लूका 9 - Muria Far Western

येसु आपुना बारा खास चेलालोरकुन लोहान्तोर

¹ अनि येसु आपुनोरक बारा खास चेला लोकुरकुन केयतुर, अनि ओरकुन सबोय दुष्टात्मांग पसियाना अनि बिमारीनुंग सुदरे कियाना लाव अनि अदिकार हितुर,

² अनि येसु आपुना खास चेला लोकुरकुन परमेस्वरना राज्यता पोल्लोतुन वेहान साटि अनि बिमारीनुंग सुदरे कियान साटि लोहतुर।

³ अनि येसु ओरकुन इतुर: “परमेस्वरना पोल्लोतुन वेहिला हन्दान्पा निमाट बाताले पयमाट, बळगा पयमाट, जोरा पयमाट, तिन्दान साटि बारायि पयमाट, डबुंग पयमाट अनि उन्दि वने बन्डि करान साटि जास्तोता पयमाट।

⁴ अनि बोद लोतिगा निमाट दाकिट ते निमाट अद नार तासि हन्दानवानाह अदेय लोतिगा मन्ट।

⁵ अनि निमाट परमेस्वरना पोल्लोतुन वेहकिट असके अद पोल्लोतुन बोरे केन्जोर आयनुर ते अद सहेरतिगाडाल पसियानपा ओरक पस्तेमायोरक ते परमेस्वर ओरकुन दन्ड हियानुर इन्जोर ओरा विरुद चेतावनि साटि निमाट आपुहनांग काल्कना डुन्डोतुन कसियसीकिट।”

⁶ असके ओरक पसियसुन परमेस्वरना पोल्लोतुन सबोय प्रदेशतिगा वेहचोरिंग बिमारि लोकुरकुन सुदरे किसोरिंग नाहक-नाहक हन्दुरक।

हेरोदेस राजाल मन्दे वरियतुर

⁷ अनि गलील देशतोर राजा हेरोदेस येसुना बारेते केन्जतुर,

⁸ बपतिस्मा हेवाल युहन्नाल हातोरिगाडाल असा जिवेमातोर इदाम हुचुलोर लोकुरक इतुरक अनि एलियाल दिसतुर इन्जोर दुसरो हुचुलोर इतुरक, अनि पहलेटोर परमेस्वरना पोल्लो वेहवालोरिगाडाल बोरे वरोर असा जिवेमातोर इदाम दुसरो हुचुलोर इतुरक इन्जोर हेरोदेस वरियतुर।

⁹ मति हेरोदेस राजाल इतुर, “नना ते बपतिस्मा हेवाल युहन्नाना तलातुन कदयिचि। मति इदेक नना केन्जान्तोना इदामना पोल्लोंग बोना बारेता आन्दुर? येर बोर आन्दुर बहे?” इदाम इतुर। अनि हेरोदेस राजाल येसुन हुळाना इच्चा कितुर।

येसु सेयुंग हजार लोकुरकुन तिहान्तोर

¹⁰ अनि येसुना खास बारा चेलालोरक सेवकायि किसुन मल्स वास आपुना किताल सेवकायिता बारेते येसुन वेहतुरक; अनि येसु ओरकुन अलगो किसुन बेतसयदा पोरोयदा सहेरतिगा ओतुर।

¹¹ मति लोकुरा भीळ इद पोल्लो पुन्जुन येसुना परके हन्दा लाकतुरक, असके येसु गिरदाते ओरासंग मिलेमातुर, अनि येसु परमेस्वरना राज्यता पोल्लो करिहला लाकतुर, अनि सुदरेमायाना जरुरि मन्तोर लोकुरकुन ओर सुदरे कितुर।

¹² अनि पकाय बेरा आत असके येसुना बारा खास चेलालोरक येसुना हेरे वासुन येसुन इतुरक, “माक इगा सुनसान जागातिगा मन्तोराट इन्जोर लोकुरा भीळ हेरेगुरेटांग हुडिलांग-हजोह नाहकनिगा हन्जुन तिन्दा-मन्दानाता बोदेगेला उपाय केविर इन्जोर ओरकुन हन्दिला हिम।”

¹³ असके येसु ओरकुन इतुर, “निमाटे ओरकुन तिन्दा हिम्ट।” अनि येसुना खास चेलालोकुरक येसुन इतुरक, “सेयुंग रोटिंग अनि रन्ड मीन्क तासि असा दुसरो बातांगे मावागा हिलेंग मति माक हन्जुन येरक सबोय लोकुरक साटि जेवन असकाट बहे?”

