इदाम इन्तोर ओर बालक लेहका मन्तोरक।

¹⁸ बाक्याकि युहन्नाल तिन्जोर-उन्डोर आस वातुर अनि ओनिगा दुष्टात्मा मन्ता इन्जोर ओरक इन्तोरक।

¹⁹ मानेयतोर मरि तिन्जुन-उन्जुन वातुर, ‘हुळाट, लेहळाल अनि मडि मानेय, टाक्स येतवालोर अनि पापिलोरा गोतियाल’ इन्जोर ओरक इन्तोर। मति परमेस्वरना ग्यान खरोय मन्ता इन्जोर आपुना सबोय बुतोते तोहान्तोर।”

येसु विस्वास केवोरकुन रांगान्तोर

²⁰ असके येसु ओना अत्भुत चमत्कारता बुतो आता अव प्रदेशता लोकुरक पस्तेमायोर इन्जोर ओव प्रदेशता लोकुरकुन रांगतुर।

²¹ “खुरासिन सहेर मिया पोरो पकाय दन्ड वायार, बेतसयदा सहेर मिया पोरो पकाय दन्ड वायार। मियागा आता लावता बुतो सूर अनि सिदोन सहेरतिगा किस मनेर ते अगाडोर लोकुरक पकाय पहले पस्तेमास जुनाल हरता कपळा करस अनि मेन्दुलतुन निर होकस माक पस्तेमातोम इदाम तोहच मनेर।

²² मति न्यायता दिया सूर अनि सिदोन प्रदेशताल वने मिकुन पकाय हजोर दन्ड पुटार इन्जोर नना मिकुन इन्तोना।

²³ हे कफरनहुम, बाताल निकुन स्वरगवनाह पोरो ताहानुर बहे? आयो! निमा ते नरकवनाह अडिय दाकि। नियागा आता लावता बुतो सदोम सहेरतिगा किस मनेर ते ओद नेन्डवनाह बनेमास मन्वार।

²⁴ मति न्यायता दिया सदोम प्रदेशताल वने पकाय हजोर दन्ड निकुन पुटार इन्जोर नना मिकुन इन्तोना।”

येसु लोकुरकुन आराम हिन्तोर

²⁵ ओदे बेरा येसु इतुर, “हे बाबो, स्वरग अनि दरतितोर प्रबु, निमा इव पोल्लोनुंग बुद्धिमान अनि समजदार मानेयताल मकिहिच इरति, अनि बालकनिगा तोहतोन इन्जोर नना निया धन्यवाद किन्तोना।

²⁶ इंगो, हे बाबो, इदाम आयाना निकुन सोबाय लागतु।

²⁷ नावोर बाबो नाकुन सबोय अदिकार सोपेह कितोर अनि बाबोना तासि बोरे मरिन पुनोर; अनि मरि अनि मरि बोना साटि ओन तोहाना इच्चा कितुर केवल ओरक बाबोन पुन्तोरक।

²⁸ हे मेहनत केवालोर अनि वजा कान्जान्तोर सबोय लोकुरक नावा हेरे वाट नना मिकुन शान्ति हियाका।

²⁹ नना शान्त अनि नम्र स्वभावतोर मन्तोना इन्जोर नावा जुवा आपुना पोरो ताहच नावाकेडाल करयाट ते निमाट आपुना मन्दे शान्ति पुटिहकिट।

³⁰ बाक्याकि नावा जुवा सोपो अनि नावा वजा हलको मन्ता” इन्जोर इतुर।