¹⁴ अगा कमित-कमि सेयुंग हजार लोकुरक मन्तोरक। असके येसु आपुना चेलालोरकुन, “ओरकुन पन्नास-पन्नास किसुन ओळीय उपहाट” इन्जोर इतुर।

¹⁵ अनि येसु वेहतुर अदाम ओरक सबोय लोकुरकुन ओळीय उपिहतुरक।

¹⁶ असके येसु अव सेयुंग हारिंग अनि रन्ड मीन्कुन येतितुर, अनि स्वरगता परमेस्वरनिके हुळसुन धन्यवाद किस हारिनुंग किरिहचुन चेला लोकुरा कयदे हितुर ओर लोकुरकुन तिन्दिला तुसिरक।

¹⁷ अनि सबोय लोकुरक तिन्जुन पन्जतुरक, अनि चेलालोरक किरिहतांग पिसतांग हारिंग मीन्कुन बारा सिबलांग निहचुन ओतुरक।

पतरास येसुन मसि मानेमान्तोर

¹⁸ उन्दि दिया येसु वरोरे प्रार्थना किन्दुर असके चेलालोरक ओनासंगे मतोरक, असके येसु चेलालोरकुन, “लोकुरक नाकुन बोर आन्दुर इन्तोरक?” इदाम पुच्चेमातुर।

¹⁹ अनि ओरक येसुन इदाम उत्तर हितुरक, “बपतिस्मा हेवाल युहन्नाल आन्दुर इन्जोर हुचुलोरक इन्तोरक, अनि परमेस्वरनोर दास एलियाल आन्दुर इदाम दुसरो हुचुलोरक इन्तोरक, अनि पहलेटोर परमेस्वरना पोल्लो वेहवालोरिगाडाल बोरे वरोर जिवेमातोर इदाम दुसरो हुचुलोरक इन्तोरक।”

²⁰ येसु ओरकुन, “मति निमाट नाकुन बाताल इन्तोरीट?” इदाम ओरकुन असा वने पुच्चेमातुर। पतरास येसुन, “निमा लोकुरकुन पिसान साटि परमेस्वरनिकेडाल लोहतोर मसिहाल आन्दि” इदाम इतुर।

²¹ इद पोल्लोतुन निमाट बोने वेहमाट इदाम येसु चेलालोरकुन पकाय चेतेह किसुन वेहतुर।

येसु ओना हायानाताता बारेता वेहान्तोर

²² अनि येसु असा चेलालोरकुन इतुर, “नना मानेयतोर मरि पकाय दुःख सहेमायका, अनि यहुदि लोकुरा मुक्यालोरक अनि मुक्याह याजक लोकुरक अनि मूसाना नियमतुन करिहवालोरक, नाकुन विरोद किसुन हव्कानुरक अनि मून्ड दियाने नना असा जिवेमायिला पहाजे।”

येसुना परके हन्दानाता अर्थ

²³ येसु सबोय लोकुरकुन इतुर: “बोरे नावा परके वासुन नावा चेला बनेमायाना इच्चा कियानुर ते, ओर आपुना इच्चा अनि योजनातुन तासिस दरोज आपुना कुरुस ताहच आपुना पकाय तकलिपतुन सहेनकिस नावा परके वायिर।

²⁴ बोर आयि आपुना जिवातुन पिसिहला हुळानुरक ते ओरकुन परमेस्वरना संग मन्ता अनन्ता काळता जिवा नष्ट आयार, मति बोर आयि नावा साटि आपुना जिवातुन हियानुर ओरकुन परमेस्वरनासंग अनन्तकाळता जिवा पुटार।

²⁵ मति बोरे मानेय दुनियाता सबोय सुख अनि शान्तितांग वस्तुनुंग पुटहानुर अनि ओर आपुना आत्मातुन नरकता पकाय तकलिप साटि हरचियानुर ते ओन बाताल फायदा मन्दार?

²⁶ अनि बोर आयि मानेय नाकुन अनि नावांग पोल्लोनुंग वेहान साटि लज्जा आयनुर ते, ओना बारेते नना मानेयतोर मरि वने आपुना बाबोना अनि पवित्र स्वरगदूतनांग महिमासंग दुनियाता न्याय कियान साटि वायाना दियाते लज्जेमायका।

²⁷ अनि इगा नितितोरक ओरिगाडाल हुचुलोर लोकुरक परमेस्वरना राज्यतुन हुळाना मुने हायोरक आयनुरक इन्जोर नना मिकुन खरोय इन्तोना।”

येसुना रुपान्तर

²⁸ अनि आट दियाना पजा येसु पतरसिन, युहन्नान अनि याकुबिन आपुनासंग प्रार्थना कियान साटि मटा पोरो ओतुर।

²⁹ अनि ओर प्रार्थना कियाला आस मन्दुर, असके ओना चेहराता रुप बदले मात, अनि ओना कपळांग वने पकाय पान्डरिह आसुन मान्जीला लाकतुंग।

³⁰ अनि सान्डेय मूसाल अनि एलियाल येरक इवुर मानेयक येसुनासंग वळकिला आस मन्दुरक।

³¹ अनि ओरक महिमाता संगेय दिसतुरक, अनि ओरक येरुसलेम सेहेरतिगा मुने आयाना मता येसुना हायानाता पोल्लोतुन वळकिला आस मन्दुरक।

³² असके पतरास अनि ओनोर गोतियाहकुन पकाय हुन्जिला वसमन्दु, अनि ओरक हुन्जिला वसमन्द अगडाल, सोबाय चेतेमातुरक असके येसुना महिमा आयानातुन अनि ओरक इवुरक मानेयक येसुनासंग निचमन्दुरक अदेन हुळतुरक।

³³ असके मूसाल अनि एलियाल येसुना हेरेटाल हन्दिला आस मन्दुरक ते, पतरास येसुन इतुर, “हे गुरु, माकुन इगा मन्दाना सोबाय मन्ता। माक मून्ड तम्बुंग बनेहकियाकाट, उन्दि नियासाटि, उन्दि मूसान साटि, अनि उन्दि एलियान साटि” इदाम ओर बातांग येसुन इन्दिला आतोना इन्जोर पुनोर आस इतुर।

³⁴ अनि पतरास वळकिला आस मन्दुर अचोन बेरा पोरोडाल उन्दि ढगि वासुन ओरकुन दळमि आत, अनि आबार ओरा हिरमुटा आयिला लागतु इन्जोर ओरक वरियतुरक।

³⁵ असके अद आबारताल, “येर नावोर मरि अनि नावोर आचतोर आन्दुर, अनि निमाट येनांग वेहतानुंग केन्जाट” इदाम उन्दि लेंग वातु।

³⁶ आबारतीगाडाल लेंगवात बरोबर येसु वरोरे मताप दिसतुर। अनि चेलालोरक कमेक आतुरक, अनि अगा आताल पोल्लोतुन हुळसुन अद पोल्लोता बारेते अव दियाते बोने वेहोरक।

येसु दुष्ट आत्मा पय्ता पेकान सुदरेह किन्तोर

³⁷ अनि दुसरो दिया, ओरक मटाताल अडिय रयिन्दुरक, असके उन्दि हजोर लोकुरा गोहडि येसुना हेरे वातुरक।

³⁸ अनि लोकुरा गोहडिताल वरोर मानेय हजोर लेंगदे केयसुन येसुन इतुर, “हे गुरु, नावोर मरिन दया किम इन्जोर नना निकुन विनन्ति किन्तोना; ओर नावोर वरोरे मरि मन्तोर।

³⁹ उन्दि दुष्टात्मा नावोर मरिन रोमस रोमस पयसुन ओर हुरहाय पकाय कोलहार किन्तोर, अनि दुष्टात्मा नावोर मरिन टोडीतिगाडाल बुम्बूह पसिहनाक पकाय मोडरेह किन्ता। अनि ओन पकाय अदळेह किसुन तकलिब हिसुन ओनिगाडाल पसियान्ता।

⁴⁰ नना निया चेलालोरकुन दुष्टात्मातुन पसहिरक इन्जोर विनन्ति कितान मति ओरक दुष्टात्मातुन पसिहिला परोरक आतुरक” इन्जोर इतुर।

⁴¹ अनि येसु उत्तर हितुर, “हे अविस्वासु अनि जिद्दि लोकुरक, बचोक दियांग मियासंग नना मनका, अनि बचोक दियांगताल मियांग इव सबोय पोल्लोनुंग सहेमासोरिंग मनका? इदेक निया मरिन नावा हेरे तरा।”

⁴² अनि ओनोर मरि येसुना हेरे वायिला आस मन्दुर, अचोन बेरा दुष्टात्मा ओन पय्तु अनि तलियला लाकतु। मति येसु अद अशुत्मातुन रांगतुर, अनि पेकान सुदरेह किसुन ओना बाबोना कयदे सोपे किसितुर।

⁴³ असके सबोय लोकुरक परमेस्वरना हजोर लावता चमत्कारतुन हुळसुन दंगे मातुरक।

येसुना हायानाता बारेता दुसरो बेरा वेहान्तोर

⁴⁴ अचोन बेरा येसु आपुनोर चेलालोरकुन इतुर, “निमाट नावांग पोल्लोनुंग केन्जाट: नना मानेयतोर मरि मानेयकना कयदे पयसिवालोर मन्तोर।”

⁴⁵ मति येसुनोरक चेलालोरकुन येसु वेहतुर अव पोल्लोनुंग समजेमाय परोरक आतुरक। अनि अव पोल्लोनुंग परमेस्वर चेलालोरकुन समजेमायवाहकिन मकिहच इरतुर, अनि चेलालोरक अव पोल्लोता बारेते येसुन पुच्चेमायान साटि वरियन्दुरक।

सबोयताल हजोर बोर?

⁴⁶ मावा पयकि बोर हजोर मन्तोर इदाम उन्दि विवाद चेलालोकुरा नडुम आतु।

⁴⁷ मति येसु चेलालोरा मन्दा पोल्लोतुन पुन्जुन वरोर नोनान तचुन आपुना हेरे निपिहतुर।

⁴⁸ अनि येसु चेलालोरकुन इन्तोर, “नावा पोरोयदे बोर येर नुनान गिरदाते मानेमायनुर ओर नाकुन वने मानेमायनुर; बोर नाकुन मानेमायनुर ओर मानेय नाकुन लोहवाल परमेस्वरतुन मानेमायनुर। बाक्याकि मिया पयकि बोर हुडलोनताल हुडलोर आन्तोर ओर सबोय लोकुराताल हजोर आयनुर” इन्जोर इतुर।

मियोर होंगते हिलेर ओर मियोर संगे मन्तोर

⁴⁹ अनि युहन्नाल इन्तोर, “हे गुरु, वरोर मानेय निया पोरोयदे दुष्टात्मातुन पसिहान्तोर असके माक हुळतोम अनि ओर मावासंग आसुन निया परके ताकोर इन्जोर माक ओन दुष्टात्मातुन पसिहमा इन्जोर इतोम।”

⁵⁰ असके येसु युहन्नान इन्तोर, “ओन निमाट दुष्टात्मातुन पसिहमा इन्जोर इन्माट, बाक्याकि बोर मिया होंगते हिलेर ओर मिया संगनोर आन्दुर।”

येसुना पोरो सामरि लोकुरा होंग

⁵¹ अनि येसुना स्वरगतिके हन्दाना बेरा आस मन्द असके येसु येरुसलेम हन्दाना विचार कितुर।

⁵² अनि येसु आपुना हन्दानाता मुने चेलालोरकुन लोहतुर, ओरक हन्जुन येसुन साटि जागा बनेह केविरक इन्जोर सामरि लोकुरा उन्दि नाटेनिगा हतुर।

⁵³ अनि येसु येरुसलेम हन्दुर इन्जोर अद नाटेनोर लोकुरक येसुन रेयिला हेवोरक आतुरक।

⁵⁴ अनि येसुना चेलालोरक युहन्नाल अनि याकुब अव पोल्लोनुंग केन्जुन, “हे प्रबु निया इच्चा मतोन ते परमेस्वरना पोल्लो वेहवाल एलियाल कितोर लेहका आबारताल किस अरिहचुन ओरकुन नाश कियाना साटि माक आग्या हिम” इदाम इतुर।

⁵⁵ मति येसु परके मिळिंचुन चेलालोरकुन रांगतुर, (“निमाट बदामना आत्मातोर आन्दिट इन्जोर बांग निमाट पुनविट; मानेयतोर मरि लोकुरा जिवातुन नाश कियाला वायोर, मति जिवातुन पिसहान साटि वातोर” इन्जोर इतुर)

⁵⁶ असके येसु अनि ओना चेलालोरक दुसरो नाटेनिके हतुरक।

येसुना परके हन्दानाता किमत

⁵⁷ येसु अनि ओनोर चेलालोरक हरिय हन्दुर, असके वरोर मानेय येसुन, “हे प्रबु निमा बगा-बगा दाकि अगा-अगा नियासंग वायका” इन्जोर इतुर।

⁵⁸ असके येसु ओर मानेयतुन उत्तर हितुर, “कोल्याहकुन मन्दान साटि पान्जांग मन्तांग अनि पिटेनुंग मन्दान साटि गुडांग मन्तांग, मति नना मानेयतोर मरिन तला इरान साटि वने बगाय जागा हिले।”

⁵⁹ अनि असा दुसरो मानेयतुन “वरा नावा चेलाल आम” इन्जोर येसु इतुर। ओर मानेय येसुन इतुर, “हे प्रबु, नाकुन मुने हन्दा हिम अनि नावोर बाबाल हासुन ओन मिसि निया परके वायका।”

⁶⁰ अनि येसु ओर मानेयतुन इतुर, “हातोरकुन आपुना मुरदा मिसिला हिम मति निमा हन्जुन परमेस्वरना राज्यता पोल्लोंग वेहा।”

⁶¹ अनि असा वने तिसरो मानेय इतुर, “हे प्रबु नना नियासंग वायका, मति मुने नावा परिवारतिगा हन्जुन सार किस वायान साटि नाकुन परवांगि हिम।”

⁶² असके येसु ओर मानेयतुन, “बोर आयि नांगेल पुहानपा परके मिळिन्च हुळान्तोर ओर परमेस्वरना राज्यता लायेक हिलेर” इदाम इतुर।